[1] A to ne ka dɔnkili da ne ka kanulen ye a ka rezɛn nakɔ ko la. Ne ka kanulen ka rezɛn nakɔ tun bɛ tintin hinɛma kan.
[2] A ye o sɛnɛ ka kabakurunw cɛ ka bɔ yen ka rezɛn sun ɲuman ɲuman turu yen. A ye kɔlɔsili so jan jɔ a cɛmancɛ la ka rezɛn ji bɔ yɔrɔ sen a kɔnɔ. A jigi tun b'a kan ko a ka rezɛn sun na den ɲuman kɛ, nka o ye rezɛnden jugu kɛ.
[3] Ayiwa sisan Jerusalɛmkaw ni Juda mɔgɔw, ne bɛ aw deli ko aw ka kiri tigɛ ne ni ne ka rezɛn nakɔ cɛ.
[4] Ne tun ka kan ka mun wɛrɛ kɛ ne ka rezɛn nakɔ ye ni ne ma o kɛ? Ne jigi tun b'a kan ko a na rezɛnden ɲuman kɛ tuma min na, mun kosɔn a ye rezɛnden jugu kɛ?
[5] Ayiwa, ne na min kɛ ne ka rezɛn nakɔ la, ne na o fɔ aw ye sa. Ne na a lamini sinsan bɔ yen, a na tiɲɛn. Ne na a lamini kogo ci, u na a cɔngɔ u sen kɔrɔ.
[6] Ne na a tiɲɛn, a kɛrɛla bolow tɛna tigɛ. A tɛna sɛnɛ tun nka nwɔniw ni nɔnfɔn nwɔniw na wuli a kɔnɔ. Ne n'a fɔ sanfin ye ko a kana sanji lana a kɔnɔ tun.
[7] Ayiwa, Kɛlɛbolow Matigi ka rezɛn nakɔ ye Israɛl bɔnsɔn ye. Juda mɔgɔw ye a ka rezɛn sun ɲuman ɲuman turulen ye. A jigi tun b'a kan ko a na tiɲɛ kow kɛ, nka a filɛ, joli bɔnna. A jigi tun b'a kan ko u na tilennenya kow kɛ, nka a filɛ, mɔgɔ degunnenw kasikan bɔra yen.
[8] Aw la mɔgɔ minw bɛ du caman jɔ ka foro caman san fo mɔgɔ wɛrɛ tɛ yɔrɔ si sɔrɔ jamana kɔnɔ u dama kɔ, bɔnɛ bɛ olu ye.
[9] Kɛlɛbolow Matigi ye nin kumaw lase ne tulo ma, ko: «Siga t'a la, nin so caman na ci. O soba ɲumanw lankolon na to jamana kɔnɔ. Mɔgɔ si tɛna sigi u kɔnɔ tun.
[10] Rezɛn nakɔ min bɛ taari fila bɔ, o rezɛn ji bɔlen tɛna tɛmɛn litiri binaani kan. Bɔrɛ duuru danni si dannen suman tigɛlen tɛna tɛmɛn bɔrɛ tilancɛ kan.»
[11] Mɔgɔ minw bɛ soli ka wuli ka taa minni fɛn farinma min ka mɛn u ɲɛna su fɛ ka u ɲɛnamini, bɔnɛ bɛ olu ye.
[12] U bɛ nkɔni ni dunun ni ntama fɔ ka file fyɛ u ka minni kɛ yɔrɔw la ka u ɲɛnajɛ, nka u tɛ miiri Matigi ka kɛwalew la. U tɛ a bolo baara nɔ si lajɛ.
[13] O de kosɔn ne ka mɔgɔw na cɛ ka taa jɔnya la, siga t'a la. U la mɔgɔ tɔgɔbaw na sa kɔngɔ fɛ, minnɔgɔ na o jamana kɔnɔ mɔgɔw tɔɔrɔ.
[14] O de kosɔn lahara dugu da bonyara, a bɛ a da waa ka dama tɛmɛn. Sion nɔɔrɔ ni a ka nafoloba ni a ka jama mankanba ani a ka ɲagali, olu bɛ jigin a kɔnɔ.
