[1] E ni i tun kɛra ne balimakɛ ye, min ye ne ba sin min. Ni ne tun ye i ye kɛnɛma, ne tun na i da susu, mɔgɔ tun tɛna ne mafiɲɛya.
[2] Ne tun na i bolo minɛ ka taa ni i ye ne ba ka so kɔnɔ, e tun na ne kalan. Ne tun na diwɛn di i ma i k'a min, fɛn suma dumanw b'a la, ne ka gerenatiden ji kɔni.
[3] Ne kunkolo ka da a numanbolo la, a kininbolo ka meleke ne la.
[4] Jerusalɛm musow, ne bɛ aw deli, aw kana o kanulen lawuli, aw kana a lakunun fo a ka diya a ye.
[5] Muso min natɔ don ka bɔ kungokolon kɔnɔ, ni a sɛmɛlen bɛ a ka kanulen na, o ye jɔni ye? I bange tuma la, tin ye i ba minɛ, a ye i bange pome sun kɔrɔ, ne ye i lakunun yen.
[6] I ka ne ko to i kɔnɔ i ko taamashyɛn nɔrɔlen, i ko taamashyɛn nɔrɔlen i bolo la. Kanuya fanga bɛ saya fanga bɔ, keleya ka jugu i ko lahara. A manalen funteni bɛ i ko tasuma funteni, Matigi ka tasuma mana yɛrɛ.
[7] Ji caman tɛ se ka kanuya dufa. Ji woyoba tɛ se ka a tunun. Ni mɔgɔ ye a ka so kɔnɔ nafolo bɛɛ di walisa kaanuya sɔrɔ, a tɛ foyi sɔrɔ ni mafiɲɛyali tɛ.
[8] Dɔgɔmuso dɔ bɛ an fɛ, a kɔgɔ ma fa fɔlɔ. Ni mɔgɔ dɔ ye an dɔgɔmuso maminɛ don min na, an na mun kɛ a ye?
[9] Ni an balimamuso kɛra kogo ye, an na sankanso jɔ a kan ni warijɛ ye. Ni a kɛra donda ye, an na a da tugu ni sedere jiri fɛrɛnw ye.
[10] Ne ye kogo ye, ne sinw bɛ i ko so janw. Ne ye hɛrɛ sɔrɔ ne ka kanulen ɲɛ kɔrɔ.
[11] Rezɛn nakɔ tun bɛ Solomani fɛ Bal-Hamon, a ye a ka nakɔ to a kɔlɔsibaaw bolo. A mɔ karibaaw bɛɛ kelen-kelen bɛ warijɛ waa kelen sara a mɔ kosɔn.
[12] Solomani, warijɛ waa kelen ye i ta ye, warijɛ kɛmɛ fila-fila na kɛ a mɔ kɔlɔsibaaw ta ye. Ne ka rezɛn nakɔ, ne yɛrɛ yɛrɛ ta, ne bɛ o mara.
[13] E min sigilen bɛ nakɔw kɔnɔ, i tɔɲɔgɔnw tulow bɛ i kan mɛn. A to ne ka i kan mɛn.
[14] I ka boli ka na, ne ka kanulen. I ka kɛ i ko minan wala sɔnden bolitɔ suma diyalan kuluw kan.