[1] Song-chú án-ngiòng kóng: “Thiên he Ngài ke pó-chho, thi he Ngài ke tha̍p-ten. Ngì-têu oi chhai nai-vi vi Ngài hí sṳn-thien nè? Nai-vi oi cho Ngài hiû-sit ke só-chhai nè?
[2] Ngài chhîn-sú chhóng-chho yí-chhiu van-vu̍t, pûn yit-chhiet chhùn-chhai! Ngài khon-ku khiâm-pî lâu chṳ̂n-sîm fí-kói ke ngìn, ya pó-fu kin-vi thâng-chhiùng Ngài fa ke ngìn.
[3] “Chúng-he ke chhṳ̀ ngiù-è cho sên-ngì, yu hi chhṳ̀ ngìn ke; ke hien se yòng-è, yu chhṳ̀ kiéu-è lòi hien-chi ke; ke hien su-chi, yu hien chû-hiet ke; ke sêu nen-hiông, yu hi pai ngiéu-siong ke; kì-têu sién chhṳ-kâ ke lu, sîm-tú fôn-hí só-cho chit-ok ke sṳ.
[4] Só-yî, Ngài oi thi̍t-phe̍t kong-hâ kì-têu chui-kiâng ke châi-fo. Yîn-vi Ngài ham kì-têu, kì-têu m̀ en; Ngài lâu kì-têu kóng-fa, kì-têu m̀-thâng; Ngài khon-cho fái ke sṳ, kì-têu fán-chón hi hàng; Ngài só-nâu ke sṳ, kì-têu phiên-phiên tông-hau.”
[5] Kin-vi thâng-chhiùng Song-chú ke ngìn â, ngì-têu oi thâng Kì ke fa. Kì kóng: “Yîn-vi Ngài ke miàng ke yèn-ku, ngì-têu ke thùng-pâu tông-chûng yû-têu ngìn lòi-hen ngì-têu, kiuk ngì-têu chéu. Kì-têu seu ngì-têu kóng: ‘Chhiáng ngì-têu ke Song-chú hién-chhut Kì ke ví-thai, sṳ́ ngài-têu khon-chhut ngì-têu voi yû kit fôn-hí!’ Chúng-he kì-têu fán-chón voi chhin kien-seu!
[6] Thâng â! Sàng-tú yû chhàu-nau ke sâng-yîm, he tui sṳn-thien fat chhut-lòi ke, he Song-chú po-yin sù-thi̍t ke sâng-yîm!
[7] “Ngài ke sṳn-sàng chhiu-chhiong yit-ke màng kîn-ko chhṳn-thung fut-yèn chhiu kiung lai-é ke fu-ńg;
[8] ngì-têu kám sṳt thâng-ko ya-he khon-ko án khì-meu ke sṳ? Yû nai-ke koet-kâ he chhai yit-ngit nui, yit-ha-é chhiu kiung chhut-lòi? Chúng-he Siak-ôn chhiong màng thung-tó chhiu kiung chṳ́-ńg án-ngiòng kien-li̍p hí-lòi lé.
[9] Ngài kám voi pûn kì sán-khì yí-kîn to hàn kiung m̀ chhut-lòi?” Song-chú án-ngiòng kóng lé.
[10] Ngì-têu oi lâu Yâ-lu-sat-lâng khiung-ha fôn-hí khoai-lo̍k! Só-yû siak liá-sàng ke ngìn yin-kôi vi kì fôn-hí! Ngì-têu sṳt vi kì pî-sông ke ngìn, liá-ha oi lâu kì khiung-ha fôn-hí khoai-lo̍k!
[11] Ngì-têu oi fôn-hí hióng-su kì ke fàn-yùng, chhiu-chhiong ô-nga-é chhai â-mê ôn-ví ke hiûng-chhièn sṳ̍t-nen sṳ̍t-to páu-páu.
[12] Song-chú án-ngiòng kóng: “Ngài oi sṳ́ kì tet-tó phìn-ôn chhiong chhòng liù-súi; tet-tó van-koet ke chhòi-fu chhiong thai-súi liù-to kì ke-vi. Ngì-têu voi chhiong yit-ke â-mê vi sṳ̍t-nen ke se-ngìn-è, pûn â-mê nám chhai fài-chûng, piong chhai chhit-thèu táng lòi siak.
[13] Ngài oi chhai Yâ-lu-sat-lâng ôn-ví ngì-têu, chhiong â-mê ôn-ví chhṳ-kâ ke se-ngìn-è.
