[1] Ngài oi kóng-fa kú-li Siak-ôn, Ngài vi-tó Yâ-lu-sat-lâng yit-thin m̀-voi tiâm-tiâm, chhṳ̍t-to kì ke kûng-ngi chhiong ngit-thèu chhut-lòi, kì ke kiu-ên chhiong fó-pá chho̍k tông-mâng.
[2] Yâ-lu-sat-lâng â, van-koet chhiòn-phu voi khon-tó ngì ke tet-sṳn; só-yû ke kiûn-vòng voi khon-tó ngì ke yùng-kông. Ngì voi yû yit-ke sîn-miàng, he Song-chú chhîn-khiéu ôn ke.
[3] Ngì voi sàng-cho Song-chú sú-chûng chhin-chiâng ke miên-liù, chhai Song-ti sú-chûng sàng-cho vòng-mo.
[4] Ngìn m̀-voi chai kóng ngì he “Pûn-ngìn fit-thet ke”, ngì ke thú-thi ya m̀-voi chai pûn-ngìn ham-cho “Fông-phû”. Ngì voi pûn-ngìn ham-cho “Song-chú só fôn-hí ke”; ngì ke thú-thi voi sàng-cho “Yû kûi-su̍k ke”. Yîn-vi Song-chú fôn-hí ngì; ngì ke thú-thi thin-chho̍k voi kûi-su̍k Kì.
[5] Chhiu-chhiong se-lai-é thó se-moi-é, ke chho-chhiu ngì ke oi thó ngì. Chhiu-chhiong sîn-lòng chung-yi kì ke sîn-ngiòng, ngì ke Song-ti ya chung-yi ngì.
[6] Yâ-lu-sat-lâng â, chhai ngì ke sàng-chhiòng táng, ngài yû phai sú-mong ke ngìn. Kì-têu m̀-voi ngit-ya tiâm-tiâm mò chhut-sâng; kì-têu m̀-hén hiû-sit, kín thì-siáng Song-chú Kì só yin-hí ke.
[7] Kì-têu m̀-pûn Song-chú hiet-khun, chhṳ̍t-to Kì chhùng-kien Yâ-lu-sat-lâng, sṳ́ Yâ-lu-sat-lâng chhai chhiòn-thi su-ngìn chhṳ̂n-chan.
[8] Song-chú yí-kîn chhûn-chhut Kì ke chṳn-sú, phìn Kì ke thai-nèn fat-sṳ kóng: Ngài m̀-voi chai chiông ngì ke nùng-chok-vu̍t pûn thi̍t-ngìn cho liòng-sṳ̍t; ngoi-chhu̍k ngìn m̀-voi chai lîm ngì lò-luk tet-lòi ke sîn-chiú.
[9] Ngì-têu kâng-chung, voi yû hó sû-sṳ̀n, sû-kot ke voi yû hó-sṳ̍t, pin chan-mî Song-chú. Ngì-têu chung phù-thò, ya voi yû hó sû-sṳ̀n, chhai Ngài sṳn-thien ke thìn-yen tú voi yû chiú hó lîm.
[10] Ngì-têu oi kiak-kiak chhut sàng-mùn, chhut-hi vi chón-lòi ke ngìn-mìn khôi-lu; sat-mâng chiông thi thùn-kô, sat-mâng cháng thai-lu, chiông sa̍k-thèu chhîn-thet, vi van-koet ke ngìn-mìn chhap thai-khì.
[11] Khon â, Song-chú sṳt hiong phû-thiên-ha siên-pu: Ngì-têu oi lâu Siak-ôn ke ngìn-mìn kóng: Khon â, ngì ke chṳ́n-kiu-chá lòi lô! Khon â, Kì oi chiông Kì só chṳ́n-kiu ke chṳ́-mìn thu chón-lòi.
[12] Kì-têu voi pûn-ngìn ham-cho “Song-ti sṳ̀n-sṳn ke chṳ́-mìn”, ham-cho “Song-chú só kiu-su̍k ke chṳ́-mìn”. Yâ-lu-sat-lâng voi pûn-ngìn ôn-to “Song-ti só koân-sîm ke sàng”, ôn-to “Song-ti mò vok-thet ke sàng”.