[1] Kì ke chṳ́-mìn en-kóng: Má-ngìn voi siông-sin ngài-têu liá-ha só-kóng ke nè? Má-ngìn voi sióng-tó liá he Song-chú só-cho ke sṳ?
[2] Phu̍k-ngìn chhai Song-chú mien-chhièn chhiong sîn-ngà pau chhut-lòi, chhiong fâ-chhó chhai châu-nài tî-poi sâng-kîn. Kì mò phai-thèu, ya m̀ yèn-tàu, m̀-voi khip-yîn ngài-têu ke chu-yi; kì ke ngoi-péu phìn-sòng, m̀-voi tet-tó ngài-têu ke hiûn-mu.
[3] Kì pûn-ngìn méu-sṳ, pûn-ngìn vok-thet; kì ngiûn-su thung-khú, sòng-sòng yù-sèu. Chhiong ngìn êm-tén mien, mò-ngìn oi tap kì, ngìn-ngìn khon-khiâng kì; ngài-têu ya m̀ chûn-kin kì.
[4] Khì-sṳ̍t, kì he sṳ̀n-su ngài-têu tông-su ke yù-sèu; kì tâm-tông ngài-têu só yin-tông su ke thung-khú. Chúng-he ngài-têu láu-tó kì yin-kôi su chit-fa̍t, yin-kôi pûn Song-ti piên-tá, hìn-fa̍t!
[5] Vi-tó ngài-têu ke chhui-ok kì su chhiuk-sông; vi-tó ngài-têu ke ko-fam kì su thu̍k-tá. Yîn-vi kì su chit-fa̍t, ngài-têu tet-tó phìn-ôn; yîn-vi kì su piên-tá, ngài-têu tet-tó yî-hó.
[6] Ngài-têu chhiong mì-lu ke yòng-khiùn, tak-sà hàng chhṳ-kâ ke lu. Chúng-he ngài-têu yit-chhiet ke ko-sṳt, Song-chú sṳ́ kì thoi ngài-têu tâm-tông.
[7] Kì pûn-ngìn pet-hoi ngiûn-su kân-khú, chúng-he tiâm-tiâm mò kóng pan-ki fa. Kì chhiong pûn-ngìn khiên-hi chhṳ̀ ke se-yòng, yu chhiong pûn-ngìn chién-mô ke yòng, kì yit-ki fa ya m̀ kóng.
[8] Kì pûn-ngìn chok-hi koân, su sṳ́m-phan, chhú sí-hìn. Ke sṳ̀-thoi ke ngìn mò-ngìn sióng tet-tó: Kì he vi-tó ngài chṳ́-mìn ke chhui-ok pûn-ngìn piên-tá, vi ngài chṳ́-mìn ke ko-fam pûn-ngìn tui sṳ-kiên chién-chhù.
[9] Sûi-yèn kì m̀-sṳt yû phau-li̍t ke hàng-vì, ya mò kóng-ko fâ-liâu, chúng-he kì lâu sià-ok ke ngìn mài khiung-ha; kì lâu chhòi-chú yung khiung-chak mu-thi.
[10] Kì su-hoi, su thung-khú he Song-chú ke chṳ́-yi; kì ke sí he su̍k-chhui ke chi. Kì voi khon-tó chhṳ-kâ ke heu-thoi; kì voi hióng chhòng-su. Thûng-ko kì, Song-chú oi sṳ̍t-hien Kì ke kie-va̍k.
[11] Kîn-ngiam ko yit-sên ke thung-khú yî-heu, kì chhiu sîm-mân yi-chiuk; yîn-vi kì tî chhṳ-kâ ke su-khú he yû háu-kó ke. Song-chú kóng: Ngài kûng-ngi ke phu̍k-ngìn oi sṳ́ chhin-tô ngìn sàng-cho ngi-ngìn; kì oi tâm-tông kì-têu ke chhui.
[12] Só-yî, Ngài oi sṳ́ kì chhai ví-thai ke ngìn tông-chûng chhô thai-vi, chhai khiòng-chong ke ngìn tông-chûng pûn chan-li-phín. Kì chhṳ-ngien hî-sên sâng-miang, sṳ̀n-tâm chhui-ngìn ke miang-yun. Kì tâm-tông chung-ngìn ke chhui, vi kì-têu ke ko-fam khì-tó.