[1] Yakuba ka so, aw minw bɛ wele ko Israɛl, aw minw buruju ye Juda ye, aw minw bɛ aw kali Matigi tɔgɔ la, ka Israɛl ka Ala tɔgɔ wele ni jɛlenya ni tilennenya tɛ, aw ka ne lamɛn.
[2] K'a masɔrɔ aw bɛ aw yɛrɛw wele ko dugu senuma mɔgɔw, ko aw jigi dalen bɛ Israɛl ka Ala kan, o min bɛ wele ko Kɛlɛbolow Matigi.
[3] Ko minw tɛmɛnna, ne ye olu jira kabini tuma jan. Ne da ye u fɔ sani u ka kɛ, ne ye u jira, u dafara.
[4] Sabu ne y'a dɔn ko e Israɛl kunkolo ka gɛlɛn, ko i tɔn ka gɛlɛn i ko nɛgɛ bere, i ten bɛ i ko nsiranɛgɛ.
[5] Ne ye o kow fɔ kabini tuma jan, ne ye i kalan u la sani u ka se, walisa i kana a fɔ ko, i ka boliw ye nin kɛ, ko i ka bato fɛn jirimaw ni nɛgɛ yeelelen jaw ye nin kow bɛɛ fɔ.
[6] I ye ne ka ko fɔlenw mɛn, u bɛɛ dafalen filɛ. Ayiwa sisan, i yɛrɛ tɛna o kow fɔ wa? K'a daminɛ bi la ne bɛ fɛn kuraw jira i la, minw dogolen don, i tun ma minw dɔn fɔlɔ.
[7] Olu bɛna kɛ sisan, u ma deli ka kɛ, i tɛna u dɔn sani u don ka se, walisa i kana a fɔ ko: «Ne ye u dɔn ka kɔrɔ.»
[8] I ma sɔn ka lamɛnni kɛ, i ma sɔn ka foyi faamu, i tulo ma sɔn ka foyi mɛn. Ne y'a dɔn ko i ye janfanci ye tuma bɛɛ, kabini i bange tuma, i bɛ wele ko murutilen.
[9] Ne na ne ka dimiyaba dabila ne tɔgɔ kosɔn. Ne nɔɔrɔ kanuya kosɔn, ne na sabali ka muɲu aw ko la, walisa aw kana halaki ka ban.
[10] A filɛ, ne ye i kɔrɔbɔ ka i saniya, nka o ma kɛ i ko warijɛ bɛ kɔrɔbɔ cogo min na. Ne ye i kɔrɔbɔ tɔɔrɔba tasuma la.
[11] Ne b'a kɛ ne yɛrɛ kelenpe kosɔn, ne ka kanuya kosɔn, k'a masɔrɔ ne tɛ sɔn ne tɔgɔ ka tiɲɛn. Bonyaba min bɛ ne kan, ne tɛna o di dɔ wɛrɛ ma.
[12] Yakuba, i ka ne lamɛn, ne ye e min wele ko Israɛl. Ne ye fɔlɔ ni laban ye.
[13] Ne yɛrɛ bolo ye dugukolo ju sigi, ne kininbolo ye sankolow fɛnsɛ. Ne y'u wele, u bɛɛ yera ɲɔgɔn fɛ.
[14] Aw bɛɛ ka ɲɔgɔn lajɛ ka ne lamɛn. Jɔn bɛ aw cɛma min ye nin kow fɔ sani u ka se? Matigi bɛ min kanu, o na nin kɛwalew kɛ Babilonɛkaw la ka dafa. A na a bolo kɔrɔta Kaldekaw kama.
[15] Ne kɔni, ne yɛrɛ kumana k'a wele. Ne y'a lana, a ka kow bɛɛ na ɲɛ.
[16] A' ye gɛrɛ ne la ka nin lamɛn. Ne ma kuma dogo la kabini fɔlɔfɔlɔ. Kabini o kow kɛ tuma la, ne tun bɛ yen. Nka sisan, Matigi Ala ye a Ni di ne ma ka ne ci.
[17] Matigi, i Kunmabɔbaa, Israɛl ka Senuma ko: «Ne ye Matigi, i ka Ala ye, min ye i kalan i nafa kama, ka i kalan i taa sira la.
[18] Ni i tun ye i janto ne ka ci fɔlenw na, i ka hɛrɛ tun na woyo i ko baji, i tun na jiidi i ko kɔgɔji kuruw.
[19] I bɔnsɔn tun na caya i ko cɛncɛn, i denw tun na caya i ko cɛncɛnkisɛw. I tɔgɔ tun tɛna ban wala ka jɔsi ka bɔ ne ɲɛ kɔrɔ.»
[20] Aw ka bɔ Babilonɛ. Aw ka boli ka mabɔ Kalde jamana la. Aw ka o kibaru welewele da ni ɲagalikan ye, k'a kibaru lase fo dugukolo dan na. Aw k'a fɔ ko Matigi ye a ka jɔnkɛ Yakuba kunmabɔ.
[21] A ye u ɲɛ minɛ kungokolon jintan kɔnɔ, minnɔgɔ ma u minɛ. A ye ji woyo ka bɔ fara la, a ye farakurun cɛ ci, ji woyora ka bɔ a la.
[22] Matigi ko: «Hɛrɛ si tɛ mɔgɔ juguw ye.»