[1] Song-chú kóng: “Ngì oi thai-sâng sê, chhiong yòng-kok án-hióng, m̀-hó thìn. Oi hiong Ngài ke chṳ́-mìn Yî-set-lie̍t siên-pu kì-têu ke phoi-ngia̍k lâu chhui-ko.
[2] Kì-têu ngit-ngit khiù Ngài, tông-chhiong oi tî Ngài ke tho-lu; kì-têu ke koet-kâ ya tông-chhiong yû hàng chṳn-ngi, fu̍k-chhiùng Ngài ke fap-li̍t. Kì-têu khiù Ngài pûn kì-têu kûng-chṳn ke fap-li̍t, péu-sṳ kì-têu fôn-hí chhîn-khiun Ngài.”
[3] Yî-set-lie̍t-ngìn mun: “Cho-má-ke ngài-têu kim-sṳ̍t, Ngì mò-oi khon? Cho-má-ke ngài-têu khiet-khú siû-hàng, Ngì ya mò-oi chhap?” Song-chú tui kì-têu kóng: “Khon â! Ngì-têu kim-sṳ̍t ke ngit-è, hàn-he chûi-khiù hióng-lo̍k, hàn-he khî-fu kûng-ngìn.
[4] Ngì-têu ke kim-sṳ̍t sṳ́ ngì-têu hàn-kha ok, thîn-thûng tó chhiu siông-chhàu siông-tá. Ngì-têu ke kim-sṳ̍t he án-ngiòng, ngì-têu hàn láu-tó Ngài voi thâng ngì-têu ke khì-tó mâ?
[5] Ngì-têu kim-sṳ̍t ke sṳ̀, châu-tha̍p chhṳ-kâ ke vû-sṳ̂n, khon hí-lòi chhiu-chhiong thèu lài-lài voi châu-thet ke fâ-chhó. Ngì-têu chhai thi-song phû mà-pu, ve fó-fôi, yèn-heu soi chhai táng-kô. Liá kám-he kim-sṳ̍t? Ngì-têu láu-tó Ngài voi fôn-hí án-ngiòng ke kim-sṳ̍t he-mò?
[6] “Ngài só fôn-hí ke kim-sṳ̍t he: Kié-khôi khî-fu ngìn ke só-lien lâu mò kûng-tong ke ak; sṳt-fong su khî-fu ke ngìn, áu-thôn yit-chhiet ke ak.
[7] Oi chiông ngì-têu ke sṳ̍t-vu̍t pûn-pûn tú-kî ke ngìn; chiông ngì-têu ke vuk khôi-fong pûn mò vuk hó-he̍t ke khiùng-khú ngìn; nâ sâm-fu pûn mò hó-chok ke ngìn; chhîn-ngìn khiù ngì pông-chhu, m̀-hó khî-chhie̍t.
[8] “Án-ngiòng, Ngài chhiu voi fôn-hí ngì-têu, chhiong chêu-sṳ̀n-thèu ke ngit-thèu cheu ngì-têu; ngì-têu ke sông-héu chhiu voi ngiàm-sṳ̀ tet-tó yî-chhṳ. Ngài voi hàng chhai ngì-têu ke thèu-chhièn chú-chhṳ̀ kûng-ngi, Ngài ke yùng-kông oi chhai heu-poi pó-fu ngì-têu.
[9] Ngì-têu khì-tó, Ngài yit-thin voi thâng; ngì-têu khiù pông-chhu, Ngài yit-thin tap-yin. “Na-he ngì-têu mò-chai khî-fu ngìn, chit-phi ngìn, lám-sám kóng ngìn ke fái-fa,
[10] na-he ngì-têu nâ pûn tú-kî ke ngìn sṳ̍t, sṳ́ khiùng-khú ngìn tet-tó mân-chiuk, ngì-têu ke kông voi sṳ́ chû-vì ke vû-am pien-cho kông-mìn, am-pû-thèu voi pien-cho tông-chu-thèu.
[11] Ngài — Song-chú voi ki-siu̍k tai-liâng ngì-têu, su hó tûng-sî sṳ́ ngì sîm-mân yi-chiuk, sṳ́ ngì-têu ke kut-thèu khiòng-chong yû-li̍t; chhiu-he chhai châu-hôn ke thi, ngì-têu ya voi chhiong súi-ngièn chhûng-chiuk ke kó-yèn, yû yún-yén m̀-voi châu-thet ke chhièn-súi.
[12] Ngì-têu voi chhai fông-phû táng chhùng-kien, chiông fí-fái chhin-kiú ke kîn-kî chhùng-sîn hí hí-lòi. Heu-thoi voi ki-ngiam ngì-têu he siû-pú sàng-chhiòng lan-khûng ke ngìn, ngì-têu yu chiông vang-thet ke vuk-è chhùng-sîn cháng pûn ngìn he̍t.”
[13] Song-chú kóng: “Na-he ngì-têu sú ôn-sit-ngit cho sṳn-ngit, mò chhai ke-ngit cho chhṳ-kâ fôn-hí ke sṳ; na-he ngì-têu fôn-hí yu chûn-chhung Ngài ke sṳn-ngit, mò chhai ke-ngit lî-hàng, kûng-chok, kóng hàn-fa,
[14] ngì-têu chhiu voi tui Ngài tet-tó hí-lo̍k. Ngài oi sṳ́ ngì-têu chhai sṳ-song su-ngìn chûn-chhung, ngì-têu voi chhai Ngài su-pûn ngì-têu chú-siên Ngâ-kok ke thú-thi song hióng-su fuk-lo̍k. Ngài — Song-chú án-ngiòng siên-pu lé.”