[1] Yâ-lu-sat-lâng â, hong hí-lòi, chhiong ngit-thèu fat-kông; yîn-vi Song-chú ke yùng-kông chhut-hien cheu-tén ngì lé!
[2] Khon â, vû-am châ-tén thai-thi; thai vû-am châ-koi van-mìn. Chúng-he Song-chú oi chhut-hien lòi cheu ngì lé; Kì ke yùng-kông oi hién-hien chhai ngì sṳ̂n-song.
[3] Van-koet oi lòi chiap-khiun ngì ke kông; van-vòng oi lòi chhiu-khiun ngì fat-chhut ke kông.
[4] Thèu-nà khià hí-lòi khon ngì chû-vì fat-sên má-ke sṳ! Thai-kâ si̍p-ha̍p, oi chón-to ngì liá-vi lòi. Ngì ke lai-é voi tui yén-yén ke só-chhai chón-lòi; ngì ke moi-é voi chhiong ô-nga-é pûn-ngìn nám chón-lòi.
[5] Ke-sṳ̀ ngì khon-tó liá yit-chhiet voi mân-mien fôn-hí, ngì ke sîm voi po̍k-po̍k thiàu. Voi yû fûng-fu ke chhòi-pó tui thai-hói ke-phién tai ngi̍p-lòi; van-koet ke chhòi-fu voi ngi̍p-to ngì sú-chûng.
[6] Chhai ngì ke thú-thi song, kûi thai-chhṳn tui Mí-thien lâu Yî-fap lòi ke lo̍k-thò mân-phien he; kì-têu voi tai-tén Sṳ-pâ ke vòng-kîm lâu nen-hiông lòi. Ngìn-mìn voi lòi siung-chan Song-chú ke chok-vì.
[7] Kî-tha̍t ke yòng-khiùn chhiòn-phu pûn-ngìn tai-to ngì mien-chhièn, Nì-pai-yok ke yòng-kú chhiòn-phu oi cho sên-ngì, hien chhai chi-thàn táng, sṳ́ Song-chú fôn-hí. Song-chú oi yùng-kông Kì yùng-yeu ke sṳn-thien.
[8] Ke-têu chhiong yùn pî-tén lòi, yu chhiong ngie̍t-kap-è pî-chón teu ke, he má-ke?
[9] Kì-têu he tui yén-yén ke hói-tó chón-lòi ke thai sòn-è, tui Thâ-sṳ̂ chón-lòi ke sòn-è chhai chui thèu-chhièn hàng. Kì-têu chiông Song-ti ke chṳ́-mìn lâu kîm-ngiùn tai-tén chón-lòi, oi yùng-yeu Song-chú — Yî-set-lie̍t sṳ̀n-sṳn ke Song-ti; yîn-vi Kì yí-kîn yùng-yeu ngì lé.
[10] Song-chú tui Yâ-lu-sat-lâng kóng: Ngoi-chhu̍k ngìn voi lòi vi ngì hí sàng-chhiòng; kì-têu ke koet-vòng voi lòi fu̍k-sṳ ngì. Ngài sṳt fat-khién chit-fa̍t ngì, chúng-he liá-ha Ngài oi sṳ̂-ên lìn-mén ngì.
[11] Ngì ke sàng-mùn oi ngit-ya tá khôi-khôi, hó pûn lie̍t-koet ke kiûn-vòng chiông chhòi-pó tai ngi̍p-lòi pûn ngì.
[12] M̀ fu̍k-sṳ ngì ke mìn-chhu̍k lâu koet-kâ chhiòn-phu oi me̍t-mòng; ke-têu koet-kâ voi fông-fi.
[13] Lì-pâ-nun ke miàng-sán, chui-hó ke chhiùng-su, pak-su, vòng-yòng-su, chhiòn-phu oi yun-lòi, chiông Ngài ke sṳn-thien chông-fòng to chhin-chiâng, sṳ́ Ngài tha̍p-kiok ke só-chhai fu-li thòng-fòng.
[14] Sṳt khî-fu ngì ke ngìn, kì-têu ke chṳ́-sûn voi hiong ngì hàng-lî; só-yû méu-sṳ ko ngì ke ngìn, ya chhiòn-phu voi khúi-pai ngì. Kì-têu voi chhṳ̂n ngì cho “Song-chú ke sàng”, chhṳ̂n ngì cho “Yî-set-lie̍t sṳ̀n-sṳn Song-ti ke Siak-ôn-sàng”.
[15] Ngì m̀-voi chai pûn-ngìn fit-thet, pûn-ngìn nâu, m̀-voi chai mò-ngìn kîn-ko. Ngài oi sṳ́ ngì pien-cho yún-yén ke yùng-fà, sàng-cho van-thoi ke hí-lo̍k.
[16] Van-koet voi fôn-hí cheu-ku ngì, lie̍t-vòng voi lòi yông-yuk ngì. Ke-sṳ̀ ngì chhiu voi tî Ngài he chṳ́n-kiu ngì ke Song-chú; Ngài he ngì ke kiu-su̍k Chú, he Ngâ-kok thai-nèn ke Song-ti.
[17] Ngài oi nâ vòng-kîm chún thùng, ngiùn chún thiet, thùng chún su-liau, thiet chún sa̍k-thèu. Ngài oi sṳ́ ngì-têu ke kôn-chóng yung fò-phìn lòi kón-lî, ngì-têu ke liâng-chhiu yung chṳn-ngi lòi chhṳ-lî.
[18] Ngì koet-nui m̀-voi chai thâng-tó khiòng-phau ke sṳ; ngì ke kin-nui m̀-voi chai su-tó fí-me̍t. Ngì thin-chho̍k voi kóng, ngì ke sàng-chhiòng thoi-péu Song-chú ke chṳ́n-kiu, ngì ke sàng-mùn siong-chṳ̂n Song-ti yin-tông su chan-mî.
[19] Ngit-sṳ̀-thèu, ngì mò sî-yeu ngit-thèu cho ngì ke kông; am-pû-sṳ̀, ngì mò sî-yeu ngie̍t-kông fat-kông cheu ngì. Ngài — ngì ke Song-chú he ngì yún-yén ke kông; Ngài — ngì ke Song-ti oi cho ngì ke yùng-kông.
[20] Ngì ke ngit-thèu yún-yén m̀-voi lo̍k-sân, ngì ke ngie̍t-kông yún-yén m̀-voi khiet-thet; Ngài — ngì ke Song-chú oi cho ngì yún-yén ke kông; ngì pî-sông ke ngit-è voi kiet-suk.
[21] Ngì ke ngìn-mìn chhiòn-phu voi cho ngi-ngìn; kì-têu voi yún-yén sṳ̀n-su liá thi. Kì-têu he Ngài chhîn-sú chung ke nun-ngà, he Ngài chhîn-sú cho ke chok-phín, vi-tó oi hién-mìn Ngài ke yùng-kông.
[22] Ngì-têu chui-se ke kâ-thìn voi sàng-cho thai-chhu̍k, chui-ngio̍k ke kâ-chhu̍k voi sàng-cho khiòng-koet. Ngài he Song-chú; chhai sṳ̀-kî sṳ̀n-su̍k ke sṳ̀, Ngài oi sṳ́ liá-sṳ kiak-kiak sṳ̍t-hien.