[1] Ngài lòi vi ngài só chhîn-oi ke chhong yit-sú kô, yit-sú yû-koân ngài só chhîn-oi ke lâu Kì ke phù-thò-yèn: Chhai chhin-phì ke sân-kông táng, ngài só chhîn-oi ke khôi yit-te phù-thò-yèn.
[2] Kì yet-sûng nài, ngiâng-thet sa̍k-thèu, chung phín-chúng yù-liòng ke phù-thò. Kì chhai yèn-chûng hí yit-chho sú-mong-thòi, yu chho̍k yit-ke cha-chiú-chhṳ̀. Kì yit-sîm hî-mong kì voi tá tông-hó ke phù-thò, mò sióng-tó tá ke phù-thò phín-chṳt tông-chhâ.
[3] Ngài só chhîn-oi ke chhiu kóng: “Yâ-lu-sat-lâng lâu Yù-thai ke ngìn-mìn â, ngì-têu lòi vi phù-thò-yèn lâu Ngài ke sṳ phìn-lî khon-é.
[4] He m̀-he Ngài mò cheu-ku hó-se? Ngióng-pân Ngài hî-mong kì voi tá tông-hó ke phù-thò, phiên-phiên tá tông-chhâ ke phù-thò?
[5] “Liá-ha Ngài lâu ngì-têu kóng! Ngài oi án-ngiòng lòi chhú-lî Ngài ke phù-thò-yèn: Ngài oi chhak-thet lì-pâ, yù-chhai kì fông-fi, chhak-thet vì-chhiòng, yù-chhai chéu-chhu châu-tha̍p kì.
[6] Ngài oi yù-chhai kì fông-fi; mò-oi siû-chién phù-thò thèn, ya m̀ yet-sûng thú-thi; Ngài oi pûn thi-song sâng-mân chhi̍t-lì lâu net-è. Ngài sṳm-chṳ oi min-lin yùn mo̍k lo̍k-súi chhai yèn-hong.”
[7] Yî-set-lie̍t chhiu-he Song-chú — Van-kiûn Ngièn-soi ke phù-thò-yèn; Yù-thai ngìn-mìn chhiu-he Kì fôn-fôn hí-hí chung ke phù-thò-su. Kì phan-mong kì-têu sṳ̍t-hàng chṳn-ngi, chúng-he khon-tó ke he chhṳ̀-ngìn liù-hiet! Kì phan-mong kì-têu hàng-vì kûng-chṳn, fán-chón tak só-chhai yû hêm yên-vóng ke sâng!
[8] Ngì-têu chhám lé! Ngì-têu thièn lièn thièn, vuk chiap vuk, chhiòn-phu chiam-tén chhṳ-kâ yung, m̀-hén liù yit-ke vi-só pûn phe̍t-ngìn.
[9] Ngài thâng-tó Song-chú — Van-kiûn ke Ngièn-soi án-ngiòng kóng: “Liá-têu tông-thai tông-chiâng ke vuk chhiòn-phu voi fông-thet, mò-ngìn he̍t.
[10] Sṳ̍p kûng-khién ke phù-thò-yèn chang cha-chhut sṳ̍p kûng-sṳ̂n ke chiú; sṳ̍p-làm ma̍k-chúng sû m̀-tó yit-làm ma̍k-é.”
[11] Ngì-têu chhám lé! Ngì-têu tá-chó hong-hí-lòi chhiu lîm ngiàm-chiú, lîm-to pan-ya chui-thiên chui-thi.
[12] Chhai chiú-si̍t chûng, ngì-têu thàn-khìm, thàn-sit, tá-kú, phùn-sêu, lîm-chiú, chúng-he mò koân-sîm ya mò chûn-chhung Song-chú só-cho ke.
[13] Só-yî, Ngài ke ngìn-mìn voi yîn-vi vù-tî pûn-ngìn chok-chéu; kì-têu ke liâng-chhiu voi ngo-sí, ngìn-mìn voi hot-sí.
[14] Yîm-kiên voi tá-khôi thai-choi oi thûn-me̍t kì-têu, chiông chhai Yâ-lu-sat-lâng fôn-lo̍k chûng ke chûn-kui ngìn lâu ngìn-mìn chhiòn-phu thûn thet-hi.