[14] Ngì-têu khon-tó liá só-yû ke sṳ fat-sên ke sṳ̀, ngì-têu ke sîm voi fôn-hí khoai-lo̍k; ngì-têu ke kut-thèu voi tet-tó chṳ̂-yun, chhiong nun-chhó chiâng hí-lòi. Ke-sṳ̀, ngì-têu chhiu voi tî Ngài — Song-chú chhîn-sṳ̂n pông-chhu Ngài ke-têu phu̍k-ngìn; chúng-he Ngài oi tui Ngài ke thi̍t-ngìn fat-khién.”
[15] Khon nâ, Song-chú chhai fó-chûng kong-lìm; Kì ke-têu chan-chhâ chhiong liùng-kién-fûng, tai-lòi Kì ke thai fat-khién, yung thai-fó chit-fa̍t kì-têu.
[16] Song-chú oi yung fó lâu kiam chit-fa̍t só-yû fam-chhui ke ngìn; pûn Song-chú chhṳ̀-sí ke ngìn chhin-tô.
[17] Song-chú kóng: “Ke-têu chhṳ-kâ kóng he fûn-phe̍t vì-sṳn, kiet-chhiang chhṳ-kâ, phài-tén to ‘sṳ̀n-sṳn fâ-yèn’ hi sṳ̍t chû-ngiuk, ló-chhú ngiuk, lâu khì-thâ mò chhiang-li sṳ̍t-vu̍t ke ngìn, kì-têu ke ma̍t-ngit to lé.
[18] Ngài tî kì-têu ke hàng-vì lâu sióng-fap. Ngài oi lòi seu-si̍p van-koet van-chhu̍k; kì-têu chhi-si̍p chhièn-lòi ke sṳ̀, chhiu voi khon-tó Ngài ke yùng-kông.
[19] Ngài oi chhai kì-têu tông-chûng hàng sṳ̀n-chiak, chit-fa̍t kì-têu. “Chúng-he, Ngài oi tui chhûn hâ-lòi ke ngìn tông-chûng, phai-ngìn to tak-koet lâu yén-yén ke hói-tó hi; ke-têu só-chhai chhṳ-chhiùng m̀-sṳt yû-ngìn thâng-ko Ngài ke miàng, mò-ngìn khon-ko Ngài ke yùng-kông. Ngài oi phai chhûn hâ-lòi ke ngìn to Thâ-sṳ̂, Li-pí-â, ya yû tông-voi sa-chien ke Lî-tí-â, Thú-pâ, lâu Hî-lia̍p hi. Kì-têu voi chhai lie̍t-koet chûng siên-yòng Ngài ke yùng-kông.
[20] Chón-lòi ke sṳ̀, kì-têu voi tui tak-koet tai-chón ngì-têu ke thùng-pâu, cho hien-pûn Ngài ke lî-vu̍t. Kì-têu tai chón-lòi ke ngìn khì-tén mâ-é, lì-è, lo̍k-thò, chhô chan-chhâ lâu khieu-é to Ngài ke sṳn-sân — Yâ-lu-sat-lâng, chhiu-chhiong Yî-set-lie̍t-ngìn nâ chhiang-li ke hi-mén to Ngài ke sṳn-thien hi-hien su-chi khiung-yong.
[21] Ngài oi sat-li̍p kì-têu tông-chûng yû-têu ngìn cho chi-sṳ̂ lâu Li-vi-ngìn.”
[22] Song-chú kóng: “Chhiu-chhiong Ngài chhóng-chho ke sîn-thiên sîn-thi yún-kiú chhòng-chhùn, ngì-têu ke chṳ́-sûn lâu ngì-têu ke miàng ya voi chhòng-chhòng kiú-kiú liù-chhòn.
[23] Tak-chak ngie̍t chhû-yit lâu ôn-sit-ngit, phû-thiên-ha ke ngìn chhiòn-phu voi to Yâ-lu-sat-lâng lòi kin-pai Ngài.” Song-chú án-ngiòng siên-pu lé.
[24] “Kì-têu chhut-hi ke sṳ̀, voi khon-tó ke-têu phoi-ngia̍k Ngài ke ngìn ke sṳ̂-thí. Sṳ̍t kì-têu sṳ̂-thí ke chhùng-è yún-yén m̀-voi sí; sêu kì-têu ke fó yún-yén m̀-voi vû-thet; phû-thiên-ha ke ngìn chhiòn-phu voi nâu kì-têu.”