[1] Sion, i ka kunun. I ka kunun, ka barika don i la. Jerusalɛm, dugu senuma, i ka i ka jamadon finiw don i la. K'a masɔrɔ mɔgɔ bolokobali ni mɔgɔ nɔgɔlenw si tɛna don i kɔnɔ tun.
[2] Jerusalɛm, i ka i yuguyugu ka i ka buguri bɔ i la ka wuli ka i sigi i ka yɔrɔ la. Sion denmuso, jɔnya juru min bɛ i kan na, i ka o foni.
[3] K'a masɔrɔ Matigi ko: «Aw kɛra jɔnw ye k'a sɔrɔ wari ma bɔ aw la, aw na kunmabɔ ni wari tɛ fana.»
[4] Matigi Ala ko: «Ne ka mɔgɔw taara u sigi Misira ka kɔrɔ. O kɔ, Asirikaw ye u tɔɔrɔ k'a sɔrɔ kun t'a la.»
[5] Matigi ko: «Ayiwa, ne dun ka mun kɛ sisan? K'a masɔrɔ ne ka mɔgɔw minɛna ni tilenbaliya ye ka taa jɔnya la. Minw ye u mara, olu bɛ se sɔrɔli ɲagalikan bɔ. Ne tɔgɔ bɛ lagosi don o don.
[6] O de kosɔn ne ka mɔgɔw na ne tɔgɔ dɔn. Ɔwɔ, u n'a dɔn o don na ko ne y'a fɔ u ye ko: ‹Ne filɛ.›»
[7] Mɔgɔ min bɛ na ni kibaru duman ye, ka hɛrɛ ko welewele da, ka fɛn ɲuman kibaru duman fɔ, ka kisili ko welewele da k'a fɔ Sion ye ko: «I ka Ala bɛ masaya la,» o tigi natɔ cɛ ka ɲi kuluw kan.
[8] An tulo ye aw ka kɔlɔsilikɛlaw kan mɛn, u bɛ pɛrɛn ka ɲagalikan bɔ ɲɔgɔn fɛ, k'a masɔrɔ u yɛrɛw ɲɛ ye Matigi dontɔ ye Sion dugu kɔnɔ.
[9] Jerusalɛm yɔrɔ tiɲɛnnenw, aw ka ɲagalikanba bɔ, k'a masɔrɔ Matigi ye a ka mɔgɔw dusu saalo, ka Jerusalɛm kunmabɔ.
[10] Matigi y'a ka sebaaya n'a ka senuya welewele da siyaw bɛɛ cɛma. Minw sigilen bɛ dugukolo dan na, olu bɛɛ ɲɛ na an ka Ala ka kisili ye.
[11] Aw ka bɔ u cɛma, aw ka bɔ u cɛma, aw ka wuli ka bɔ yen. Aw kana maga fɛn nɔgɔlen si la, aw ka bɔ Babilonɛ. Aw minw bɛ Matigi ka minanw doni, a' ye aw saniya.
[12] Aw tɛna tɛliya ka bɔ yen, aw bolitɔ tɛna bɔ yen, katuguni Matigi na aw ɲɛ minɛ, Israɛl ka Ala na taama aw kɔ fɛ.
[13] Ne ka jɔnkɛ na kɔrɔta, a na bonya, a ka kɛtaw na ɲɛ, a ka masaya na sabati.
[14] Mɔgɔ caman kabakoyara a ko la, a ɲɛda cogo tiɲɛnna fo mɔgɔw m'a dɔn. A ni mɔgɔ tɔw cogo tun tɛ kelen ye.
[15] Siya caman na ɲagali a kosɔn. Masakɛw na u daw tugu a ɲɛ kɔrɔ, k'a masɔrɔ ko min tun ma lakali, u na o ye. U ma deli ka ko min mɛn, u na o faamu.