[15] Tak-ke ngìn chhiòn-phu voi tông kien-seu; chûn-kui lâu kiêu-ngau ke ngìn voi kong-cho pî-mì.
[16] Song-chú — Van-kiûn ke Ngièn-soi chú-chhṳ̀ kûng-ngi hién-chhut chhṳ-kâ ke ví-thai; sṳ̀n-sṳn ke Song-ti yung sṳ́m-phan lòi hién-chhut chhṳ-kâ ke sṳ̀n-sṳn.
[17] Ke-sṳ̀, hó-ngiak ngìn ke thi voi sâng-mân yâ-chhó, se yòng-è chhai ke-vi sṳ̍t-chhó, chhiu-chhiong chhai chhṳ-kâ ke chhó-chhòng, se sân-yòng ya voi lòi ke-vi chhìm-sṳ̍t.
[18] Ngì-têu chhám lé! Ngì-têu yí-kîn pûn chhui-ok ko-fam lap-tó lé.
[19] Ngì-têu kóng: “Yù-chhai Song-chú kón-kín cho Kì oi cho ke; ngài-têu sióng-oi khon Kì ke só-cho. Yù-chhai Yî-set-lie̍t sṳ̀n-sṳn ke Song-ti sṳ̍t-hàng Kì ke kie-va̍k; ngài-têu sióng-oi tî Kì ke yi-ngiam.”
[20] Ngì-têu chhám lé! Ngì-têu tiên-to san-ok, tiên-to kông-am, me tiên-to thiàm-fú.
[21] Ngì-têu chhám lé! Ngì-têu hàn chhṳ-kâ láu-tó yû chhûng-mìn chṳ-fi!
[22] Ngì-têu chhám lé! Ngì-têu piang-chiú chhṳ́n yîn-hiùng, thiàu-chiú tá thèu-miàng.
[23] Ngì-têu pûn-ngìn sû-mâi, chiông fái-ngìn chún-cho ngi-ngìn, fán-chón chiông ngi-ngìn ke kûng-ngi chhióng-chéu.
[24] Chhiu-chhiong châu-chhó pûn mâng-fó sêu-thet, ngì-têu ke kîn voi lan-thet, ngì-têu ke fâ voi chhiong chhṳ̀n-fôi pî-chéu; yîn-vi ngì-têu méu-sṳ Yî-set-lie̍t sṳ̀n-sṳn Song-ti ke fap-li̍t, khî-chhie̍t Song-chú — Van-kiûn Ngièn-soi ke kau-thô.
[25] Só-yî, Song-chú oi hiong Kì ke chṳ́-mìn thai fat-khién; Kì oi chhûn-sú lòi tá kì-têu. Sân oi chṳ́n-thung, sṳ̂-thí tôi chhai kiê-lu, lâu lá-sap khiung-yong. Sûi-yèn án-ngiòng, Song-chú ke su-hi hàn-màng so̍t; Kì hàn-he oi khià-sú tá kì-têu.
[26] Song-chú oi yèu thai-khì, fû-seu yit-ke yén-yén ke koet-kâ; Kì oi phùn khiéu-seu tui thi-khi̍t chiông kì-têu ham-lòi. Khon â, kì-têu voi kiak-kiak kón-tén lòi.
[27] Kì-têu tông-chûng mò khioi ke, mò tiet-tó ke, mò tuk-kû ke, ya mò soi-muk ke. Kì-têu ke yêu-tai kiê hèn-hèn, hài-tai thak hó-hó.
[28] Kì-têu ke chien tông-li; kì-têu ke kiûng lâi-hèn. Kì-têu ke mâ-thài pí sa̍k-thèu hàn-kha ngang; kì-têu chan-chhâ ke lin-é chhiong kién-fûng chón án-kuk.
[29] Kì-têu thai-sâng sê, chhiong sṳ̂-é chhin-hò, chhiong se sṳ̂-é tá-tó yâ-chhu hàm-tén chéu, mò-ngìn nèn kiu chón-lòi.
[30] To ke-ngit, kì-têu voi tui Yî-set-lie̍t thai-sâng sê, chhiong thai-hói fat-chhut ho-sâng. Ngì-têu khon liá-te thú-thi! Tak só-chhai chhûng-mân vû-am lâu kân-khú! Kông-mìn pûn vû-yùn châ-thet pien-am lé.