[1] Vû-sî-ngâ, Yok-thán, Â-ha̍p-sṳ̂ lâu Hî-sî-kâ cho Yù-thai-vòng ke sṳ̀, Â-mô-sṳ̂ ke lai-é Yî-soi-â khon-tó yû-koân Yù-thai lâu Yâ-lu-sat-lâng ke yi-siong.
[2] Song-chú kóng: “Thiên nâ, thi â, chhiòn-phu lòi thâng! Ngài chhîn-chhṳ fù-yông thu-thai ke chṳ́-ńg fán-chón phoi-ngia̍k Ngài.
[3] Ngiù ngin-sṳt chú-ngìn, lì-è tî chú-ngìn vi kì ke chhò; chúng-he Ngài ke chṳ́-mìn Yî-set-lie̍t m̀ ngin-sṳt Ngài, m̀ hiáu-tet sióng!”
[4] Hái! Fam-chhui ke koet-kâ, chhui-ok tông-chhûng ke ngìn-mìn, cho fái-sṳ ke chúng-lui, phai-fái ke chṳ́-ńg! Ngì-têu khî-chhie̍t Song-chú, méu-sṳ Yî-set-lie̍t sṳ̀n-sṳn ke Song-ti; ngì-têu lâu Kì kín lòi kín sâng-sô.
[5] Ngì-têu cho-má-ke kín phoi-ngia̍k nè? Ngì-têu só su ke chit-fa̍t hàn m̀-la mò? Yî-set-lie̍t â, ngì-têu yí-kîn kûi thèu-nà chho̍k-sông, mân-sîm sôi-ngio̍k.
[6] Tui-thèu to-kiok, mò yit-te hó, kûi-sṳ̂n vû-chhiâng, chhiòn-phu mièn-mièn. Mò-ngìn lâu ngì-têu sé-chhiang, pâu-hó, ya mò-ngìn vi ngì-têu kò yo̍k-é.
[7] Ngì-têu ke thú-thi fông-fi; sàng-sṳ pûn-fó sêu-thet. Ngì-têu khon-tén ngì-têu ke thièn-thi pûn ngoi-chhu̍k ngìn chhîm-cham, pho-fái, yí-kîn fông chhiang-chhiang.
[8] Chṳ́-yû chhûn-tó Siak-ôn-sàng, lièn kì ya pûn-ngìn vì-khun, chhiong phù-thò-yèn tú ke màu-liàu, chhiong koâ-thièn chûng ke chhó-liàu, mò má-ke ôn-chhiòn.
[9] Na m̀-he Song-chú — Van-kiûn ke Ngièn-soi vi ngài-têu liù-têu ngìn ke sin-miang, ngài-têu chó chhiu-chhiong Só-tô-mâ lâu Ngò-mô-lâ án-ngiòng fí-me̍t lé.
[10] Yâ-lu-sat-lâng â, ngì-têu ke kôn-chóng lâu ngìn-mìn chhiu-chhiong Só-tô-mâ lâu Ngò-mô-lâ ke ngìn án-fái. Ngì-têu oi thâng Song-chú ke fa, oi liù-sîm thâng ngài-têu Song-ti ke kau-sṳ.
[11] Song-chú kóng: “Ngì-têu hien án-tô ke chi-vu̍t tui Ngài yû má-ke li-yit nè? Ngì-têu só-hien sêu-fa-chi ke yòng lâu phì thèu-sâng ke yù, Ngài yí-kîn la lé. Ngì-têu só-hien ke ngiù, yòng lâu sân-yòng ke hiet, Ngài chhiòn mò fôn-hí.
[12] Ngì-têu kin-pai Ngài ke sṳ̀, má-ngìn lâu ngì-têu thó liá-têu thèu-sâng nè? Má-ngìn ham ngì-têu án-ngiòng cho lòi châu-tha̍p Ngài ke sṳn-thien nè?
[13] M̀-hó chai hien ke-têu chhiòn mò yi-sṳ ke chi-vu̍t! Ngài mò-oi chai phi ngì-têu só-sêu ke hiông; Ngài tông-nâu ngì-têu chhû-yit, ôn-sit-ngit lâu chûng-kau ke chhi-fi, yit-phién fam-chhui, yit-phién chhi-fi, Ngài sṳ̍t-chhai mò phan-fap ngiûn-su.
[14] Ngài tông-nâu ngì-têu chhû-yit ke chi-vu̍t lâu kok-chúng chûng-kau ke chiet-khì; kì-têu sàng-cho Ngài ke chhûng-tâm, Ngài mò-oi chai pà lé.
