[1] A filɛ, Matigi, Kɛlɛbolow Matigi bɛ Jerusalɛm ni Juda ka sɛmɛlanw ni u sinsin fɛnw bɔ u kɔrɔ, u jigi sɛmɛlen bɛ dumuni fɛn ni ji minw bɛɛ kan kɔni.
[2] A na cɛ farinmaw ni kɛlɛkɛ cɛw ni kiritigɛlaw ni kiraw ni dɔnbaaw ni cɛkɔrɔbaw
[3] ani jalatigibaw ni mɔgɔ tɔgɔbaw ani laadibaaw ni maɲɛrɛ baarakɛla ɲumanw ani filɛlikɛlaw bɛɛ faga.
[4] Ne na kamalenw di u ma ka kɛ u kuntigiw ye, denmisɛnw na u mara.
[5] Mɔgɔ na ɲɔgɔn tɔɔrɔ, cɛw na wuli ɲɔgɔn kama, sigiɲɔgɔn na wuli a sigiɲɔgɔn kama. Kamalen na cɛkɔrɔba kɛlɛ, mɔgɔ gwansan na bonya.
[6] Ni mɔgɔ dɔ ye a mɔgɔɲɔgɔn minɛ a fa ka du kɔnɔ k'a fɔ a ye ko: «Dulɔkiba bɛ i fɛ, i ka kɛ an kuntigi ye. I na sigi nin tomonw kun na.»
[7] O tuma la o tigi na a balima jaabi ko: «Ayi, ne tɛ se ka kɛ aw tilabaa ye. Dumuni wala dulɔkiba tɛ ne ka so kɔnɔ. I kana ne kɛ mɔgɔ kuntigi ye.»
[8] Ɔwɔ, Jerusalɛm tiɲɛnna. Juda bira, k'a masɔrɔ u ka kumaw ni u ka kɛwalew bɛ Matigi kɛlɛ. U bɛ muruti a nɔɔrɔ ma.
[9] U ɲɛda cogo bɛ kɛ u yɛrɛ seere ye. U bɛ i ko Sodɔmɛ cogo, u bɛ u ka jurumu welewele da. U tɛ maloya o la fewu. Bɔnɛ bɛ u ye, k'a masɔrɔ u ye ko jugu kɛ u yɛrɛw la.
[10] I k'a fɔ ko mɔgɔ tilennenw na hɛrɛ sɔrɔ, k'a masɔrɔ u na u ka kɛwalew tɔnɔ sɔrɔ.
[11] Bɔnɛ bɛ mɔgɔ jugu ye, a na ko jugu sɔrɔ, katuguni a bolo ye min kɛ, o ɲɔgɔn na kɛ a yɛrɛ la.
[12] Ne ka mɔgɔw tɔɔrɔla denmisɛnw fɛ, musow bɛ u mara. Ne ka mɔgɔw, aw ɲɛminɛbaaw bɛ aw lafili. Aw ka kan ka taa sira min fɛ, u bɛ o tiɲɛn.
[13] Matigi labɛnnen bɛ ka jalakili kɛ, a labɛnnen bɛ ka kiri tigɛ siyaw kan.
[14] Matigi y'a daminɛ ka kiri tigɛ a ka mɔgɔw ka cɛkɔrɔbaw ni kuntigiw kan. A ko: «Aw ye rezɛn nakɔ mɔ bɛɛ ta, aw ye faantanw bolo fɛnw cɛ ka aw ka sow fa.»
[15] Kɛlɛbolow Matigi ko: «Jo jumɛn bɛ aw bolo ka ne ka mɔgɔw tɔɔrɔ ka bɔnɛ lase mɔgɔ degunnenw ma?»
[16] Matigi ko fana: «Jerusalɛm musow ye u kuncɛ bonya ka u kankalaw janya ka mɔgɔw nɛgɛn ni u ɲɛw ye. U bɛ jakumani taama kɛ ka ntanankan bɔ u senw la.
[17] O de kosɔn Matigi na Jerusalɛm musow kun di. Matigi na u farilankolonya ka u maloya.»
[18] Masiri minw bɛ u la, Matigi na olu bɔ u la o don na, senna masiri ni kunna masiri
[19] ni tulola masiriw ni bolokalala masiriw ani kunna biri finiw
[20] ni kunna masiri ni senna jɔlɔkɔw ani cɛ sirilanw ani suma diyalan baraw ni bolola nɛgɛw
[21] ani bolonkɔnila nɛgɛw ni nunna nɛgɛw
[22] ni jama don dulɔkibaw ni kanna da disaw ni wari bilalanw
[23] ni ja filɛw ni bɔlɔti finiw ni musɔrɔw ani jalamuguw.
[24] Fɛn tolilen kasa bɔlen na kɛ suma diyalan nɔ na, jurukisɛ na kɛ cɛ sirilan nɔ na, kunsigi bɔsilen na bila kunsigi ɲuman nɔ na, cafu fini na bila dulɔkiba nɔ na, cɛ juguya na bila cɛɲɛ nɔ na.
[25] Sion, i ka kɛlɛkɛ cɛw na bi npan fɛ. I ka cɛ tɔgɔbaw na to kɛlɛ la.
[26] Dugu kɔnɔ mɔgɔw bɛɛ na nwunan ka su kasi kɛ. U na kɛ i ko muso min bɔnɛna a ka fɛnw bɛɛ la ka i sigi buguri la.