[1] A filɛ, masakɛ na a ka masaya kɛ ni tilennenya ye. Kuntigiw na jamana mara ni jɛlenya ye.
[2] U bɛɛ kelen-kelen na kɛ dogo yɔrɔ ye fiɲɛba ɲɛ, u na kɛ i ko sanjiba ladon yɔrɔ. A na kɛ i ko kɔw bɛ woyo dugukolo jalen na, a na kɛ i ko farakurunba min bɛ suma da jamana jalan kan.
[3] Minw ɲɛw bɛ yeli kɛ, olu tɛna fiyen tun, minw tulo ka di, olu na u tulo majɔ.
[4] Mɔgɔ miiribali dusukun na ko dɔn, susubaatɔ na kuma ka jɛya.
[5] Hakilintan tɛ bonya sɔrɔ tun, mɔgɔ tɛgɛma gɛlɛn tɛna wele ko mɔgɔ sɛbɛ.
[6] Hakilintan bɛ hakilintanya kuma fɔ. A dusukun bɛ tilenbaliya kɛ ka Ala ɲɛsiranbaliya kow kɛ, ka Ala tɔgɔ tiɲɛn kuma fɔ Matigi ma ka kɔngɔtɔ jɛ dumuni la ka minnɔgɔtɔ jɛ ji la.
[7] Mɔgɔ nganiya jugu ka ko kɛtaw ka jugu. A bɛ dabali jugu labɛn walisa a ka sɛgɛnbaatɔw halaki ni nkalon ye, hali ni jo bɛ faantan fɛ kiri la.
[8] Nka mɔgɔ ɲuman bɛ dabali ɲuman labɛn, a na to ka ko ɲuman kɛ.
[9] Muso fɛrɛlenw, a' ye wuli ka ne lamɛn. Denmuso minw bɛ farati la, aw ka aw tulo majɔ ne ka kuma la.
[10] Aw minw bɛ farati la, ni san kelen ni tile dama dɔw tɛmɛnna, aw na yɛrɛyɛrɛ k'a masɔrɔ rezɛn mɔ tɛna kari, suman si tɛna sɔrɔ.
[11] Muso fɛrɛlenw, aw ka jɔrɔ. Aw minw bɛ farati la, aw ka yɛrɛyɛrɛ. A' ye aw ka finiw bɔ aw la ka aw farilankolon to, ka aw cɛ siri ni cafu fini ye ka kasi.
[12] Aw kasitɔ ka aw disiw gosi, aw ka foro ɲumanw ni aw ka rezɛn nakɔw tiɲɛnni kosɔn.
[13] Nwɔniw ni nɔnfɔn nwɔnimaw bɛ wuli ka ne ka mɔgɔw ka dugukolo yɔrɔw ani dugu ɲuman bɛɛ fa.
[14] K'a masɔrɔ masaya so lankolon don, dugu mankanma lankoloɲara. Tintin ni kɛlɛ kunbɛn sow na kɛ tomon ye, u na kɛ kungo faliw yaala yɔrɔ ni sagaw gɛn yɔrɔw ye,
[15] fo Ala Ni ka bɔ san fɛ sankolo la ka jigin an kan ka caya. Kungokolon na kɛ foro hinɛma ye, foro hinɛma na den ka jiidi.
[16] O tuma la tilennenya na sigi kungo kɔnɔ, tilennenya na sigi rezɛn nakɔ kɔnɔ.
[17] Tilennenya na hɛrɛ bange, tilennenya den na kɛ lafiya ni mara ko ɲuman ye tuma bɛɛ.
[18] Ne ka mɔgɔw na sigi yɔrɔ lafiyalen na, sigiyɔrɔ lasagɔnen fɛrɛlen kɔnɔ.
[19] Nka sanbɛlɛ na kungo kɔnɔna tiɲɛn, duguba na ci ka jɛnsɛn.
[20] Aw minw bɛ danni kɛ jiw bɛɛ da la, aw minw b'a to misiw ni faliw garantan ka yaala, aw ye dubadenw ye.