[15] Ayiwa, mɔgɔ bɛɛ na bi, mɔgɔbaw na majigin, kuncɛbaw kun na suuli.
[16] Kɛlɛbolow Matigi na a yɛrɛ jira ni bonya ye kiri don na. Ala senuma na a ka senuyaba jira tilennenya kow fɛ.
[17] Sagadenw hakili sigilen na bin ɲimi u gɛn yɔrɔw la. Dunanw na fɛntigiw ka foro la fɛnw bɛɛ dumu.
[18] Mɔgɔ minw bɛ u ka tilenbaliya kow sama u nɔ fɛ ni nkalon ye i ko jurukisɛ, ka jurumu sama u nɔ fɛ i ko wotoro, bɔnɛ bɛ olu ye.
[19] U ko: «Ala ka tɛliya ka na a ka kɛwalew kɛ joona walisa an ka a ye. Ko Israɛl ka Senuma k'a ka ci kɛ walisa an k'a dɔn.»
[20] Mɔgɔ minw bɛ ko jugu wele ko ɲuman ka ko ɲuman wele ko jugu, ka dibi kɛ kɛnɛ ye ka kɛnɛ kɛ dibi ye, ka fɛn duman kɛ fɛn kunaman ye ka fɛn kunaman kɛ fɛn duman ye, bɔnɛ bɛ olu ye.
[21] Mɔgɔ minw ye hakilitigi ye u yɛrɛw ɲɛ na, ni u bɛ u yɛrɛw jate ko dɔnnaw ye u ka hakilitigiya kosɔn, bɔnɛ bɛ olu ye.
[22] Mɔgɔ minw bɛ u yɛrɛw jija ka diwɛn min, minw bɛ minni fɛn farinma sifa caman kolonso ka u yɛrɛw fariya,
[23] ni u bɛ jo di jalakitigi ma surɔ fɛn kosɔn, ka ban ko tilennenw kɛli ma, bɔnɛ bɛ olu ye.
[24] Tasuma bɛ bin ɲaga ni bin jalen jeni cogo min na, o cogo la o tigiw diliw na kɛ i ko u tolilen don, u feere na taa gwangwan la fiɲɛ fɛ, k'a masɔrɔ u banna Kɛlɛbolow Matigi ka sariya ma. U ye Israɛl ka Senuma ka kuma mafiɲɛya.
[25] O de kosɔn Matigi diminna a ka mɔgɔw kɔrɔ, a ye a bolo mɔɔnɔbɔ u kama ka u gosi. Kuluw yɛrɛyɛrɛla, mɔgɔ suw kɛra i ko ɲamaɲaman dugu bɔlɔnw na. Halio, a ka dimiya ma mada u ta fan fɛ, a bolo mɔɔnɔbɔlen tora u kama.
[26] Matigi na a ka darapo turu ka siyaw wele ka bɔ yɔrɔ janw na. A na mɔgɔw wele ka bɔ dugukolo danw na ni a dala file fyɛkan ye. U bɛɛ bɛ tɛliya ka na joona.
[27] U si tɛna sɛgɛn, u tɛna talon, u si tɛna jingɔ ka sunɔgɔ. U si ka cɛ sirilan tɛna foni, u ka sabara juruw tɛna tigɛ.
[28] U ka biɲɛkisɛw nun bɔlen don, u bɛɛ ka kalaw samanen don. U ka yɛlɛnkan sow ntɔrɔn ka gɛlɛn i ko kɛrɛbɔ fara, u ka wotoro senw bɛ i ko fununfunun.
[29] U bɛ mankan bɔ i ko waraba muso konbokan, u bɛ mankan bɔ i ko waraba kamalenw. U bɛ konbokan bɔ ka sogo minɛ ka taa n'a ye, tilabaa t'a la.
[30] O don na u na mankan bɔ Juda kun na i ko kɔgɔji mankanba. Ni mɔgɔ ye o jamana filɛ, a tɛna foyi ye dibi ni ɲɛni kɔ. Sankolola kɛnɛ na dibi.