[1] Siak-ôn â, hong hí-lòi! Chai kiên-khiòng hí-lòi! Yâ-lu-sat-lâng sṳn-sàng â, chiông ngì kô-kui ke sâm-fu chok hí-lòi! Mò su kot-lî, mò chhiang-li ke ngìn m̀-voi chai ngi̍p ngì ke sàng-mùn lé.
[2] Yâ-lu-sat-lâng â, phat-chhiang chhṳ̀n-fôi! Hong hí-lòi, to-chón-hi chhô ngì ke pó-chho! Siak-ôn pûn-ngìn chok-chéu ke ngìn-mìn â, kié-khôi thak-tén ngì kiáng-kîn ke só-lien!
[3] Song-chú tui Kì ke chṳ́-mìn án-ngiòng kóng: “Ngì-têu pûn-ngìn mai-cho nù-chhòi, mò-ngìn fu thoi-ka pûn ngì-têu; khiung-yong, ngì-têu tet chhṳ-yù ya m̀-sṳ́ fu-chhièn.
[4] Ngì-têu thèu-pái to Âi-khi̍p chhiam-he̍t he chhṳ-ngien ke; heu-lòi Â-sut-ngìn yung vú-li̍t chiông ngì-têu chok-hi, yit-ke ngiùn ya mò fu-pûn ngì-têu.
[5] Liá-ha, chhai Pâ-pí-lùn fat-sên khiung-yong ke sṳ. Ngì-têu he vù-yèn vù-ku pûn-ngìn chok-hi ke ngìn; kì-têu pin-mò fu má-ke kûng-chhièn pûn ngì-têu. Thúng-chhṳ ngì-têu ke ngìn fî-sòng kiêu-ngau, yit-chhṳ̍t méu-sṳ Ngài ke miàng.
[6] Ngài ke chṳ́-mìn chiông-lòi voi tî Ngài chang he Song-ti, yîn-vi kóng-ko liá-têu fa ke chhiu-he Ngài.”
[7] Ke phàn-sân ko-liâng lòi ke sṳ́-chá, kì ke kiok-chiak hàn-chiâng ô! Kì lòi po hó sêu-sit — chhiu-he fò-phìn ke sêu-sit, tet-kiu ke hó sêu-sit. Kì tui Siak-ôn kóng: Ngì ke Song-ti chóng-khièn lé!
[8] Sàng-táng ke sú-mong-chá voi thai-sâng hêm; kì-têu ya voi khiung-ha thai-sâng fôn-hí chhong-kô! Yîn-vi Song-chú chón-to Siak-ôn ke sṳ̀, kì-têu voi chhîn-muk khon-tó.
[9] Yâ-lu-sat-lâng fông-thet ke só-chhai â, oi thai-sâng hêm, thai-sâng chhong-kô! Song-chú oi kiu-su̍k Kì ke sàng, oi ôn-ví Kì ke chṳ́-mìn.
[10] Song-chú oi chhai van-koet ke mien-chhièn, yung sṳn-sú chṳ́n-kiu Kì ke chṳ́-mìn; phû-thiên-ha ke ngìn chhiòn-phu voi khon-tó ngài-têu Song-ti ke kiu-ên.
[11] Hó lì-khôi lé! Kiak-kiak lì-khôi! Tui Pâ-pí-lùn chhut-lòi! Kông Song-chú sṳn-thien yung-phín ke ngìn â, m̀-hó miâ-tó mò chhiang-li ke tûng-sî! Lì-khôi ke sṳ̀ oi pó-chhṳ̀ sṳn-kiet!
[12] Ngì-têu lì-khôi ke sṳ̀, m̀-sṳ́ chho̍k-kip; ngì-têu m̀-he thò-miang. Song-chú oi chhai thèu-chhièn thu ngì-têu; Yî-set-lie̍t ke Song-ti ya voi chhai heu-poi pó-fu ngì-têu.
[13] Song-chú kóng: Khon â, Ngài ke phu̍k-ngìn chhin-yû chṳ-fi, vàn-sṳ̀n sṳ́-min; kì voi su-ngìn chûn-chhung, tet-tó chui-thai ke kông-yùng.
[14] Chhin-tô khon-tó kì ke ngìn lûng-chúng tông chho̍k-kiâng, mò ngìn ke mien-mau chhiong kì ke án m̀-hó khon, chhâ-m̀-tô m̀-sàng ngìn-hìn.
[15] Yîn-vi án-ngiòng, kì voi sṳ́ chhin-tô koet-kâ ke ngìn chho̍k-kiâng; chhin-tô kiûn-vòng voi kiâng-to êm chhṳ-kâ ke choi. Yîn-vi, kì-têu voi khon-tó chhiùng-lòi m̀-sṳt thâng-ko ke, mìn-pha̍k m̀-sṳt yû-ngìn lâu kì-têu kóng-ko ke sṳ.