[1] Ngì-têu chhám lé! Ngì-têu chṳ-thin mò kûng-phìn ke fap-li̍t lâu ká sṳ́m-phan lòi khî-fu Ngài ke chṳ́-mìn.
[2] Ngì-têu yung liá fông-fap pok-siok khiùng-ngìn ke khièn-li, sṳ́ kì-têu tet m̀-tó kûng-phìn; ngì-têu yung liá fông-fap chhîm-cham koá-fu lâu kû-yì ke sán-ngia̍p.
[3] Song-ti chit-fa̍t ngì-têu ke sṳ̀, ngì-têu oi ngióng-pân chang hó nè? Kì thûng-ko yén-fông ke koet-kâ tai-pûn ngì-têu châi-nan ke sṳ̀, ngì-têu oi ngióng-pân chang hó nè? Ngì-têu oi to nai-vi hi-khiù pông-chhu? Ngì-têu ke chhòi-sán oi khong chhai nai-vi?
[4] Ngì-têu na m̀-he sí chhai chan-chhòng chhiu voi pûn-ngìn chok-chéu. Sûi-yèn án-ngiòng, Song-chú ke su-hi hàn-màng so̍t; Kì hàn-he oi khià-sú tá ngì-têu.
[5] Song-chú kóng: “Ngài yung Â-sut cho kun-é lòi tá ke-têu ngiâ Ngài fat-khién ke ngìn.
[6] Ngài phai Â-sut hi kûng-kit mò kin-vi Song-ti ke koet-kâ lâu ngiâ Ngài fat-khién ke ngìn-mìn. Ngài phai kì-têu hi chhióng-kiap, hi chok-ngìn, hi chien-tha̍p ke-têu ngìn-mìn, chhiong chhio lu-hong ke nài-mòi.”
[7] Chúng-he Â-sut fòng-ti yû kì chhṳ-kâ ke tá-son. Kì kiet-sîm oi sêu-me̍t chhin-tô koet-kâ.
[8] Kì khoâ-khiéu kóng: “Ngài tak-ke ngièn-soi tû cho-tet cho yit-koet ke kiûn-vòng!
[9] Ngài chṳ̂n-fu̍k Kâ-le̍t-nò lâu Kâ-kî-mí-sṳ̂ ke sàng. Ngài chṳ̂n-fu̍k Ha̍p-mâ lâu Â-ngí-pha̍t ke sàng. Ngài ya chṳ̂n-fu̍k Sat-mâ-li-â lâu Thai-mâ-sṳ-kiet.
[10] Ngài chhûn-sú chit-fa̍t ke-têu koet-kâ, yîn-vi kì-têu pai ngiéu-siong; ke-têu koet-kâ ke ngiéu-siong pí Yâ-lu-sat-lâng lâu Sat-mâ-li-â ke hàn-kha tô.
[11] Ngài sêu-me̍t Sat-mâ-li-â lâu ke-vi ke ngiéu-siong, ya oi cheu-yong sêu-me̍t Yâ-lu-sat-lâng lâu ke-vi ke ngiéu-siong.”
[12] Chúng-he Chú kóng: “Ngài chhai Siak-ôn-sân lâu Yâ-lu-sat-lâng ke kûng-chok vàn-sṳ̀n yî-heu, Ngài oi chit-fa̍t Â-sut fòng-ti ke chhṳ-thai lâu kiêu-ngau.”
[13] Â-sut fòng-ti khoâ-khiéu kóng: “Liá chhiòn-phu he ngài yit-sà ke sṳ̀n-chhiu. Ngài án khiòng-thai, án chîn-mìn nèn-kon! Ngài fi-thet liá-têu koet-kâ ke koet-kie, ya chiông kì-têu só-yû ke chhòi-fu chhióng chhiang-chhiang. Ngài chhiong khiòng-chong ke ngiù án-ngiòng chien-tha̍p ke-têu thi-fông ke ngìn-mìn.
[14] Ngài ke sú chiông só-yû koet-kâ ke chhòi-fu nâ-chéu, chhiong chhai tiâu-teu tú ngiâm-lón án yùng-yi. Mò yit-ke yi̍t-kap kám tui ngài chṳ́n-thung; mò yit-chông choi kám chhut-sâng.”
[15] Chúng-he Song-chú kóng: “Pú-thèu voi pí sṳ́ pú-thèu ke kha ví-thai mâ? Ki-é voi pí yung ki-é ke kha chhung-yeu mâ? Kám-kóng kun-é voi nâ-hí ke nâ kun-é ke? Kám-kóng chhóng-è voi khià-hí ke m̀-he yung su-é cho ke?”
[16] Só-yî, Chṳ-kô ke Song-chú — Van-kiûn ke Ngièn-soi oi yung phiang-thung lòi chit-fa̍t ke-têu páu-chiuk ke yúng-sṳ, sṳ́ phì-phì ke ngìn pien-to chheu kia̍p-kia̍p. Chhai kì-têu ke sṳ̂n-thí tî-poi voi yû mâng-mâng ke fó yit-chhṳ̍t kín-sêu.