[15] “Ngì-têu khià-sú khì-tó, Ngài mò-oi khon; mò-lun ngì-têu khì-tó kí-tô, Ngài chhiòn-phu mò-oi thâng; yîn-vi ngì-têu sûng-sú hiet chit-chit.
[16] Ngì-têu oi chiông chhṳ-kâ sé chhiang-li, m̀-hó pûn Ngài chai khon-tó ngì-têu fam-chhui, m̀-hó chai cho fái-sṳ!
[17] Ngì-têu oi ho̍k-si̍p cho hó-sṳ, sṳ̂n-chông chṳn-ngi, pông-chhu pûn-ngìn khî-fu ke, vi kû-yì sṳ̂n-yên, vi koá-fu phien-fu.”
[18] Song-chú kóng: “Lòi â, ngài-têu lòi lî-lun! Sûi-yèn ngì-têu ke chhui chhiong chû-fùng, voi pien-chhiong siet án-pha̍k. Sûi-yèn ngì-têu ke chhui chhiong yên-chṳ̂, voi pien-chhiong yòng-mô án-pha̍k.
[19] Na-he ngì-têu ngien-yi fu̍k-chhiùng Ngài, chhiu nèn sṳ̍t thi-song mî-hó ke sán-vu̍t.
[20] Na-he ngì-têu khî-chhie̍t Ngài, phoi-ngia̍k Ngài, chhiu oi pûn tô-kiam chhṳ̀-thet. Ngài he Song-chú, Ngài án-ngiòng siên-pu.”
[21] Liá sàng pún-lòi he chûng-chṳ̂n ke, ngióng-voi pien-cho kî-ńg! Thèu-pái he̍t-tén ke chhiòn-phu he kûng-phìn chṳn-chhṳ̍t ke ngìn-mìn, liá-ha chṳ́-yû hiûng-sú.
[22] Yâ-lu-sat-lâng â, ngì sṳt chhiong sùn-ngiùn, liá-ha pien-cho chha̍p-chṳt; ngì sṳt chhiong mî-chiú, chúng-he liá-ha chhâm-tó súi.
[23] Ngì ke kôn-chóng phoi-ngia̍k Ngài, lâu chhe̍t-é khiung-tóng, tak-ke hau nâ put-ngi ke fùng-pâu, ngang-thó lî-vu̍t; chúng-he m̀ pó-fu kû-yì, ya m̀ thoi koá-fu sṳ̂n-yên.
[24] Yîn-vi án-ngiòng, Chṳ-kô ke Song-chú — Van-kiûn ke Ngièn-soi, Yî-set-lie̍t thai-nèn ke Song-ti siên-pu kóng: “Hái! Ngài oi hiong Ngài ke tui-thèu po-fu̍k, hiong Ngài ke sù-thi̍t po-sù!
[25] Ngài oi tui-fu ngì-têu: Ngài oi yung fó yùng-fa ngì-têu, lien-chhiang ngì-têu, oi chhù-thet ngì-têu só-yû ke chha̍p-chṳt.
[26] Ngài oi chhùng-sîn sat-li̍p ngì-têu ke sṳ́m-phan-kôn lâu ku-mun, chhiong thèu-pái khiung-yong. Án-ngiòng, Yâ-lu-sat-lâng chhiu cho-tet chhṳ̂n-cho chṳn-ngi lâu chûng-sṳ̍t ke sàng.”
[27] Siak-ôn voi yîn-vi Song-chú kûng-phìn ke sṳ́m-phan tet-tó chṳ́n-kiu; sàng-tú fí-kói ke ngìn voi yîn-vi Kì ke kûng-ngi tet-tó chṳ́n-kiu.
[28] Chúng-he fam-chhui lâu phoi-ngia̍k ke ngìn Kì oi tá-sui; khî-chhie̍t Song-chú ke ngìn Kì oi sêu-me̍t.
[29] Ngì liá-têu sién thi lòi cho sṳ̀n-sṳn fâ-yèn, yu chiông chung-yi ke siong-su chún sṳ̀n-mìn pai ke ngìn, yit-thin voi tù-tó kien-seu, su vú-yu̍k.
[30] Ngì-têu voi chhiong ya̍p-é châu-thet ke siong-su, chhiong mò súi ke fâ-yèn.
[31] Yû khièn-sṳ ke ngìn voi chhiong ki-sṳ́, kì-têu só-cho ke chhiong fó-fâ; chhiòn-phu voi sêu-to chhiang-chhiang, mò-ngìn nèn kiu kì-têu.