[1] Song-chú kóng: Ngài ke phu̍k-ngìn Ngâ-kok, Ngài ke sién-mìn Yî-set-lie̍t â, liá-ha ngì oi thâng!
[2] Ngài he chhóng-chho ngì ke Song-chú, tui ngì yit chhut-se, Ngài chhiu pông-chhu ngì. M̀-sṳ́ kiâng! Ngì he Ngài ke phu̍k-ngìn, ngì he Ngài só-siak ke sién-mìn.
[3] Ngài oi kong-yí pûn châu-hôn ke thú-thi, oi sṳ́ sâ-mo̍k yúng-chhut chhièn-súi. Ngài oi chiông Ngài ke Lìn kong-pûn ngì ke heu-thoi, oi su-fuk pûn ngì ke chṳ́-sûn.
[4] Kì-têu voi sên-chóng chhiong súi-piên ke chhiâng-chhó, meu-sṳn chhiong hò-pa sùn ke liû-su.
[5] Yû-ngìn kóng: “Ngài su̍k Song-chú”; ya yû-ngìn chhṳ-chhṳ̂n he su̍k Ngâ-kok ke ngìn-mìn; yu yû-ngìn chhai sú-hong siá-tén: “Kûi-pûn Song-chú ke”; kì-têu lûng-chúng oi chhâm-kâ Yî-set-lie̍t ke hòng-lie̍t.
[6] Song-chú — Yî-set-lie̍t ke kiûn-vòng, Van-kiûn ke Ngièn-soi — kiu-su̍k Chú án-ngiòng kóng: Ngài he khôi-sṳ́, Ngài he kiet-suk; Ngài yî-ngoi mò Song-ti.
[7] Má-ngìn lâu Ngài pí é-tet, kì cho-tet chhut-lòi kóng-mìn! Má-ngìn yû phan-fap cho Ngài cho-ko ke sṳ? Má-ngìn yû fap-thu yi-ngièn chiông-lòi ke sṳ? Kì cho-tet chiông voi fat-sên ke sṳ kóng chhut-lòi â!
[8] Ngài ke chṳ́-mìn â, m̀-hó chho̍k-kiâng! Ngài m̀-he chó chhiu chiông kú-chó ke sṳ chhiòn-phu yi-ngièn ko? Ngì-têu chhiu-he Ngài ke chṳn-ngìn. Ngài yî-ngoi, hàn-yû phe̍t ke Song-ti mò? Mò pan-ke! Sṳ̍t-chhai mò khì-thâ ke Phàn-sa̍k!
[9] Tiâu-khiet ngiéu-siong ke ngìn chhiòn-phu he hî-khûng, yu tá-sóng kûng; kì-têu só ngin-vì tông-yû ka-chhṳ̍t ke ngiéu-siong sṳ-sṳ̍t-song mò pan-si̍t ka-chhṳ̍t. Pai ke-têu sṳ̀n-mìn ke ngìn khon m̀-tó chṳ̂n-siong, má-ke tû m̀-tî; kì-têu pit-thin voi tù-tó kien-seu.
[10] He má-ngìn chṳ-chho sṳ̀n-siong, chu-chho mò-yung ke ngiéu-siong?
[11] Khon â, só-yû pai ngiéu-siong ke voi tù-tó kien-seu; chho ngiéu-siong ke ya he ngìn thin-thin. Chhiu-son kì-têu chhiòn-phu chhi-si̍p khî khiung-ha, kì-têu mien-tui Ngài ya chhiòn-phu voi chho̍k-kiâng, voi kien-seu.
[12] Tá-thiet ke nâ yit-te thiet piong chhai fó-tú sêu, yung khiòng-chong ke sú nâ-hí thiet-chhùi, chiông thiet-è chhùi sṳ̀n-hìn. Kì chhut-li̍t tá, to tú-kî mò-li̍t, yu mò-súi lîm chhiu tông-khioi tông-thiám.
[13] Cho muk-siong ke chhí su-liau, yung me̍t-téu thàn-sien, yung phàu-è phàu-phiàng, yung yèn-chhak va̍k mù-hìn, khat-cho ngìn ke hìn-siong, yu-chiâng yu-chhiong, oi piong chhai meu-tú.
[14] Kì cho-tet hi chám hiông-pak-su, ya-he chhí su-lìm chûng ke siong-su ya-he khoai-muk lòi-yung. Kì ya cho-tet chung chhiùng-su, tén-to lo̍k-yí sṳ́ kì thai-thèu hí-lòi.
