[1] To ke-ngit, Song-chú oi yung yu-ngang yu-li ke thai-kiam hìn-fa̍t thai hói-koai, chhiu-he ke vân-vân vat-vat san-pien ke kú-sà; Kì oi chhṳ̀-sí thai-hói chûng ke ok-liùng.
[2] To ke-ngit, Song-chú oi thì-hí Kì só fôn-hí ke phù-thò-yèn, kóng:
[3] “Ngài khon-sú kì, cheu-sṳ̀ yim-súi; ngit-ya khon-sú, mò-ngìn nèn pho-fái kì.
[4] Ngài mò-oi chai tui Ngài ke phù-thò-yèn fat-khién. Na-he yèn-tú yû net-è lâu chhi̍t-lì, Ngài yit-thin voi pâng-thet, chiông kì-têu sêu chhiang-chhiang.
[5] Na-he Ngài chṳ́-mìn ke thi̍t-ngìn oi Ngài pó-fu, chhiu oi siên lâu Ngài fò-hó. Mò m̀-chho̍k, kì-têu oi siên lâu Ngài fò-hó.”
[6] Chiông-lòi Ngâ-kok ke chṳ́-sûn voi chhiong su-é án-ngiòng tang-kîn; Yî-set-lie̍t ngìn-mìn voi fat-ngà, khôi-fâ, chhai chhiòn sṳ-kie kiet-mân kó-chṳ́.
[7] Song-chú chit-fa̍t Yî-set-lie̍t-ngìn, mò chhiong Kì chit-fa̍t kì-têu ke thi̍t-ngìn án-ngiàm. Kì chhṳ̀-thet ke Yî-set-lie̍t-ngìn, ya mò chhiong kì-têu ke thi̍t-ngìn pûn Kì sêu-me̍t án-tô.
[8] Song-chú yung chan-chên lòi tui-fu Kì ke chṳ́-mìn, chiông kì-têu kiuk-chéu; Kì tui tûng-fông chhôi-lòi yit-chhṳn khòng-fûng, chiông kì-têu kién-chéu.
[9] Chhù-fî Ngâ-kok ke chṳ́-sûn chiông kì-têu vi ngoi-pâng sṳ̀n-mìn hí ke chi-thàn chhiòn-phu chhak-thet, chiông Â-sa-lâ ńg-sṳ̀n ke chhû-é lâu hiông-thàn chhiòn-phu súng-vang, kì-têu ke chhui chhie̍t-tui m̀-voi tet-tó sa-miên.
[10] Kiên-ku ke sàng fi-thet lé, vuk-è mò-ngìn he̍t, chhiong khóng-yâ yit-yong; se ngiù-è chhai ke-vi sṳ̍t-chhó, hiet-khun, lièn su ke kî-ya̍p ya sṳ̍t-thet.
[11] Su-kî chhiòn-phu khû-châu áu-thôn, fu-ngìn-kâ hi ngiâm-lòi cho-chhèu sêu. Yîn-vi ngìn-mìn ngong-tong mò chṳ-sṳt, kì-têu ke Song-ti mò-oi chai lìn-mén kì-têu, kì-têu ke chhóng-chho Chú ya mò-oi chai sṳ̂-ên pûn kì-têu.
[12] Yî-set-lie̍t-mìn â, to ke-ngit, Song-chú oi tui Yu-fat-lâ-tí-hò to Âi-khi̍p piên-kie chiông ngì-têu yit-ke yit-ke seu-si̍p hí-lòi, chhiu-chhiong tá-kuk ke ngìn sû chîn-kuk khiung-yong.
[13] To ke-ngit, phùn yòng-kok ke sâng voi chiông liù-mòng chhai Â-sut lâu Âi-khi̍p ke Yî-set-lie̍t-ngìn chhiòn-phu hêm chón-lòi. Kì-têu voi chhai Yâ-lu-sat-lâng — Song-chú ke sṳn-sân táng kin-pai Kì.