[1] Kiraya kuma kulu furancɛ la yeli kɛ yɔrɔ ko la.
[2] Jerusalɛm, e min tun bɛ wɔyɔ ka mankanba ni ɲɛnajɛkan bɔ, mun kɛra i la fo i kɔnɔ mɔgɔw bɛɛ yɛlɛnna sow kun na? I ka mɔgɔ salenw ma faga ni npan ye, u ma faga kɛlɛ la.
[3] I kuntigiw bɛɛ bolila ɲɔgɔn fɛ, u minɛna bonnikɛ kalatigiw fe. I kɔnɔ mɔgɔw bɛɛ minɛna ɲɔgɔn fɛ, hali minw tun bolila ka taa yɔrɔ jan, olu minɛna.
[4] O de kosɔn ne ko: «I kana ne filɛ, i k'a to ne ka ɲɛnasisi kasi kɛ. I kana ne dusu saalo ne ka mɔgɔw halakili kosɔn.»
[5] K'a masɔrɔ hakili ɲaami ni halakili ani kɔnɔna fili don don. Matigi, Kɛlɛbolowtigi Ala ye o latigɛ yeli fɛnw jira kuluw furancɛ kama. A lamini kogow bɛ ci, mɔgɔ tɔɔrɔlenw kulokan bɛ bɔ ka se fo kulu ma.
[6] Biɲɛ mara ton bɛ Elam bolo. A ka wotorow falen bɛ kɛlɛdenw na, sotigiw fana bɛ u fɛ. Kir bɛ a ka nɛgɛ bɛnnan bɔ kɛnɛkan.
[7] I ka jɛkɛnɛ ɲuman yɔrɔw bɛɛ fara wotorow ni sotigiw labɛnnen na kɛlɛ kama i dondaw la.
[8] Juda bɔnsɔn jigi da yɔrɔ minɛna. O don na kɛlɛkɛ minan minw tun bɛ masaya tu so kɔnɔ, i tun ye i jigi da olu kan.
[9] Aw y'a ye ko Dawuda ka dugu yɔrɔ caman tiɲɛnna. Aw ye duguma ji dingɛ ji mara.
[10] Aw ye Jerusalɛm dugu sow jate ka u dama dɔn. Aw ye so dɔw ci walisa aw ka dugu lamini kogo barika bonya.
[11] Aw ye ji dingɛ sen kogo fila ni ɲɔgɔn cɛ walisa ka ji dingɛ kɔrɔ ji mara o kɔnɔ. Nka min ye o kow kɛ, min ye u latigɛ kabini tuma jan, aw ma aw yɛlɛma ka o filɛ.
[12] O don na Matigi, Kɛlɛbolowtigi Ala ye aw wele walisa aw ka kasi ka nwunan ka aw kun di ka cafu fini don aw kan na.
[13] Nka a filɛ, aw bɛɛ bɛ nisɔndiya ka ɲagali. Aw bɛ misiw faga ka sagaw kan tigɛ ka sogo dun ka diwɛn min. Aw ko: «An ka dumuni kɛ ka minni kɛ, sabu sini an na sa.»
[14] Kɛlɛbolow Matigi y'a fɔ ne tulo kɔrɔ ko: «O tilenbaliya kow tɛna yafa aw ma fo ka taa aw sa.» Matigi, Kɛlɛbolowtigi Ala ko ten.
[15] Matigi, Kɛlɛbolowtigi Ala ko ne ka taa masakɛ terikɛ Sebna sɛgɛrɛ, masaya so kuntigi don,
[16] k'a fɔ a ye ko: «I niyɔrɔ ye mun ye yan, jɔni bɛ i fɛ yan, fo i bɛ i ka kaburu sen yan? Ɔwɔ, a bɛ kaburu sen fo san fɛ, a bɛ sigiyɔrɔ dɛsɛ a yɛrɛ ye fara la.
[17] A filɛ, Matigi na i kerun yɔrɔ jan ni fanga ye, a na i meleke kosɛbɛ.
[18] A na i fyekufyeku ka i fili jamanaba la i n'a fɔ ntola. I na sa yen, i ka wotoro saramaw na kɛ yen, e min kɛra i kuntigi ka so maloya ko ye.
[19] Ne na i gɛn ka bɔ i ka baara la, i na wuli ka bɔ i sigiyɔrɔ la.
[20] «O don na ne na ne ka baaraden Hilkija denkɛ Eliakim wele.
[21] Ne na i ka dulɔkijan don a kan na ka i ka cɛ sirilan kɛ ka a cɛ siri ka i ka fanga di ale ma. Ale na kɛ Jerusalɛmkaw ni Juda ka so fa ye.
[22] Ne na Dawuda ka so konnɛgɛ da a kamankun na. Ale na da yɛlɛ, mɔgɔ si tɛna se ka a tugu. A na da tugu, mɔgɔ si tɛna se ka a yɛlɛ.
[23] Ne na a kɛ i ko nɛgɛbɔlɔ gengennen yɔrɔ gɛlɛn na. Ale na kɛ nɔɔrɔ masasigilan ye a fa ka so kɔnɔ.
[24] «A balimasira mɔgɔbaw ni mɔgɔ misɛnw bɛɛ na dulon a la i ko jifilenw ni dagabaw bɛ dulon nɛgɛbɔlɔ la cogo min na.»
[25] Kɛlɛbolow Matigi ko: «Ɔwɔ, nɛgɛbɔlɔ min gengenna kogo gɛlɛnma na, o don na o na sama ka bɔ yen. A na bi. Bolo la fɛn minw dulonnen tun bɛ o la, olu na bi. U bɛɛ na tiɲɛn,» sabu Matigi ko ten.