[1] Ngài-têu ke thi̍t-ngìn voi tù-tó châi-nan lé! Kì-têu kín hi chhióng phe̍t-ngìn, m̀-sṳt pûn-ngìn chhióng-ko; kì-têu cha-khî ngìn, m̀-sṳt pûn-ngìn cha-khî. Chúng-he tén-to kì-têu mò fap-thu hi chhióng ngìn, chai cha-khî ngìn ke sṳ̀, kì-têu chhiu voi pûn-ngìn chhióng, pûn-ngìn cha-khî lé.
[2] Song-chú â, khiù Ngì lìn-mén ngài-têu. Ngài-têu chiông hî-mong kâu-thok Ngì. Khiù Ngì ngit-ngit pó-fu ngài-têu, chhai ngài-têu ngùi-hiám ke sṳ̀ chṳ́n-kiu ngài-têu.
[3] Ngì vi ngài-têu chan-chên, van-koet chhiu voi si-san, siông-chhṳ̀ ke sâng yit fat-chhut, chung thi̍t-ngìn chhiu voi thò-chéu.
[4] Kì-têu ke chan-li-phín chhiòn-phu pûn-ngìn chhióng-chéu, chhiong nùng-chok-vu̍t pûn kîn-ko ke chhó-máng sṳ̍t chhiang-chhiang yit-yong.
[5] Song-chú sṳ̍t-chhai ví-thai! Kì tui thiên-táng kón-lî van-vu̍t. Kì sṳ́ Siak-ôn chhûng-mân chṳn-ngi lâu kûng-phìn,
[6] yu sṳ́ koet-thai mìn-ôn. Kì yún-yén pó-fu Kì ke chṳ́-mìn, su kì-têu chṳ-fi lâu kien-sṳt. Kin-vi Song-chú chhiu-he kì-têu chui-thai ke chhòi-pó.
[7] Khon nâ, yúng-sṳ chhai kiê-hong fû-khiù pông-chhu; chhìm-khiù fò-phìn ke sṳ́-chá fat-chhut thung-khú ke kieu-sâng.
[8] Thai-lu ngùi-hiám, mò-ngìn kám-hàng. Thiàu-yok fi-thet, ha̍p-thùng mò-háu; ngìn lâu ngìn fu-siông mò sin-ngim.
[9] Thú-thi fông-liòng; Lì-pâ-nun ke su-nà khû-châu; Sâ-lùn ke sân-lak fông-thet; Pâ-sân lâu Kâ-me̍t-sân ke su-ya̍p chhiòn-phu lo̍k chhiang-chhiang.
[10] Song-chú tui van-koet kóng: “Liá-ha Ngài oi khôi-sṳ́ hàng-thung! Ngài oi pûn ngì-têu khon-tó Ngài ke li̍t-liong yû kí-thai!
[11] Ngì-têu ke kie-va̍k he lùng-hông; ngì-têu ke hàng-thung he vò-kón. Ngài ke Lìn oi chhiong fó án-ngiòng chiông ngì-têu só-cho ke sêu-thet!
[12] Ngì-têu voi chhiong sa̍k-thèu sêu-thet, sàng-cho sa̍k-fôi, chhiong kot hâ-lòi ke net-è pûn fó sêu-thet, sàng-cho fó-fôi.
[13] Yén-fông ke ngìn â, ngì-têu oi thâng Ngài só-cho ke yit-chhiet; fu-khiun ke ngìn â, ngì-têu oi sṳ̀n-ngin Ngài ke khièn-nèn.”
[14] Chhai Siak-ôn ke chhui-ngìn voi chho̍k-kiâng, mò kin-khièn ke ngìn voi kiâng-to pi̍t-pi̍t-chhat. Kì-têu kóng: “Song-ti ke sṳ́m-phan chhiong yún-yén m̀-voi vû-thet ke fó, ngài-têu chûng-kiên yû má-ngìn m̀-voi pûn liá-ke fó sêu-thet nè?”
[15] Na-he ngì-têu hàng-vì chṳn-phai, kóng-fa sṳ̀n-sṳ̍t, ngì-têu chhiu nèn sên-chhùn. M̀-hó khî-fu khiùng-khú ngìn; m̀-hó pûn-ngìn sû-mâi; m̀-hó chhâm-kâ chhṳ̀-ngìn ke kie-mèu; m̀-hó cho fái-sṳ.
[16] Án-ngiòng, ngì-têu chhiu voi yû ôn-chhiòn, chhiong he̍t chhai kiên-ku ke sàng-pó chûng án vún-tong. Ngì-têu ke liòng-sṳ̍t chhûng-chiuk, súi-ngièn m̀-voi châu-thet.
[17] Ngì-têu voi chai khon-tó yit-ke kiûn-vòng ke yùng-kông, lâu tông-fat ke koet-thú.
[18] Ngì-têu voi fì-sióng thèu-pái tet-ngìn-kiâng ke sṳ, chhṳ-kâ mun chhṳ-kâ kóng: “Sû-sṳ ke chhai nai-vi, tá-soi ke chhai nai-vi, chóng sàng-mùn ke chhai nai-vi?”
[19] Ngì-têu m̀-voi chai khon-tó ke-têu khiòng-phau ke ngìn kóng ngì-têu thâng m̀-sṳt ke ngoi-koet fa.
[20] Ngì-têu khon Siak-ôn! Kì he ngài-têu khin-chuk chiet-khì ke sàng. Ngì-têu khon Yâ-lu-sat-lâng! Ngài-têu chhai liá tî-poi ngióng-pân ôn-chhiòn! Kì voi chhiong yún-yén m̀-voi sái-chéu ke chong-phùng; kì ke màu-tâng m̀-sṳ́ chai pâng chhut-lòi, sok-è yún-yén m̀-voi lâi-thôn.
[21] Song-chú oi chhai ke-vi hién-mìn Kì ke yùng-kông. Ngài-têu voi he̍t chhai hò-pa tông-fat ke hò-sùn; thi̍t-ngìn chhang ke thai-sòn m̀-voi chhai ke-vi kîn-ko.
[22] Chhiu-son thi̍t-ngìn ke sòn-è sṳ́-ngi̍p ngài-têu ke kóng-héu, ngùi-kôn ke sok-è voi ngiung-thet, pu-phùng tá m̀-khôi; sòn-táng ke fo sàng-cho ngài-têu ke chan-li-phín, lièn pâi-kiok ke ya yû yit-fun. Song-chú he ngài-têu ke sṳ́m-phan chá; Song-chú he ngài-têu ke li̍p-fap chá; Song-chú he ngài-têu ke vòng; Kì oi chṳ́n-kiu ngài-têu.
[24] He̍t chhai ngài-têu koet-nui ke ngìn m̀-voi chai-yû phiang-thung ke kân-khú; sàng-nui ngìn-mìn ke chhui ya chhiòn-phu tet-tó sa-miên.