[1] Song-chú kóng: Khon nâ, Ngài ke phu̍k-ngìn, Ngài fù-chhṳ̀ kì; Ngài kién-sién kì, kì he Ngài sîm só fôn-hí ke. Ngài chiông Ngài ke Lìn su-pûn kì; kì oi vi van-koet tai-lòi chṳn-ngi.
[2] Kì m̀-voi chhin-hêm, ya m̀-voi chhàu-nau; kì m̀-voi chhai kiê-hong thai-sâng kóng-fa.
[3] Chak-fái ke lù-chuk, kì m̀-voi chiông kì áu-thôn; voi vû ke tên-fó, kì m̀-voi chiông kì phùn-thet. Kì oi chûng-sîm chiông chṳn-ngi tai-lòi.
[4] Kì m̀-voi sṳt-mong ya m̀-voi sṳt-chṳ; kì oi chhai thi-song kien-li̍p chṳn-ngi; hói-tó ke ngìn lûng-chúng ngióng-mong kì ke fap-li̍t.
[5] Song-ti chhóng-chho chû-thiên, phû-sat kiûng-chhông; Kì chho thai-thi lâu thi-song só-yû ke sâng-vu̍t; Kì su-pûn ngìn sâng-miang, sṳ́ ngìn voi théu-hi. Chú Song-ti hiong Kì ke phu̍k-ngìn án-ngiòng siên-pu:
[6] Ngài — Song-chú cheu kûng-ngi lòi fû-seu ngì; Ngài voi khiên-tén ngì ke sú, pó-sú ngì. Ngài oi thûng-ko ngì lâu sṳ-kiên-ngìn li̍p-yok; Ngài oi sṳ́ ngì sàng-cho van-koet ke kông.
[7] Ngì oi hi khôi mô-muk ke muk-chû, thu chhô-kâm ke ngìn chhut kâm-ngiu̍k, sṳ́ vû-am thi-lò chûng ke ngìn tet chhṳ-yù.
[8] Ngài he Song-chú, liá he Ngài ke miàng. Ngài thin-chho̍k m̀ chiông Ngài ke yùng-yeu kûi-pûn ká sṳ̀n, ya m̀ chiông oi pûn Ngài ke chhṳ̂n-chan kûi-pûn tiâu-khiet ke ngiéu-siong.
[9] Khon nâ, Ngài só yi-ngièn ke sṳ yí-kîn sṳ̍t-hien. Liá-ha Ngài oi lâu ngì-têu kóng-têu sîn ke sṳ, chhai sṳ fat-sên yî-chhièn, Ngài siên lâu ngì-têu kóng-mìn.
[10] Oi hiong Song-chú chhong yit-sú sîn-kô; chhiòn sṳ-kie oi siung-chan Kì! Thai-hói lâu khì-chûng ke sâng-vu̍t chhiòn-phu oi chan-mî Kì; hói-tó lâu tó-song ke ngìn-mìn chhiòn-phu oi siung-yòng Kì!
[11] Sâ-mo̍k lâu khì-chûng ke sàng-sṳ chhiòn-phu oi thai-sâng chhong-kô; Kî-tha̍t ke ngìn-mìn oi chan-mî Kì; he̍t chhai Sî-lâ ke ngìn chhiòn-phu oi fôn-fû, chhai sân-táng thai-sâng hêm.
[12] Hói-tó ke ngìn-mìn chhiòn-phu oi yùng-kông Song-chú; kì-têu oi siung-chan Kì!
[13] Song-chú chhiong yúng-sṳ chhut-hi siông-chhṳ̀; Kì kiûn-chông chok-hó, kit-thung ngie̍t-sîm hi. Kì thai-sâng chhin-hêm, chhut-chan kûng-kit thi̍t-ngìn.
[14] Song-ti kóng: Ngài yí-kîn chhin-kiú mò chhut-sâng, tiâm-tiâm mò-tap Ngài ke chṳ́-mìn. Liá-ha Ngài oi hàng-thung lé, chhiong kiung-chṳ́ ke fu-ngìn-kâ chhin-miang-é hêm.
[15] Ngài oi sṳ́ thai-se sân-kông fông-fi, sṳ́ chhó-muk khû-châu. Ngài oi sṳ́ hò-pa pien-cho sâ-phû, sṳ́ pî-thòng châu-thet.
[16] Ngài oi thu mô-muk ke chṳ́-mìn, hàng m̀-sṳt hàng ke lu; Ngài oi sṳ́ kì-têu mien-chhièn ke vû-am pien-cho kông-mìn, sṳ́ vân-vat ke lu pien phiàng-phiàng ke thai-lu. Ngài oi sṳ̍t-hien liá-têu sṳ, chhie̍t-tui m̀-voi vok-thet kì-têu.
[17] Ke-têu siông-sin ká sṳ̀n ke ngìn yit-thin voi tá-sû; yí-kho ngiéu-siong ke ngìn yit-thin voi tù-tó kien-seu.
[18] Song-chú kóng: Ngì-têu ngí-lûng ke â, oi thâng! Ngì-têu chhiâng-miâng ke â, oi khon!
[19] Sṳ-song yû má-ngìn pí Ngài ke phu̍k-ngìn hàn-kha chhiâng-miâng? Yû má-ngìn pí Ngài ke sṳ́-chá hàn-kha ngí-lûng? To-tái yû má-ngìn pí Ngài kién-sién ke chṳ́-mìn, Song-chú ke phu̍k-ngìn hàn-kha chhiâng-miâng?
[20] Yî-set-lie̍t â, ngì khon-ko chhin-tô, chúng-he khon m̀ chhîn-chhú; ngì thâng-ko chhin-tô, chúng-he thâng mò liáu-kié.
[21] Song-chú yit-sîm oi sṳ̂n-chông chṳn-ngi; Kì fôn-hí sṳ́ fap-li̍t tet-tó chûn-chhung, fat-yòng kông-thai.
[22] Chúng-he Kì ke chṳ́-mìn pûn-ngìn chhióng-kiap; kì-têu pûn-ngìn koân chhai thi-lò tú, pûn-ngìn khong chhai kâm-ngiu̍k chûng. Kì-têu pûn-ngìn chhióng, mò-ngìn kiu; kì-têu pûn-ngìn chok-chéu, mò-ngìn piong kì-têu chón-lòi.
[23] Ngì-têu tông-chûng yû-ngìn oi thâng liá-têu fa mò? Chhiùng-kîm yî-heu voi chu-yi thâng mò?
[24] He má-ngìn chiông Yî-set-lie̍t kâu-pûn chhîm-lio̍k-chá? He má-ngìn chiông Ngâ-kok kâu-pûn chhióng-kiap ke ngìn? Kám m̀-he Song-chú, yîn-vi ngài-têu chhiòn-phu tet-chhui Kì. Ngài-têu m̀-hén hàng Kì ke tho-lu; ngài-têu mò chûn-sú Kì ke fap-li̍t.
[25] Só-yî, Kì hiong ngài-têu thai fat-khién, sṳ́ ngài-têu su-tó chan-chên ke thung-khú. Chan-chên vì-khun ngài-têu, ngài-têu hàn-he mò ho̍k-tó kau-hiun; lie̍t-fó sêu-tó ngài-têu, ngài-têu hàn-he mò pan-tiám kám-kok.