[1] Siyaw, a' ye aw madon ka lamɛnni kɛ. Aw mɔgɔw, a' ye aw tulo majɔ. Dugukolo ni a kan fɛnw bɛɛ ka lamɛnni kɛ, ani diɲɛ ni a kɔnɔ fɛnw bɛɛ.
[2] Matigi diminna siyaw bɛɛ kɔrɔ, a dusu bɔra u ka kɛlɛbolow bɛɛ kɔrɔ. A ko a na u si tunun ka u halaki ka u ban.
[3] Mɔgɔ fagalenw filila kɛnɛma, u suw kasa bɔra, kuluw bɛ u joliw woyo ka jigin.
[4] Sankolola dolow bɛɛ na yeele i ko tulu, sankolo na meleke i ko sɛbɛnfura. A dolow na bi i ko rezɛn furaw bɛ bɔn cogo min na, i ko toro sun fura kɔrɔlenw bɛ burun cogo min na.
[5] Ne ka npan labɛnnen bɛ sankolo la, a jigintɔ filɛ Edɔm kan, ne ye mɔgɔ minw halakili ko latigɛ, a na jigin olu kan ka u halaki.
[6] Matigi ka npan falen bɛ joli la, kɛn ye a yɔrɔw bɛɛ datugu, sagadenw joli ni bakɔrɔw ta ani sagajigi kɔlakuru la kɛn kɔni, k'a masɔrɔ Matigi na saraka bɔ Bozra, fagaliba na kɛ Edɔm jamana kɔnɔ.
[7] Kungo sigiw na bi u fɛ, ntura bɔlanw ni ntura kɔrɔw na faga ɲɔgɔn fɛ. U ka dugukolo na joli min, buguri na kɛ bɔgɔ ye kɛn tulu fɛ,
[8] k'a masɔrɔ o na kɛ Matigi dimin bɔ don ye. A na Sion juguw sara o san na.
[9] Edɔm kɔjiw na yɛlɛma ka kɛ mana ye, a buguri na kɛ kiribi ye. A dugukolo na yɛlɛma ka kɛ mana jenita ye.
[10] O tasuma tɛ sa su fara tile kan. A sisi na yɛlɛn tuma bɛɛ. Jamana lankolon na san caman kɛ. Mɔgɔ si tɛna a cɛ tigɛ tun.
[11] Tentanni ni jugunin na a kɛ u sigiyɔrɔ ye. Ginginw ni nkankan kɔnɔw na sigi a kɔnɔ. Mɔgɔ na sumanikɛ juru da a kan ka a kɛ tomon ye, ka kogo latilen juru da a kan ka a halaki.
[12] Kuntigi si tɛna sɔrɔ ka masakɛ sigi, mɔgɔbaw bɛɛ na ban.
[13] Nwɔniw na wuli a masa sow kɔnɔ, ɲaamɛ nwɔniw ni bin jugu na wuli a kɛlɛ kunbɛn sow kɔnɔ. A na kɛ kungo wuluw sigiyɔrɔ ye ani kɔnɔsogontiw dogo yɔrɔ.
[14] Waraw ni surukuw na lajɛ ɲɔgɔn fɛ yen. Bakɔrɔw na ɲɔgɔn wele. Su fɛ jinɛw na a kɛ u sigiyɔrɔ ye ka u sigi yen hɛrɛ la.
[15] Sa na a ɲaa da yen ka fanw da o kɔnɔ, ka u tɔrɔ ka a denw lamɔ a yɛrɛ kɔrɔ. Dugaw bɛɛ na ɲɔgɔn lajɛ yen.
[16] Aw ka Matigi ka kitabu lajɛ k'a kalan, o fɛn ɲɛnamaw si tɛna dɛsɛ, u si tɛna bɔnɛ a tɔɲɔgɔn na, k'a masɔrɔ Matigi yɛrɛ y'a fɔ ko o kow ka kɛ. A Ni ye u bɛɛ lajɛ yɔrɔ kelen na.
[17] Ale ye kala da u ye. A yɛrɛ bolo ye kala da ka jamana tilatila u cɛ ni juru ye. U na a kɛ u ta ye ka sigi a kɔnɔ badaa.