[1] Chung hói-tó ke ngìn â, ngì-têu lòi thâng! Yén-fông ke van-mìn â, ngì-têu chhiòn-phu lòi thâng ngài kóng! Ngài chhut-se yî-chhièn, Song-chú yí-kîn kién-sién ngài; ngài hàn chhai mû-thôi tú, Kì yí-kîn ham ngài ke miàng.
[2] Kì sṳ́ ngài ke fa chhiong li-kiam; Kì chhîn-sú pó-fu ngài. Kì chiông ngài chho-sṳ̀n chhiong nò-chiâm ke chien, khong chhai Kì ke chien-thoi tú.
[3] Kì tui ngài kóng: Yî-set-lie̍t â, ngì he Ngài ke phu̍k-ngìn; Ngài thin-chho̍k voi yîn-vi ngì tet-tó yùng-kông.
[4] Ngài chhiu kóng: Ngài sat-mâng cho-se, chúng-he chhiòn-mò háu-kó; ngài chhin-li̍t cho, hàn-he mò chhái-kûng. Chúng-he Song-chú voi pûn ngài kûng-phìn ke lun-ton; ngài ke Song-ti thin-chho̍k voi chióng-sóng ngài.
[5] Chhai ngài chhut-se yî-chhièn, Song-chú yí-kîn chṳ́-phai ngài cho Kì ke phu̍k-ngìn; oi ngài sṳ́ Ngâ-kok-kâ kûi-hiong Kì, sṳ́ si-san ke Yî-set-lie̍t ngìn-mìn chhi-si̍p chhai Kì ke mien-chhièn. Song-chú khon ngài cho chûn-kui; ngài ke Song-ti he ngài ke li̍t-liong.
[6] Song-chú tui ngài kóng: Ngài ke phu̍k-ngìn â, Ngài oi ngì fu̍k-hîn Ngâ-kok ke tak kî-chhu̍k, chiông chhûn-tó ke Yî-set-lie̍t chṳ́-sûn tai chón-lòi. Ngài hàn-oi ngì sàng-cho van-koet ke kông, sṳ́ Ngài ke kiu-ên tha̍t-to thi-khi̍t.
[7] Yî-set-lie̍t ke kiu-su̍k-chá — sṳ̀n-sṳn ke Song-ti án-ngiòng kóng: Ke pûn-ngìn khon-khiâng, pûn van-koet só-nâu ke, pûn thúng-chhṳ-chá khon-cho nù-phu̍k ke, liá-ha kiûn-vòng voi chhai ngì mien-chhièn khî hí-lòi chṳ-kin; kôn-chóng ya voi hiong ngì khúi-pai. Liá-sṳ yit-thin voi sṳ̀n-chhiu, yîn-vi Yî-set-lie̍t sṳ̀n-sṳn ke Song-ti kién-sién ngì; Song-chú thin-chho̍k voi sṳ̍t-hien Kì ke yin-hí.
[8] Song-chú tui Kì ke chṳ́-mìn án-ngiòng kóng: Chiap-na̍p ke sṳ̀-chiet yit-to, Ngài chhiu tap-yin ngì; chṳ́n-kiu ke ngit-è yit-lòi, Ngài chhiu pông-chhu ngì. Ngài oi pó-fu ngì, khon-ku ngì, thûng-ko ngì lâu van-mìn li̍p-yok. Ngài oi pûn ngì chón-to ke fông-thet ke thi-fông, pûn ngì chhùng-kien kâ-yèn.
[9] Ngài oi tui pûn-ngìn chok-hi ke kóng: Ngì-têu chhṳ-yù lé! Tui vû-am chûng ke ngìn kóng: Ngì-têu chhùng-kien kông-mìn lé! Kì-têu voi chhiong yòng-è chhai chhó-phû sṳ̍t-chhó; ngièn-tán kông-kông ke kô-sân sàng-cho kì-têu ke chhó-chhòng.
[10] Kì-têu m̀-voi ngo-tú ya m̀-voi choi-hot. Ngit-thèu tông-lat me m̀-voi sông-hoi kì-têu; yîn-vi ke thung-siak kì-têu ke oi tai-liâng kì-têu; Kì oi thu kì-têu to yû chhièn-súi ke só-chhai.
[11] Ngài oi chhai chung sân-táng khôi-lu, Ngài ke thai-lu ya oi thùn-to kô-kô.
[12] Khon â! Ngài ke chṳ́-mìn voi tui yén-fông lòi; tui sî, tui pet, yu tui Hî-nì ke thi-fông lòi.
[13] Thiên â, oi fôn-hí chhong-kô! Thi â, oi khoai-lo̍k fôn-fû! Chung sân â, oi thai-sâng siung-yòng! Yîn-vi Song-chú oi ôn-ví Kì ke chṳ́-mìn, oi lìn-mén Kì su-khú ke chṳ́-mìn.