[17] Yî-set-lie̍t ke kông voi sàng-cho fó; Yî-set-lie̍t sṳ̀n-sṳn ke Song-ti oi sàng-cho fó-yam. Chhai yit-ngit tông-chûng, Kì oi chiông só-yû ke sêu chhiang-chhiang, lièn net-è lâu chhi̍t-lì ya sêu-thet.
[18] Â-sut tông-chiâng ke su-lìm lâu chhin-phì ke thièn-thi, chhiòn-phu voi chha̍t-tái pûn Song-chú fí-me̍t, chhiu-chhiong yit-ke pot-phiang ke ngìn chhiam-chhiam sôi-ngio̍k to sí.
[19] Su-lìm chûng chhûn-tó ke su-é voi mò kí-tô, lièn se-ngìn-è ya nèn son tet-chhut.
[20] Thai châi-nan heu, hàn-sâng ke Yî-set-lie̍t-ngìn chón-lòi ke sṳ̀, kì-têu m̀-voi chai hi yí-kho chiông kì-têu fí-me̍t ke koet-kâ; kì-têu voi sṳ̀n-sîm sṳ̀n-yi sin-kho Song-chú — Yî-set-lie̍t sṳ̀n-sṳn ke Song-ti.
[21] Chhûn-tó ke Yî-set-lie̍t-ngìn, chhiu-he Ngâ-kok ke heu-thoi só chhûn hâ-lòi ke, voi chón-to thai-nèn ke Song-ti ke-vi.
[22] Sûi-yèn Yî-set-lie̍t-ngìn chhiong hói-sùn ke sâ-é án-tô, chṳ́-yû chhûn-tó ke ngìn chang nèn to-chón-lòi. Ngìn-mìn thin-chho̍k voi su sêu-me̍t, yin-tet ke po-yin voi chhiong thai-súi chim-sí kì-têu.
[23] Chṳ-kô ke Song-chú — Van-kiûn ke Ngièn-soi kiet-thin oi fí-me̍t chhiòn-koet.
[24] Chṳ-kô ke Song-chú — Van-kiûn ke Ngièn-soi tui Siak-ôn ke ngìn-mìn án-ngiòng kóng: “Sûi-yèn Â-sut-ngìn sṳt chhiong Âi-khi̍p-ngìn án-ngiòng pet-hoi ngì-têu, kûng-tá ngì-têu, ngì-têu m̀-sṳ́ kiâng kì-têu.
[25] Mò kí-kiú heu, tén Ngài tui ngì-têu ke su-hi sêu-thet, Ngài chhiu hiong kì-têu fat-khién, sêu-me̍t kì-têu.
[26] Ngài — Song-chú, Van-kiûn ke Ngièn-soi oi yung phì-piên tá kì-têu, chhiong yî-chhièn chhai Ngò-li̍p ngàm-sa̍k ke-vi tá Mí-thien-ngìn khiung-yong; Ngài oi chit-fa̍t Â-sut-ngìn, chhiong yî-chhièn chhai Fùng-hói chhûn-chhut koái-kun-é chit-fa̍t Âi-khi̍p-ngìn khiung-yong.
[27] Chhai ke-ngit, Ngài oi tui Â-sut ke khiòng-khièn ha chiông ngì-têu kié-kiu chhut-lòi; kì-têu ke ak m̀-voi chai sàng-cho ngì-têu kiên-thèu táng ke chhûng-tâm.”
[28] Sù-thi̍t kûng-hâ Ngie-sàng! Kì-têu kîn-ko Mí-kî-lùn; kì-têu chiông pú-kip-phín piong chhai Me̍t-mat!
[29] Kì-têu yí-kîn thûng-ko sân-lak, chhai Kâ-pâ ôn-yàng. Lâ-mâ-sàng ke ngìn chhin chho̍k-kiâng; Só-lò-vòng ku-hiông ke Kî-pí-â-ngìn chhiòn-phu thò-chéu lé.
[30] Kâ-lìm-ngìn â, ngì-têu thai-sâng hêm â! Lòi-sat-ngìn â, ngì-têu oi chu-yi thâng! Khó-lièn ke Â-nâ-thut-ngìn â, ngì-têu oi yin-sâng â!
[31] Mâ-tet-mí-nâ-ngìn thò-chéu, Kî-piang-ngìn chhiòn-phu chéu-hi khong-miang.
[32] Kîm-pû-ngit thi̍t-ngìn chhai Nò-pak ôn-yàng; kì-têu khià-hí khièn-thèu-mà oi tá Siak-ôn-sân lâu Yâ-lu-sat-lâng.
[33] Khon â, Chṳ-kô ke Song-chú — Van-kiûn ke Ngièn-soi oi kûng-kit kì-têu, yung tet-ngìn-kiâng ke thai-nèn chiông kì-têu tông-chûng chui kiêu-ngau chui khiòng-thai ke, chhiòn-phu oi chám-hâ lòi, chhiong ngìn chiông su-khoá to̍k hâ-lòi khiung-yong.
[34] Song-chú oi chiông kì-têu chám chhiang-chhiang, chhiong ngìn yung pú-thèu chiông thai su-lìm chám-thet, lièn Lì-pâ-nun ke thai-su ya chhiòn-phu chám-vang hâ-lòi!