[1] A jɛlen don ko Matigi na makari Yakuba la, a na Israɛl bɔnsɔn kɛ a ka ɲɛnatɔmɔlenw ye ko kura ka u lasegin u ka jamana la. Dunanw na nɔrɔ Yakuba ka so la ka sigi u fɛ.
[2] Siyaw na u ta ka taa ni u ye u ka yɔrɔ la, o siyaw na kɛ Israɛl ka so ka jɔnkɛw ni u ka jɔnmusow ye Matigi ka jamana la. Mɔgɔ minw ye u minɛ jɔnya la, olu na kɛ u ka jɔnw ye. Minw ye u fanga digi u la, u na olu mara.
[3] Ni Matigi ye i lafiya ka bɔ i ka tɔɔrɔbaw la tuma min na, i tun bɛ jɔnya baara gɛlɛn minw na kɔni,
[4] i na nin dɔnkili da Babilonɛ masakɛ ko la k'a fɔ ko: «Nin tɔɔrɔbaa banna cogo di? Nin tɔɔrɔ kow banna cogo di?
[5] Matigi ye mɔgɔ jugu ka bere kari, juguya bere kɔni.
[6] A tun bɛ mɔgɔw gosi ni fariya ni hakilintanya bere ye. A tun bɛ mɔgɔw mara ni dimiya ye, a ma hinɛ tuma si.
[7] Dugukolo yɔrɔw bɛɛ bɛ lafiya la, mankan si tɛ a kan. U bɛ ɲagalikanba bɔ.
[8] Sipere jiriw ni Liban sedere jiriw bɛ ɲagali i kosɔn. U ko, kabini i sara, jiritigɛla ma yɛlɛn ka u tigɛ.
[9] «Lahara dugu da yɛlɛlen don ka i kunbɛn. Minw sara i ɲɛ, a bɛ olu lawuli, dugukolo kan mɔgɔbaw kɔni. A bɛ siyaw ka masakɛw bɛɛ lawuli ka bɔ u ka masasigilanw kan.
[10] U bɛɛ bɛ kuma ta ɲɔgɔn fɛ ko: ‹E fana barika banna i ko anw. I kɛlen filɛ i ko anw.
[11] I ka saramaya ni i ka nkɔnikan dumanw donnen filɛ lahara dugu kɔnɔ. I bɛ i da tolileɲa kan, ntumuw bɛ i da tugu.›»
[12] Sigi dolo, kɛnɛbɔda den, i bira ka bɔ sankolo la cogo di? I bira duguma cogo di, e min ye siyaw cɔngɔ i sen kɔrɔ?
[13] I y'a fɔ i yɛrɛ kɔnɔ ko: «Ne na yɛlɛn ka taa sankolo la ka ne ka masasigilan sigi Ala ka dolow san fɛ. Ne na ne sigi saheli yanfan fɛ kulu kan bato fɛnw sigi yɔrɔ la.
[14] Ne na yɛlɛn sankaba san fɛ ka kɛ i ko Kɔrɔtalenba.»
[15] O bɛɛ n'a ta i jigintɔ filɛ lahara dugu, dingɛ dunba kɔnɔ.
[16] Minw bɛ i ye, olu ɲɛ jɔlen na to i la ka i kɔlɔsi k'a fɔ ko: «Cɛ min ye dugukolo yɛrɛyɛrɛ ka masayaw lamaga, nin don wa?
[17] Cɛ min ye dugukolo bɛɛ kɛ kungokolon ye ka a duguw ci, ni a ma sɔn k'a ka kaso la mɔgɔw bila ka taa u ka so, nin don wa?»
[18] Siyaw ka masakɛw bɛɛ bɛ da ni bonyali ye u yɛrɛw kaburuw kɔnɔ.
[19] Nka e kɔni, i filila ka mabɔ i kaburu la i ko jiribolo fililen. I datugura ni mɔgɔ suw ye, olu minw fagara ni npan ye ka fili fara dingɛ kɔnɔ. I kɛra i ko mɔgɔ su forokilen mɔgɔw sen kɔrɔ.
[20] I ni u tɛ se ka lajɛ ɲɔgɔn fɛ kaburu kɔnɔ, sabu i ye i ka jamana halaki ka i ka mɔgɔw faga. Bɔnsɔn tɛna to mɔgɔ juguw kɔ.
[21] Aw ka a denw fagali ko ɲɛnabɔ u bangebaaw ka tilenbaliya kosɔn, walisa u kana wuli ka dugukolo minɛ ka diɲɛ yɔrɔw bɛɛ fa ni dugubaw ye.
[22] Kɛlɛbolow Matigi ko: «Ne na wuli u kama ka Babilonɛ tɔgɔ ni a kɔnɔ mɔgɔ tɔ tolenw ni a siya bɛɛ halaki ka u ban.» Matigi ko ten.
[23] «Ne na a kɛ jugunin dingɛ ye, ne na a kɛ fala ye. Ne na a fura ni halakili furalan ye.» Kɛlɛbolow Matigi ko ten.
[24] Kɛlɛbolow Matigi y'i kali ko: «Ne ye min latigɛ, o na kɛ. Ne ye dabali min siri, o na dafa, siga t'a la.
[25] Jamana min ye ne ta ye, ne na Asirikaw tiɲɛn o kɔnɔ. Ne na u cɔngɔ ne sen kɔrɔ ne ka kuluw kan. Ne ka ɲɛnatɔmɔlenw na hɔrɔnya, a ka zu na bɔ u kan na, doni na jigin ka bɔ u kan na.
[26] Ko min latigɛra dugukolo bɛɛ kama, o don. Bolo min mɔɔnɔbɔlen bɛ ka da siyaw bɛɛ kan, o don.»
[27] Ɔwɔ, Kɛlɛbolow Matigi ye o latigɛ, jɔn bɛ se ka a tiɲɛn? A bolo mɔɔnɔbɔlen don, jɔn na a bolo lakuru?
[28] Masakɛ Akaz sara san min na, nin kiraya kuma fɔra o san na.
[29] Filisiti jamana, i kana ɲagali ko gosi bere karila, k'a masɔrɔ dankala na kɛ sa gwansan nɔ na, o den na kɛ sa panta ye.
[30] Sɛgɛnbaatɔw na balo sɔrɔ, kɔlibaatɔw na lafiya sɔrɔ, nka ne na i bɔnsɔn halaki ni kɔngɔba ye. Min bɛ to i kɔ, ne na olu halaki.
[31] Dugu donda, i ka kasi. Dugu, i ka kulokan bɔ. Filisiti jamana, siran ko na i sɔrɔ, k'a masɔrɔ sisiba bɛ na ka bɔ saheli yanfan fɛ, kɛlɛbolokulu bɛ na, a ka kɛlɛkɛ cɛ si tɛ u kɔtɔrɔmabɔ.
[32] An ka o jamana ka cidenw jaabi cogo di? Ko, Matigi ye Sion kulu ju sigi, a ka mɔgɔ degunnenw na dogo yɔrɔ sɔrɔ yen.