[14] Chúng-he Yâ-lu-sat-lâng ke ngìn-mìn kóng: Song-chú yí-kîn fit-thet ngài-têu! Ngài-têu ke Chú yí-kîn m̀ ki-tet ngài-têu!
[15] Só-yî, Song-chú en-kóng: Â-mê voi m̀ ki-tet kì sṳ̍t-nen ke ô-nga-é mò? Kì voi m̀ siak chhîn-sên ke lai-é mò? Chhiu-son â-mê m̀ ki-tet chhṳ-kâ ke se-ngìn-è, Ngài ya thin-chho̍k m̀-voi m̀ ki-tet ngì!
[16] Yâ-lu-sat-lâng â, Ngài chiông ngì ke miàng khat chhai pâ-chóng sîm; ngì ke sàng-chhiòng yit-chhṳ̍t chhai Ngài ngién-chhièn.
[17] Oi chhùng-kien ngì ke tông-kiak chhiu voi chón-lòi lé; oi fí-me̍t ngì ke lâu hoi ngì fông-liòng ke tông-kiak chhiu voi lì-khôi ngì.
[18] Tá-khôi muk-chû si-mien khon khon-é â! Ngì ke thùng-pâu yí-kîn si̍p-ha̍p, oi to-chón ngì liá-vi lòi lé! Ngài — Song-chú chṳ́-tén Ngài ke sâng-miang pó-chṳn: Ngì voi khon chhṳ-kâ ke thùng-pâu cho chûn-kui, chhiu-chhiong sîn-ngiòng tién kiê chhai kì yêu-kiên ke chû-pó.
[19] Ngì ke koet-kâ sṳt su-tó pho-fái; liá-ha kì thet-ha̍p, yùng-na̍p m̀-lo̍k chón-lòi ke ngìn he̍t. Yî-chhièn chhîm-lio̍k ngì ke ngìn thin-chho̍k voi yén-yén lì-khôi ngì.
[20] Ke-têu ngì láu-tó sóng-thet ke, kì-têu ke chṳ́-ńg voi to-chón-lòi tui ngì kóng: Liá-te thú-thi sṳ̍t-chhai thet-ha̍p lé; ngài-têu sî-yeu kha-thai ke thi-fông!
[21] Ke-sṳ̀ ngì voi tui chhṳ-kâ kóng: Má-ngìn vi ngài kiung liá án-tô se-ngìn-è? Ngài ke se-ngìn-è chhiòn-phu yêu-chat, ngài yí-kîn m̀-voi kiung lé; ngài thò-chéu chhai ngoi-poi, tak só-chhai liù-long, he má-ngìn thu-thai liá-têu se-ngìn-è nè? Chhai ngài kû-tân ke sṳ̀, liá-têu se-ngìn-è tui nai-vi lòi ke?
[22] Chṳ-kô ke Song-chú tui Kì ke chṳ́-mìn kóng: Khon â! Ngài oi hiong lie̍t-koet khià-sú, hiong van-mìn yèu thai-khì; kì-têu voi nám-tén ngì ke lai-é, pà-tén ngì ke moi-é chón-lòi.
[23] Lie̍t-koet ke kiûn-vòng voi cho ngì chṳ́-ńg ke yông-yà; kì-têu ke vòng-heu voi cho ngì se-ngìn-è ke nen-ôi. Kì-têu voi chhai ngì mien-chhièn khúi-pai, sê ngì kiok-hong ke chhṳ̀n-fôi. Ke-sṳ̀ ngì chhiu voi tî ngài he Song-chú; tén Ngài pông-chhu ke ngìn chhie̍t-tui m̀-voi sṳt-mong.
[24] Ngì tui yúng-sṳ sú-chûng ngióng chhióng tet-chón chan-li-phín nè? Ngì tui cham-liâng-chá sú-chûng kiu tet-chón pûn kì chok-hi ke ngìn mâ?
[25] Song-chú án-ngiòng en-kóng: Liá-chúng sṳ voi fat-sên lé. Yúng-sṳ chhióng-hi ke chan-li-phín voi chhióng chón-lòi; cham-liâng-chá chok-hi ke ngìn voi kiu chón-lòi. Ngì ke tui-thi̍t chhiu-he Ngài ke tui-thi̍t; ngì ke chṳ́-ńg Ngài oi chṳ́n-kiu.
[26] Ngài oi sṳ́ khî-fu ngì ke ngìn sṳ̍t chhṳ-kâ ke ngiuk; kì-têu oi lîm chhṳ-kâ ke hiet, chui-to vang-vang lo̍k-hi. Ke-sṳ̀ phû-thiên-ha chhiòn-phu voi tî, Ngài he chṳ́n-kiu ngì ke Song-chú; Ngài he ngì ke kiu-su̍k Chú, he Ngâ-kok thai-nèn ke Song-ti.