[1] Chhai Vû-sî-ngâ ke sûn-é, Yok-thán ke lai-é Â-ha̍p-sṳ̂ cho Yù-thai-vòng ke sṳ̀, chan-chên fat-sên lé. Si-li-â-vòng Li-sun lâu Li-mâ-li ke lai-é Yî-set-lie̍t-vòng Pí-kâ lièn-ha̍p hí-lòi, kûng-tá Yâ-lu-sat-lâng, chúng-he mò fap-thu kûng hâ-lòi.
[2] Si-li-â kiûn-chhui lòi-to Yî-set-lie̍t kin-nui ke sêu-sit chhòn-to Yù-thai-vòng ke-vi, vòng lâu ngìn-mìn fî-sòng chho̍k-kiâng, chhiu-chhiong su-é chhai khòng-fûng chûng yèu-lòi yèu-hi.
[3] Só-yî, Song-chú tui Yî-soi-â kóng: “Tai-tén ngì ke lai-é Sṳ̂-â-ngâ-sut hi kien Â-ha̍p-sṳ̂; kì chhai song pî-thòng chun-kiêu ke chhut-héu, chhiu-he chhai ngiam-pu kûng-chhòng ke thai lu-hong.
[4] Ngì hi lâu kì kóng, oi chu-yi, oi ôn-chhin, m̀-sṳ́ kiâng Li-sun-vòng ke Si-li-â kiûn-chhui. Li-sun-vòng lâu Li-mâ-li ke lai-é, kì lióng-ke ngìn ke nu-hi chhiu-chhiong lióng-kî sêu-tén ke fó-pá só chhung chhut-lòi ke yên thin-thin.
[5] Si-li-â lâu Yî-set-lie̍t pin Li-mâ-li ke lai-é kiet-mèn, sat-kie lòi hoi ngì.
[6] Kì-têu sióng-oi kûng-tá Yù-thai, lòi-pet Yù-thai-ngìn thèu-hòng, yèn-heu sat-li̍p Thâ-pí-le̍t ke lai-é cho vòng.
[7] “Chúng-he Ngài — Chṳ-kô ke Song-chú án-ngiòng siên-pu: Kì-têu ke kie-mèu yit-thin m̀-voi sṳ̍t-hien.
[8] Yîn-vi Thai-mâ-sṳ-kiet put-ko he Si-li-â ke sú-tû; Li-sun-vòng put-ko he Thai-mâ-sṳ-kiet ke liâng-chhiu thin-thin; mò má-ke liáu-put-hí. Lun-tó Yî-set-lie̍t, kì chhai liuk-sṳ̍p ńg-ngièn nui ya oi pûn-ngìn tá-phai, mòng-koet.
[9] Sat-mâ-li-â put-ko he Yî-set-lie̍t ke sú-tû; Li-mâ-li ke lai-é put-ko he Sat-mâ-li-â ke liâng-chhiu thin-thin. Mò má-ke liáu-put-hí. “Na-he ngì-têu ke sin-sîm mò kiên-khiòng, ngì-têu yit-thin khî m̀-he̍t.”
[10] Song-chú yu tui Â-ha̍p-sṳ̂ kóng:
[11] “Ngì yin-kôi hiong Song-chú — ngì ke Song-ti khiù yit-ke ki-ho; ke ki-ho khó-nèn tui yîm-kiên lòi, ya khó-nèn tui thiên-táng lòi.”
[12] Â-ha̍p-sṳ̂ kóng: “Ngài mò-oi khiù ki-ho; ngài m̀ sṳ-tham Song-chú.”
[13] Só-yî, Yî-soi-â kóng: “Thai-ví ke chṳ́-sûn â, ngì-têu oi thâng! Kám-kóng ngì-têu pûn ngìn nâu, hàn m̀ la-pái mâ? Hàn-oi pûn ngài ke Song-ti nâu he-mò?
[14] Án-ngiòng, Chú oi chhîn-chhṳ su-pûn ngì-têu yit-ke ki-ho: Yû ngìn-kâ-ńg voi fài-thôi kiung lai-é, chiông kì ke miàng ôn-to ‘Yî-mâ-nui-li’.
[15] To lai-é voi fûn-phe̍t sṳ-fî san-ok ke sṳ̀, kì oi yung nen-yù lâu phûng-thòng cho sṳ̍t-vu̍t.
[16] Yîn-vi to liá se-lai-é voi fûn-phe̍t sṳ-fî san-ok yî-chhièn, ke lióng-ke phau-kiûn ke koet-kâ chhiòn-phu voi fông-thet.
[17] “Song-chú oi kong-châi pûn ngì, ngì ke ngìn-mìn, lâu ngì ke kâ-chhu̍k; liá-chúng châi-nan, chhṳ Yî-set-lie̍t-koet tui Yù-thai-koet fûn-lie̍t chhut-lòi heu, mò fat-sên ko; Kì oi sṳ́ Â-sut fòng-ti lòi kûng-tá ngì ke koet-kâ.
[18] “Ke-sṳ̀, Song-chú oi phùn khiéu-seu fû-ham Âi-khi̍p-ngìn lòi, chhiong vû-yìn tui yén-yén ke Nì-lò-hò ngièn-thèu pî-lòi; Kì ya oi ham Â-sut-ngìn chhiong phûng-é án-ngiòng tui kì-têu ke pún-thú lòi.
[19] Kì-têu voi kûi-khiùn pî-lòi, chhûng-mân sân-lak, sân-lùng lâu ngàm-sa̍k; kì-têu voi châ-thet só-yû ke net-phùng lâu só-yû ke chhó-ngièn.
[20] “Ke sṳ̀-chiet, Chú oi tui Yu-fat-lâ-tí-hò ke-phién chhiáng yit-ke thi-thèu sṳ̂-fu lòi — chhiu-he Â-sut fòng-ti. Kì oi thi-thet ngì-têu ke thèu-nà-mô, kiok-mô lâu fù-sî.
[21] “Ke sṳ̀-chiet, yit-ke nùng-mìn cho-tet pó-liù yit-chak ngiù-mà lâu lióng-chak sân-yòng-mà;
[22] kì voi yû chiuk-ngiak ke nen lâu nen-yù sṳ̍t. Fàm he chhai liá-pái koet-nan chûng chhûn-tó ke ngìn chhiòn-phu voi yû nen-yù lâu phûng-thòng hó-sṳ̍t.
[23] “Ke sṳ̀-chiet, chung-ko yit-chhiên thèu phù-thò-su, ka-chhṳ̍t yit-chhiên ngiùn-è ke hó kó-yèn, ya voi sâng-mân net-è lâu chhi̍t-lì.
[24] Ngìn voi tai kiûng-chien ngi̍p-hi tá-lia̍p, yîn-vi mân-thi he net-è lâu chhi̍t-lì.
[25] Yî-chhièn yung kiok-thèu kâng-chung ke sân-kông, ngì voi kiâng net-è lâu chhi̍t-lì, sa m̀-kám to ke-vi hi, chṳ́-yû yung-lòi hiuk ngiù-yòng, yù-chhai kì-têu hi chien-tha̍p.”