[1] Song-chú kóng: “Ngài chún-phi hó-se oi thâng kì-têu ke khì-khiù, chúng-he kì-têu m̀ khiù. Ngài kín tén kì-têu lòi chhìm Ngài; chúng-he kì-têu m̀ chhìm. Ngài kín hêm: ‘Ngài chhai liá-vi! Ngài chhai liá-vi!’ chúng-he liá-ke koet-kâ yit-chhṳ̍t m̀-hén hiong Ngài khì-tó.
[2] Ngài kûi-ngit ya̍k-sú hêm ke-têu phoi-ngia̍k ke chṳ́-mìn, chúng-he kì-têu tông ngang-kiáng, sùi chhṳ-kâ ke yi-sṳ cho fái-sṳ.
[3] Kì-têu sṳ̀-sòng tông Ngài ke mien, ngiâ Ngài fat-khién. Kì-têu chhai ‘sṳ̀n-sṳn fâ-yèn’ tú, chhai ngoi-kau ke chi-thàn táng sêu-hiông, hien-chi.
[4] Am-pû-thèu, kì-têu chhô chhai chhúng-pû, chhai sân-lùng tú ko-ya, chhai ke-vi mun kúi-sṳ̀n. Kì-têu sṳ̍t chû-ngiuk, lîm mò chhiang-li ke thông,
[5] yèn-heu tui phe̍t-ngìn kóng: ‘Sám-khôi! M̀-hó chiap-khiun ngài-têu ô; ngài-têu liá-ha pí ngì-têu sṳn-kiet!’ Chú kóng: ‘Ngài sṳ̍t-chhai mò phan-fap ngiûn-su liá-têu ngìn ke hàng-vì; Ngài oi thai fat-fó lé.’
[6] “Khon â, Ngài siá-hó phan-kiet sû. Ngài chhie̍t-tui m̀-voi tiâm-tiâm, Ngài yit-thin voi chhai kì-têu sṳ̂n-hong sṳ̂-hàng po-yin.
[7] Ngài oi yîn-vi kì-têu lâu kì-têu chú-siên só-fam ke chhui po-yin kì-têu. Kì-têu chhai sân-táng ke meu-tú sêu-hiông, chhai ke-vi sâu-nat Ngài, só-yî Ngài oi cheu kì-têu ke fái hàng-vì chit-fa̍t kì-têu.”
[8] Song-chú án-ngiòng kóng: “Yit-chhon phù-thò chûng hàn-yû cho-tet cho chiú ke, ngìn chhiu kóng: ‘M̀-hó chiông kì fit-thet, yîn-vi tông-chûng hàn-yû hó ke.’ Khiung-yong, yîn-vi Ngài ke-têu phu̍k-ngìn ke yèn-ku, Ngài ya m̀ fí-me̍t Ngài só-yû ke chṳ́-mìn.
[9] Ngài oi su-fuk pûn Ngâ-kok ke heu-thoi, sṳ́ Yù-thai kî-chhu̍k ke ngìn sṳ̀n-su Ngài ke-têu sân. Ngài ke sién-mìn voi sṳ̀n-su ke-thi, Ngài ke-têu phu̍k-ngìn voi he̍t chhai ke-vi.
[10] Kì-têu voi chhai sî-phién ke Sâ-lùn phìn-ngièn song chóng yòng-è, chhai tûng-phién ke Â-kot sân-lak chûng chóng ngiù-è; liá-têu he Ngài oi pûn chhìm-khiù Ngài ke chṳ́-mìn ke.
[11] “Chúng-he, ngì liá-têu lì-khôi Song-chú ke ngìn, yu m̀ ki-tet Siak-ôn — Ngài ke sṳn-sân, ngì-têu vi Kâ-thi̍t lâu Mí-nì, chhiu-he chhṳ̂n-cho ‘Hen-yun’ lâu ‘Miang-yun’ ke sṳ̀n-mìn pài-song thiàu hó ke chiú.
