[1] Ke-sṳ̀, Hî-sî-kâ-vòng phiang-to voi-sí. Â-mô-sṳ̂ ke lai-é siên-tî Yî-soi-â hi kien vòng, tui kì kóng: “Song-chú án-ngiòng kóng: ‘Ngì oi liù vùi-ngièn, kâu-tai heu-sṳ, yîn-vi ngì ke phiang m̀-voi hó, yit-thin voi sí.’ ”
[2] Hî-sî-kâ fân-sṳ̂n mien-hiong piak, khì-tó kóng:
[3] “Song-chú â, khiù Ngì ki-ngiam ngài sṳt sṳ̀n-sîm sṳ̀n-yi sṳ-fung Ngì, cho Ngì khon-cho chho̍k ke sṳ.” Hî-sî-kâ ngiûn-m̀-he̍t chhiu khôi-sâng thai-kieu.
[4] Só-yî, Song-chú fûn-fu Yî-soi-â kóng:
[5] “Ngì hi Hî-sî-kâ ke-vi, tui kì kóng: ‘Song-chú — ngiâ chú-siên Thai-ví ke Song-ti án-ngiòng kóng: Ngài yí-kîn thâng-tó ngì ke khì-tó, ya khon-tó ngì ke muk-chṳp; Ngài oi pûn ngì sṳ̍t-kâ sṳ̍p-ńg ngièn.
[6] Ngài ya oi chṳ́n-kiu ngì lâu Yâ-lu-sat-lâng thot-lì Â-sut fòng-ti ke sú; Ngài oi ki-siu̍k pó-fu liá-sàng.’ ”
[7] Yî-soi-â kóng: “Liá he Song-chú pûn ngì ke seu-thèu, lòi chṳn-mìn Kì yit-thin voi sṳ̀n-chhiu Kì só-kóng ke:
[8] Chhai Â-ha̍p-sṳ̂-vòng só-chho ke ngit-kûi, Song-chú oi sṳ́ ngit-thèu yáng to-thui sṳ̍p-phu.” Kó-yèn, ngit-kûi ke ngit-thèu yáng to-thui sṳ̍p-phu.
[9] Yù-thai-vòng Hî-sî-kâ phiang-hó yî-heu, siá yit-sú chan-mî sṳ̂, kóng:
[10] Sûi-yèn ngài ke ngièn-ngit hàn chhiong tông-chu ke ngit-thèu, ngài láu-tó tông-kiak chhiu voi ngi̍p-hi yîm-kiên, mò fap-thu hióng-su thiên-ngièn lé.
[11] Ngài láu-tó chhai liá sṳ-kiên m̀-voi chai kien-tó Song-chú, ya m̀-voi chai khon-tó só-yû hàn chhai sṳ-kiên ke ngìn.
[12] Ngài ke sâng-miang voi lì-khôi ngiuk-sṳ̂n lé, chhiong chóng-yòng ke ngìn chong-phùng pûn-ngìn chhak-thet, chhiong pu-é pûn-ngìn tui chṳt-pu-kî kot-hâ. Ngài sióng Song-chú oi kiet-suk ngài ke sâng-miang, ngài m̀-voi yû thiên-kông-ngit, thiên-kông am-pû lé.
[13] Ngài kûi am-pû thung-khú to kín-chhên, ngài só-yû ke kut-thèu chhiong pûn sṳ̂-é ngâu-sui; ngài sióng Song-chú oi kiet-suk ngài ke sâng-miang, ngài m̀-voi yû thiên-kông-ngit, thiên-kông am-pû lé.
[14] Ngài khiù pông-chhu ke sâng chhiong yen-é chiu-chiu-kún, chhiong pha̍k-ho̍k-é kín-kieu, chhiong ngie̍t-kap-è khu-khu-kún. Ngài ke muk-chû yîn-vi mong-thiên khon-to tông-khioi. Chú â, ngài chhai khun-khú chûng, khiù Ngì lòi kiu ngài.
[15] Song-chú cheu Kì só-kóng ke cho; ngài yû má-ke hó-kóng nè? Ngài ke sîm kân-khú to soi m̀-lo̍k kau.
[16] Chú â, ngìn voi sâng he yîn-vi Ngì, ngài ke lìn lâu sâng-miang ya he yîn-vi Ngì; khiù Ngì yî-chhṳ ngài, pûn ngài ki-siu̍k sâng hâ-hi!
[17] Khon â, ngài su ke khú voi sṳ́ ngài tet-tó phìn-ôn; Ngì siak ngài, chhiu kiu ngài thot-lì me̍t-mòng ke ham-chiáng, yîn-vi Ngì sa-miên ngài só-yû ke chhui-ko.
[18] Yîn-vi yîm-kiên mò-ngìn voi kám-chhia Ngì; sí-thet ke ngìn m̀-voi chan-mî Ngì; lo̍k yîm-kiên ke ngìn m̀-voi ngióng-mong Ngì ke sin-sṳ̍t.
[19] Chṳ́-yû hàn-sâng ke ngìn — hàn-sâng ke ngìn chang voi chan-mî Ngì, chhiu-chhiong ngài liá-ha chan-mî Ngì. Cho â-pâ ke oi lâu chṳ́-ńg kóng, Ngì he ngióng-pân sin-sṳ̍t!
[20] Song-chú oi kiu ngài! Ngài-têu oi thàn-khìm, chhong-kô chan-mî Kì; hàn-yû sâng-miang ke ngit, ngài-têu oi chhai Song-chú ke sṳn-thien chûng chan-mî Kì.
[21] Yî-soi-â yí-kîn fûn-fu vòng ke phu̍k-ngìn, oi nâ yit-te vù-fâ-kó kâu-yo̍k lòi, tap chhai lia̍p-é táng, vòng chhiu voi hó.
[22] Hî-sî-kâ yí-kîn mun-ko: “Yû má-ke seu-thèu hó chṳn-mìn ngài hàn nèn to Song-chú ke sṳn-thien hi kin-pai nè?”