[1] Yâ-lu-sat-lâng â, oi fôn-hí chhong-kô; ngì chhiong he m̀-voi kiung ke fu-ngìn-kâ, m̀-sṳt yîn-vi kiung-chṳ́ thung-to chhin-sê, chúng-he liá-ha ngì oi fôn-hí chhong-kô, thai-sâng chhin-hêm. Ke su lâng-lo̍k kû-tân ke fu-ngìn-kâ voi yû chhin-tô chṳ́-sûn, pí yit-chhṳ̍t yû ló-kûng khiung-ha ke fu-ngìn-kâ kiung hàn-kha tô! Liá he Song-chú kóng ke.
[2] Ngì tap chong-phùng ke thi oi kha-thai têu-é, ngì tap ke chong-phùng oi kha-fat têu-é, sok-è oi kha-chhòng têu-é, khi̍t-é oi tâng kha-he̍t têu-é.
[3] Oi hiong chó-yu khok-chông ngì ke thú-thi. Lie̍t-koet chiam-hi ke thú-thi, ngì ke chṳ́-sûn voi to-chón-lòi he̍t; fông-liòng ke sàng-sṳ voi yû chhin-tô ngìn he̍t.
[4] M̀-sṳ́ kiâng, ngì m̀-voi chai tù-tó kien-seu; ngì m̀-voi chai pûn-ngìn vú-yu̍k. Ngì voi m̀ ki-tet heu-sâng sṳ̀ tù-tó ke kien-seu, ngì m̀-voi chai sióng-hí cho koá-fu sṳ̀ só-su ke vú-yu̍k.
[5] Ngì ke chhóng-chho Chú he ngiâ ló-kûng; Kì ke miàng he Song-chú — Van-kiûn ke Ngièn-soi. Yî-set-lie̍t sṳ̀n-sṳn ke Song-ti he ngì ke kiu-su̍k-chá; Kì he thúng-chhṳ chhiòn sṳ-kie ke Sṳ̀n.
[6] Yî-set-lie̍t â, ngì chhiong yit-ke heu-sâng ke pû-ngiòng ngìn, pûn ló-kûng fit-thet, tông sông-sîm yu chhin yù-sèu. Chúng-he Song-chú oi ham ngì chón-lòi, ngì ke Song-ti án-ngiòng kóng:
[7] Ngài sûi-yèn chhiam-sṳ̀ lì-khôi ngì, chúng-he Ngài fî-sòng thung-siak ngì, oi chiap ngì chón-lòi.
[8] Ngài thai fat-khién, êm-mien m̀-tap ngì he yit-ha-é thin-thin; chúng-he Ngài oi yung yún-yén ke chhṳ̀-oi lìn-mén ngì. Song-chú — ngì ke kiu-su̍k-chá án-ngiòng siên-pu lé.
[9] Chhai Nò-â ke sṳ̀, Ngài sṳt fat-sṳ, m̀-voi chai yung pot thai-súi lòi chim-thet sṳ-kie. Liá-ha Ngài fat-sṳ m̀-voi chai hiong ngì fat-khién, m̀-voi chai chit-phi ngì.
[10] Thai-sân voi thîn-thûng, se-sân ya cho-tet sái-khôi; chúng-he Ngài put-pien ke chhṳ̀-oi m̀-voi lì-khôi ngì, Ngài phìn-ôn ke yok ya yit-thin m̀-voi kói-pien. Lìn-mén ngì ke Song-chú án-ngiòng siên-pu lé.
[11] Song-chú kóng: Yâ-lu-sat-lâng, ngì liá pûn thai-fûng chhôi-tá khun-khú ke sàng â, mò-ngìn lòi ôn-ví ngì. Khon â, Ngài oi yung chhái-set ke sa̍k-thèu lòi chhùng-kien ngì, yung pó-sa̍k lòi tá ngì ke thi-kî.
[12] Ngài oi yung fùng-pó-sa̍k hí ngì ke sàng-lèu, yung voi fat liong-kông ke pó-sa̍k cho sàng-mùn; si-vì ke sàng-chhiòng chhiòn-phu siông mân chû-pó.
[13] Song-chú oi chhîn-chhṳ kau-thô ngì ke chṳ́-ńg, su kì-têu thai phìn-ôn.
[14] Sṳ̂-hàng chṳn-ngi voi sṳ́ ngì pien chhin khiòng-thai, m̀-voi chai yû-ngìn lòi chhîm-lio̍k ngì, hoi ngì chho̍k-kiâng; ngì m̀-voi chai tù-tó tet-ngìn-kiâng ke sṳ, tet-ngìn-kiâng ke sṳ voi yén-yén lì-khôi ngì.
[15] Ngài m̀-voi pûn ngìn kûng-kit ngì; lâu ngì siông-chhṳ̀ ke yit-thin voi hiong ngì thèu-hòng.
[16] Ngài chhóng-chho tá-thiet sṳ̂-fu, pûn kì phùn fó-lù, tá-chho vú-hi. Ke chhṳ̀-ngìn, fí-me̍t ngìn ke, ya he Ngài chhóng-chho ke.
[17] Chúng-he mò yit-yong vú-hi yû khó-nèn sông-hoi ngì; chhai sṳ́m-phan ke sṳ̀ ko ngì ke ngìn, ngì thin-chho̍k voi tá-yàng kì. Liá yit-chhiet he Song-chú phu̍k-ngìn ke sán-ngia̍p, he kì-têu tui Ngài tet-tó ke chṳn-ngi. Ngài — Song-chú án-ngiòng siên-pu lé.