[1] M̀-hó láu-tó Song-chú ke sú thet-tón, mò phan-fap kiu ngì-têu, ya-he ngí-lûng thâng m̀-tó ngì-têu ke khiù-ham!
[2] Kì êm-mien m̀-thâng, he yîn-vi ngì-têu ke chhui; ngì-têu ke chhui hoi ngì-têu lâu Song-ti kak-chhie̍t, sṳ́ ngì-têu ke kin-pai pien mò-háu.
[3] Ngì-têu sûng-sú kò-tó hiet, sú-chṳ́ pûn chhui tá-lá-sap; ngì-têu ke choi-sùn kóng fâ-liâu, sa̍t-mà kóng hiûng-ok ke fa.
[4] Ngì-têu sông fap-yen, chúng-he mò cheu kûng-tho hàng, ya mò kóng sṳ̀n-sṳ̍t fa. Ngì-têu kho kóng fâ-liâu tá kôn-sṳ̂; ngì-têu sîm-kôn ok-thu̍k, hàng-sṳ chit-ok.
[5] Ngì-têu chhiu-chhiong thu̍k-sà phu-lón, chhiong là-khià kâng-mióng. Ngìn sṳ̍t-tó liá lón chhiu mò miang; lón tá lan-thet, thu̍k-sà chhiu sò chhut-lòi.
[6] Ngì-têu ke yîm-mèu châ m̀-thet chhṳ-kâ ke vû-ve, chhiong là-khià-mióng mò phan-fap chún sâm-fu chok; ngì-têu ke hàng-vì tông-fái, sú-thon chhàn-phau.
[7] Ngì-têu sṳ̀-sṳ̀ kie-va̍k cho fái-sṳ, kiak-kiak hi liù vù-kû ngìn ke hiet. Ngì-têu ke sṳ̂-sióng chhiòn-phu he chhui-ok; ngì-têu só kîn-ko ke thi-fông thin-chho̍k su-tó pho-fái lâu fí-me̍t.
[8] Ngì-têu hi-to má-ke só-chhai, ke só-chhai chhiu mò phìn-ôn. Ngì-têu só-cho ke chhiòn-phu chhin mò kûng-phìn; ngì-têu chho vân-vân vat-vat ke lu, chhûng-mân sià-ok; hàng liá-thiàu lu ke ngìn chhiòn-phu mò ôn-chhiòn.
[9] Yî-set-lie̍t-ngìn kóng: “Liá-ha ngài-têu chang tî cho-má-ke kûng-ngi lì ngài-têu án-yén, kûng-phìn m̀ thèn-tén ngài-têu. Ngài-têu chhìm-khiù kông-mìn, chúng-he chṳ́-yû vû-am; hî-mong tet-tó liong-kông, tiên-to hàng chhai vû-am chûng.
[10] Ngài-têu chhiong mô-muk ke miâ-tén piak hàng, chhai ngit-sṳ̀-thèu chhiong chhai am-pû-sṳ̀ khiung-yong; ngài-têu khon hí-lòi chhiong chhin chap-chen ke ngìn, sṳ-sṳ̍t-song lâu sí-ngìn chhâ-m̀-tô.
[11] Ngài-têu chhiong yùng-è án-ngiòng kín-hò, chhiong ngie̍t-kap-è án-ngiòng kín-kieu; chhin sióng-oi yû kûng-phìn, chúng-he tet m̀-tó; hî-mong tet-tó kiu-ên, chúng-he kiu-ên lì ngài-têu chhin-yén.
[12] “Song-chú â, chhai Ngì mien-chhièn, ngài-têu yû chhin-tô ke ko-fam; ngài-têu ke chhui chhai khúng-ko ngài-têu; ngài-têu tî chhṳ-kâ chit tông-tô chhui-ok.
[13] Ngài-têu fán-khong Ngì, phoi-ngia̍k Ngì, m̀ thèn ngài-têu ke Song-ti. Ngài-têu khî-fu phe̍t-ngìn, fán-tui Ngì. Ngài-têu ke sîm-kôn kúi-cha, só-kóng ke chhiòn-phu he fâ-liâu.
[14] Kûng-phìn su-pet thui-chéu, chṳn-ngi khî-to yén-yén; chṳ̂n-lî chhai kiê-hong khî m̀-he̍t, sṳ̀n-sṳ̍t mò fap-thu chin-ngi̍p ngài-têu tông-chûng.
[15] Chhìm m̀-tó chṳ̂n-lî; m̀ cho fái-sṳ ke ngìn fán-chón pûn-ngìn khî-fu.” Song-chú khon-tó liá yit-chhiet ke sṳ; Kì khon-tó kûng-phìn m̀ kien-thet chhiu mò fôn-hí.
[16] Kì kám-kok chhin khì-koai, pûn-ngìn khî-fu ke ngióng-voi mò-ngìn pông-chhu. Só-yî, Kì oi yung chhṳ-kâ thai-nèn ke sú chṳ́n-kiu kì-têu, yung chṳn-ngi fù-chhṳ̀ kì-têu.
[17] Kì oi chok kûng-ngi ke chan-kap, tai kiu-ên ke thiet mo-é. Kì oi chok po-sù ke sâm-fu, yung ngie̍t-sîm cho chhòng-phàu.
[18] Kì oi cheu tak-sà ke hàng-vì po-yin kì-têu, yung thai fat-khién lòi po-fu̍k thi̍t-ngìn; he̍t chhai hói-tó ke ngìn ya voi su-tó po-yin.
[19] Tui ngit-chhut to ngit-lo̍k ke só-chhai, kì-têu chhiòn-phu voi kin-vi Song-chú ke miàng lâu Kì ke yùng-yeu; yîn-vi Song-chú voi chhiong khòng-fûng thai-súi án-ngiòng lòi-to.
[20] Song-chú tui Kì ke chṳ́-mìn kóng: “Ngài oi lòi kiu-su̍k Siak-ôn, chṳ́n-kiu Yî-set-lie̍t lì-khôi chhui-ok ke ngìn.
[21] Liá he Ngài chhîn-chhṳ lâu ngì-têu li̍p ke yok: Ngài ke Lìn lâu ngì-têu khiung-ha; Ngài chhòn-pûn ngì-têu ke fa ya thin-chho̍k m̀-voi lì-khôi ngì-têu ke choi, ya m̀-voi lì-khôi ngì-têu chṳ́-chṳ́ sûn-sûn ke choi, chhiùng-kîm chhṳ̍t-to yún-yén.”