[1] Hâ-poi he yû-koân “Yi-siong Sân-lak” ke sin-sit. Fat-sên má-ke sṳ? Chhiòn-sàng ke ngìn cho-má-ke sông vuk-táng hi nè?
[2] Chhiòn-sàng nau-nau ngie̍t-ngie̍t, tak só-chhai chhûng-mân fôn-hí. Ngì-têu ke thùng-pâu sí-thet, pin m̀-he sí chhai tô-kiam lâu chan-chhòng.
[3] Ngì-têu ke liâng-chhiu màng sa yit-kî chien chhiu pûn-ngìn chok-tó; thò-to yén-fông ke chan-sṳ ya pûn-ngìn chok chón-lòi.
[4] Liá-ha m̀-hó lòi chhap ngài, yù-chhai ngài thai-sâng kieu! M̀-hó lòi ôn-ví ngài, yîn-vi ngài ke thùng-pâu chhiòn-phu sí-thet lé.
[5] Chhai “Yi-siong Sân-lak” chûng, liá he chho̍k-kiâng, sṳt-phai, fun-lon ke ngit-è; liá he Chṳ-kô ke Song-chú — Van-kiûn ke Ngièn-soi só kâ-pûn ngài-têu ke. Ngài-têu ke sàng-chhiòng pûn-ngìn kûng-vang, khiù kiu-miang ke sâng chhai sân-lak chûng kín yin-sâng.
[6] Yî-làn ke khì-pîn lâu chan-chhâ lòi lé, chien-thoi tú chông-mân chien. Kit-ngí ke phu-pîn ya nâ-tén tún-phài chhièn-lòi.
[7] Yù-thai chhin-phì ke sân-lak chûng mân-mân he chan-chhâ; khì-pîn chhai Yâ-lu-sat-lâng sàng-mùn chhièn pài-chhṳn, chún-phi siông-chhṳ̀.
[8] Yù-thai ke fòng-sien pûn-ngìn kûng-pho. Ke-sṳ̀, ngì-têu yí-kho pîn-hi chhông-khu nâ chhut-lòi ke vú-hi.
[9] Ngì-têu khon-tó Thai-ví-sàng ke sàng-chhiòng yû chhin-tô lan-khûng, tén-tén ngì-têu hi-pú. Ngì-têu sùn-chhà Yâ-lu-sat-lâng só-yû ke vuk-è, chhak-thet yit phu-fun, nâ chhak hâ-lòi ke sa̍k-thèu pú sàng-chhiòng lan-khûng ke só-chhai. Vi-tó chit-chhùn la-ngiak ke súi,
[11] ngì-têu chhai lióng-san sàng-chhiòng chṳ̂-kiên yet yit-ke súi-chhṳ̀, chiông khiu súi-chhṳ̀ ke súi theu-to ke-vi hi. Só-yû liá-têu sṳ-chhìn Song-ti chó chhiu ôn-phài hó-se, ya cho-to tông-hó; chúng-he ngì-têu m̀-thâng Kì ke fa, m̀-chhap Kì.
[12] Ke-sṳ̀, Chṳ-kô ke Song-chú — Van-kiûn ke Ngièn-soi ham ngì-têu ôi-sông thai-kieu, thi-kông thèu-nà-mô, chok mà-sâm.
[13] Chúng-he, ngì-têu hàn chhai fôn-hí khoai-lo̍k. Ngì-têu chhṳ̀ ngiù-yòng, thai-sṳ̍t thai-lîm. Ngì-têu kóng: “Hien sṳ̍t hien hó, voi sí sèu-chó.”
[14] Ngài chhîn-ngí thâng-tó Song-chú — Van-kiûn ke Ngièn-soi lâu ngài kóng: “Kì-têu yit-ngit hàn-chhôi, Ngài chhiu yit-ngit m̀ sa-miên kì-têu ke chhui-ok. Ngài — Chṳ-kô ke Song-chú, Van-kiûn ke Ngièn-soi án-ngiòng siên-pu lé.”
[15] Chṳ-kô Song-chú — Van-kiûn ke Ngièn-soi fûn-fu ngài hi kien kiûng-thìn ke sṳ-vu thai-sṳ̀n Sa-pak-nâ, kín-ko kì:
[16] “Ngì he má-ngìn, ngióng-kám chhai sân-piên ke phàn-sa̍k chûng vi chhṳ-kâ yet fùn-mu?
[17] Ngì chhṳ-kâ láu-tó he chhung-yeu ke ngìn-vu̍t; chúng-he Song-chú oi chiông ngì ngiâm hí-lòi yu fit chhut-hi,
[18] chiông ngì kién-cho yit-thòn, fit-to yit-ke thai-koet hi. Ngì voi sí chhai ke-vi, sí chhai ngì yit-chhṳ̍t láu-tó tông kông-yùng ke chan-chhâ sùn. Ngì án-ngiòng siû-yu̍k vòng-sṳt!
[19] Song-chú m̀-chún ngì chhô kô-vi, oi chiông ngì lâi hâ-lòi.”
[20] Song-chú tui Sa-pak-nâ kóng: “Ke-sṳ̀, Ngài oi chiông Ngài ke phu̍k-ngìn — Hî-le̍t-kâ ke lai-é Yî-li-â-kin ham-lòi.
[21] Ngài oi nâ ngì ke chhèu-fu̍k pûn kì chok, nâ ngì ke yêu-tai pûn kì kiê; Ngài oi chiông ngì ke khièn-li̍t chhiòn-phu kâu-pûn kì. Kì voi chhiong â-pâ án-ngiòng khon-ku Yâ-lu-sat-lâng lâu Yù-thai ke ngìn-mìn.
[22] Ngài oi chiông Thai-ví vòng-chhèu ke só-sṳ̀ kâu-pûn kì. Kì só tá-khôi ke, mò-ngìn nèn-koân; kì koân-thet ke, mò-ngìn nèn-khôi.
[23] Ngài oi chiông kì piong chhai vún-ku ke só-chhai, chhiong yung tâng-é tâng he̍t-he̍t án-ngiòng; kì ke chhiòn-kâ voi yîn-vi kì lòi tet-tó yùng-yeu.
[24] “Chúng-he, kiâ-pâ vuk-hâ ke chṳ́-chṳ́ sûn-sûn voi sàng-cho kì ke chhûng-tâm. Kì-têu chhiòn-phu yí-lai kì, chhiong vo̍k-é lâu chiú-âng koa chhai su-tâng táng-kô yit-yong.
[25] Yû yit-ngit, ke tông-chap ke su-tâng voi yîn-vi thet-chhûng chak-to chhia-chhia, chṳ-to thôn-chiet; koa chhai su-tâng táng-kô ke tûng-sî chhiòn-phu voi tiet hâ-lòi.” Song-chú — Van-kiûn ke Ngièn-soi án-ngiòng siên-pu lé.