[1] I ko tasuma bɛ dogo jalan jeni cogo min na, a tun na kɛ i ko tasuma bɛ ji wuli cogo min na. O tuma la i juguw tun na i tɔgɔ dɔn, siyaw tun na yɛrɛyɛrɛ i ɲɛ kɔrɔ.
[2] An tun tɛ miiri i ka siran koba minw na, i ye olu kɛ tuma min na, i jiginna, kuluw yɛrɛyɛrɛla i ɲɛ kɔrɔ.
[3] Mɔgɔ si m'a mɛn, tulo si m'a mɛn, ɲɛ si m'a ye ko bato fɛn wɛrɛ bɛ yen, min bɛ baara kɛ a makɔnɔbaaw ye o cogo la, i kelen kɔ.
[4] Mɔgɔ minw bɛ tugu tilennenya la ni ɲagali ye ani minw bɛ tugu i ka siraw la ka miiri i ko la, i bɛ olu ɲɛ minɛ. I tun diminna an kɔrɔ k'a masɔrɔ an ye jurumu kɛ. An na mɛn tɔɔrɔ la o kosɔn, fo ka se kisili ma.
[5] An bɛɛ tun ye nɔgɔlenw ye, an ka tilennenya kow kɛra i ko fini nɔgɔlenw, an bɛɛ fɔsɔnfɔsɔnna i ko jiri fura. An ka tilenbaliya kow bɛ taa ni an ye i ko fiɲɛ.
[6] Mɔgɔ si ma a yɛrɛ jija ka i tɔgɔ wele ka tugu i la, k'a masɔrɔ i ye i ɲɛda dogo an na, i ye an halaki an ka tilenbaliya kow kosɔn.
[7] O bɛɛ n'a ta, Matigi, e de ye an Fa ye. An ye bɔgɔn ye, e de ye an da. An bɛɛ ye i bolo baara nɔw ye.
[8] Matigi, i kana dimin kosɛbɛ. I kana to ka i hakili jigin an ka tilenbaliya kow la. An bɛ i deli ko i ka an jate i ka mɔgɔw ye.
[9] I ka dugu senuma kɛra kungokolon ye. Sion kɛra yɔrɔ lankolon ye, Jerusalɛm kɛra tomon ye.
[10] An ka batosoba senuma nɔɔrɔma, an bɛnbaw ye e tanu yɔrɔ min na, o jenina tasuma mana fɛ. An ka fɛn senuma minw tun bɛ yen, olu bɛɛ jenina.
[11] O tɔɔrɔw bɛɛ kosɔn, Matigi, i tɛna kuma wa? Yala i makunnen na to fo an ka tɔɔrɔ kosɛbɛ wa?