[1] Jerusalɛm, i ka wuli ka yeelen bɔ, k'a masɔrɔ i ka kɛnɛ yera, Matigi nɔɔrɔ bɔra ka da i kan.
[2] Ɔwɔ, dugukolo yɔrɔw bɛɛ na kɛ dibi ye, dibiba na mɔgɔw bɛɛ datugu. Nka Matigi na a kɛnɛ bɔ i ye, a nɔɔrɔ na kɛ i kun na.
[3] Siyaw na taama i ka kɛnɛyeelen manamanatɔ la, nɔɔrɔ min bɛ i la, o na masakɛw sama.
[4] I ka i ɲɛ kɔrɔta ka i laminiw filɛ. U bɛɛ bɛ ɲɔgɔn lajɛ, u bɛɛ bɛ na i kɔrɔ. I denkɛw natɔ don ka bɔ yɔrɔ jan na, u ye i denmusow ta u kɔnkɔn na.
[5] O yeli na i nisɔndiya, i dusukun na fa ɲagali la, k'a masɔrɔ kɔgɔji kɔnɔ nafolow na kun da i ka so kan, siyaw ka nafolo bɛɛ na taa i ka so.
[6] I ka jamana yɔrɔw bɛɛ na fa ɲaamɛ caman na, Madian ni Efa ɲaamɛkulubaw kɔni, u bɛɛ bɛ na ka bɔ Seba. U bɛ na ni sanu ni suma diyalanw ye ka Matigi tanuli welewele da ni dɔnkili ye.
[7] Kedar sagakuluw bɛɛ na ɲɔgɔn lajɛ i kɔrɔ, Nebajɔt sagajigiw na i mago ɲɛ. U na kɛ saraka ye ne ka saraka bɔlan kan, ne na sɔn u ma. Ne na nɔɔrɔ da ne ka so nɔɔrɔma kan.
[8] Nin minw bɛ wuli i ko sankaba, olu ye jɔnw ye? U bɛ panpan i ko jɛnɛntubanw kɔsegintɔ u ka ɲaa la.
[9] Kɔgɔji dala jamana jan minw jigi bɛ ne kan, olu don. Tarsisi jikan kurunbaw bɛ u ɲɛ fɛ, walisa u ka na ni i denkɛw ye ka bɔ jamana janw na, ka na ni u ka sanu ni u ka warijɛ ye, Matigi, i ka Ala ni Israɛl ka Senuma tɔgɔ bonyali kosɔn, k'a masɔrɔ a ye nɔɔrɔ da i kan.
[10] Jamana wɛrɛ denw na i lamini kogow jɔ, u ka masakɛw na baara kɛ i ye. Ne diminnenba ye i gosi, nka sisan a ka di ne ye ka hinɛ i la ne ka kanuya kosɔn.
[11] I dondaw yɛlɛlen na to tuma bɛɛ, u tɛna tugu su fara tile kan, walisa u ka don ni siyaw ka nafolo ye i la, ani u ka masakɛw tugutugulen ɲɔgɔn kɔ.
[12] K'a masɔrɔ ni siya ni masaya minw ma sɔn ka baara kɛ i ye, olu na halaki, o siyaw na ban.
[13] Liban kungo kɔnɔ jiriw bɛɛ la ɲuman, sipere sunw ni orme sunw ani buis sunw kɔni, olu bɛɛ na kɛ ka ne ka yɔrɔ senuma dila k'a cɛɲɛ. O cogo la ne na nɔɔrɔ da ne ka dugu kan.
[14] I tɔɔrɔbaaw denw bɛɛ bɛ na i ka so ka u biri i kɔrɔ, minw ye i dɔgɔya, olu bɛɛ na u biri i sen kɔrɔ. I tɔgɔ na da ko «Matigi ka dugu» ani «Israɛl ka Senuma ka Sion.»
[15] O tuma la e min tun bilara ka i koniya ka i to tɔɔrɔba la, ne na i kɔrɔta badaa, bɔnsɔn nataw bɛɛ na ɲagali i kosɔn.
[16] I na siyaw ka nɔnɔ min, sin bɛ di den ma cogo min na, masakɛw na i balo o cogo la. I n'a dɔn ko ne ye Matigi, i Kisibaa de ye, ko Yakuba ka Sebaayabɛɛtigi ye i Kunmabɔbaa ye.
[17] Ne na sanu di i ma nsiranɛgɛ nɔ na, ka warijɛ di nɛgɛfin nɔ na, ka nsiranɛgɛ di jiri nɔ na, ka nɛgɛfin di kabakurun nɔ na. Ne na hɛrɛ kɛ i kuntigi ye, ka tilennenya kɛ i ka kiritigɛla ye.
[18] Binkanni kow tɛna mɛn i ka jamana kɔnɔ tun, tiɲɛnni ni halakili ko tɛna mɛn i dancɛw la. Nka i na i lamini kogow wele ko «Kisili», ka i dondaw wele ko «Tanuli».
[19] I mago tɛna kɛ tile yeelen na tile fɛ, i mago tɛna kɛ kalo yeelen na su fɛ, nka Matigi na kɛ i ka kɛnɛyeelen banbali ye, i ka Ala na kɛ i nɔɔrɔ ye.
[20] I ka tile tɛna bi, i ka kalo tɛna don dibi la, k'a masɔrɔ Matigi na kɛ i ka kɛnɛyeelen ye tuma bɛɛ, o na kɛ i ka su kasi bannen ye.
[21] I ka mɔgɔw bɛɛ na kɛ mɔgɔ tilennenw ye. U na sigi jamana kɔnɔ k'a kɛ u ta ye badaa. O siya ye ne ka jiri mɔɔnɔbɔlen ye, ne y'a turu. Ne bolo baara nɔ don walisa ne ka bonya.
[22] U la gwa fitinin na jiidi ka kɛ siyaba ye, u la kabila barikantan na jiidi ka kɛ siya barikama ye. Ni o kow dafa tuma sera, ne, Matigi na tɛliya ka o kow kɛ ka u dafa.