[15] Ngìn khó-nèn chiông liá su ke yit phu-fun cho chhèu lòi sêu, nâ yit phu-fun hí-fó lòi phoi-sêu ya-he phoi-piáng, nang-ngoi yit phu-fun khat-cho sṳ̀n-mìn pûn-ngìn pai.
[16] Kì nâ su-é lòi sêu, chhai ke táng-kô phoi-ngiuk, sṳ̍t-to páu-páu. Kì ya khó-nèn sêu su-é lòi phoi-fó, kóng: “Â! Yû fó chhin-hó, chhin sêu-nôn!”
[17] Chui-heu, kì yung chhûn-tó ke yit phu-fun khat ngiéu-siong lòi khúi-pai, khì-tó kóng: “Ngì he ngài ke sṳ̀n-mìn, khiù ngì lòi-kiu ngài!”
[18] Kì-têu sṳ̍t-chhai mò chṳ-sṳt yu m̀ hiáu-tet! Kì-têu muk-chû êm-tén m̀ khon, thèu-nó set-tén m̀ sióng.
[19] Chṳ́-oi chṳ-chho ngiéu-siong ke ngìn thèu-nó thîn-thûng yit-ha, sióng yit-ha, chhiu voi kóng: “Ngài yung khiung-thèu su ke su-liau, yit phu-fun cho chhèu lòi sêu, phoi-piáng, phoi-ngiuk lòi-sṳ̍t; nang-ngoi yit phu-fun yung-lòi khat ngiéu-siong, ngài hàn-oi khúi-pai liá-te su-khi̍t-thèu mâ?”
[20] Liá kám m̀-he chhiong nâ fó-fôi chhûng-kî? Kì ke ngong-tong sṳ́ kì hàng-vì phiên-chhâ, mò phan-fap kiu chhṳ-kâ; kì m̀ sṳ̀n-ngin sú cho ke ngiéu-siong he hî-ká ke.
[21] Song-chú kóng: Ngâ-kok â, oi ki-tet liá-têu sṳ; Yî-set-lie̍t â, ngì he Ngài ke phu̍k-ngìn. Ngài chho ngì, oi ngì cho Ngài ke phu̍k-ngìn; Ngài yún-yén m̀-voi m̀ ki-tet ngì.
[22] Ngài sa-miên ngì ke ko-fam lâu chhui-ok, sṳ́ kì-têu chhiong vû-yùn lâu mùng-yên san-thet yit-yong; ngì oi kûi-hiong Ngài, yîn-vi Ngài kiu-su̍k ngì.
[23] Thiên â, oi fôn-fû! Thi chui-chhṳ̂m ke só-chhai â, oi thai-sâng chhong! Khiùn-sân â, chhiòn-phu oi fôn-fû! Su-lìm lâu khì-chûng ke su-é â, chhiòn-phu lòi chhong-kô! Song-chú yí-kîn kiu-su̍k Ngâ-kok; Kì yí-kîn thûng-ko Yî-set-lie̍t hién-chhut yùng-kông.
[24] Song-chú — ngì ke kiu-su̍k-chá kóng, tui mû-thôi chhóng-chho ngì ke Song-ti án-ngiòng siên-pu: Ngài he Song-chú, chhóng-chho van-vu̍t ke Chú-chái. Ngài chhṳ-kâ chán-khôi thiên-khûng; Ngài chhîn-chhṳ phû-sat thai-thi.
[25] Ngài sṳ́ puk-koa ke ngìn tiên-khòng, sṳ́ son-miang ke phan-ton sṳt-háu. Ngài yàng-ko chhûng-mìn ngìn, chṳ́-chhut kì-têu ke “chṳ-fi” chhiòn-phu he ngong-tong.
[26] Chúng-he, Ngài ke phu̍k-ngìn kóng yi-ngièn, Ngài ke sṳ́-chá kie-va̍k ke-sṳ̀, Ngài sṳ́ ke-têu yi-ngièn lâu kie-va̍k chhiòn-phu sṳ̍t-hien. Ngài lâu Yâ-lu-sat-lâng kóng, hàn voi yû-ngìn chhai ke-vi he̍t; Ngài lâu Yù-thai kóng, Ngài oi tui fông-liòng chûng chhùng-kien Yù-thai ke sàng-sṳ.
[27] Ngài min-lin hói-súi châu-thet; Ngài min-lin hò-pa pien-cho hôn-thi.
[28] Ngài tui Pô-sṳ̂-vòng Sai-lû-sṳ kóng: Ngì oi cheu-ku Ngài ke yòng-khiùn, chṳp-hàng Ngài ke chṳ́-yi. Ngì oi ha-lin chhùng-kien Yâ-lu-sat-lâng; ngì oi min-lin kien-li̍p sṳn-thien ke kî-chhú.