[12] Ngì-têu chu-thin oi chhám-sí chhai tô-ha; yîn-vi Ngài ham ngì-têu, ngì-têu m̀ en Ngài; Ngài kóng-fa, ngì-têu m̀ thâng. Ngài ngién-chûng khon-cho fái ke sṳ, ngì-têu fán-chón hi hàng; Ngài só-nâu ke sṳ, ngì-têu phiên-phiên tông-hau.
[13] Só-yî, Ngài — Chṳ-kô ke Song-chú lâu ngì-têu kóng, Ngài ke-têu phu̍k-ngìn voi yû la-ngiak ke yím-sṳ̍t, chúng-he ngì-têu voi yu kî yu hot. Ngài ke-têu phu̍k-ngìn voi fôn-hí, chúng-he ngì-têu voi kien-seu.
[14] Ngài ke-têu phu̍k-ngìn voi fôn-hí to chhong-kô, chúng-he ngì-têu voi sông-sîm to thai-kieu, sîm-kôn thung-to chhin-hêm.
[15] Ngài ke sién-mìn voi chiông ngì-têu ke miàng khon-cho chu-chú. Ngài — Chṳ-kô ke Song-chú oi chhṳ̀-sí ngì-têu, chúng-he Ngài ke-têu phu̍k-ngìn, Ngài oi su-pûn kì-têu sîn ke miàng.
[16] Chhai liá-te thú-thi sông, só-yû khiù-fuk ke ngìn chhiòn-phu oi to sin-sṳ̍t ke Song-ti mien-chhièn lòi khiù. Só-yû fat-sṳ ke ngìn chhiòn-phu oi fung sin-sṳ̍t ke Song-ti fat-sṳ. Yîn-vi thèu-pái ke khun-nàn chhiòn-phu m̀ ki-tet, ya khon m̀-tó lé.”
[17] Song-chú kóng: “Ngài oi chhóng-chho sîn-thiên sîn-thi. Siên-chhièn ke sṳ chhiòn-phu m̀-voi chai su ki-ngiam, ya m̀ ki-tet lé.
[18] Ngì-têu oi yîn-vi Ngài só chhóng-chho ke yún-yún yén-yén fôn-hí khoai-lo̍k. Khon â, Ngài só chhóng-chho ke sîn Yâ-lu-sat-lâng voi chhûng-mân hí-lo̍k, sàng-tú ke ngìn-mìn voi fôn-hí khoai-lo̍k.
[19] Ngài chhṳ-kâ ya voi yîn-vi Yâ-lu-sat-lâng lâu sàng-tú ke ngìn-mìn lòi hí-lo̍k. Chhai ke-vi, m̀-voi chai thâng-tó thai-kieu lâu chhin-hêm ke sâng.
[20] Chhai ke-vi, m̀-voi chai yû chhut-se kí-ngit chhiu yêu-chat ke ô-nga-é; ló-ngìn-kâ chhiòn-phu voi hióng chhòng-su. Sṳ̍t-to yit-pak se sí ke, hàn son-he heu-sâng; màng mân yit-pak se sí ke, cho-tet kóng he su Ngài chu-chú ke.
[21] Kì-têu voi hí-vuk, chhṳ-kâ he̍t; kì-têu voi chung phù-thò, chhṳ-kâ sṳ̍t.
[22] Kì-têu m̀-voi hí-vuk, phe̍t-ngìn sa lòi he̍t; kì-têu m̀-voi chung phù-thò, phe̍t-ngìn sa lòi sṳ̍t. Ngài ke chṳ́-mìn voi chhiong su-é án chhòng-miang. Ngài ke sién-mìn voi chhòng-chhòng kiú-kiú hióng-su chhṳ-kâ kûng-chok ke sṳ̀n-kó.
[23] Kì-têu ke lò-luk m̀-voi khûng-khûng; só kiung ke chṳ́-ńg m̀-voi tù-tó châi-nan. Ngài — Song-chú oi su-fuk pûn kì-têu lâu kì-têu ke chṳ́-chṳ́ sûn-sûn.
[24] Kì-têu hàn-màng khiù, Ngài yí-kîn en lé; kì-têu khì-tó hàn-màng so̍t, Ngài yí-kîn tap-yin lé.
[25] Sài-lòng lâu yòng-è voi khiung-ha sṳ̍t; sṳ̂-é chhiong ngiù-è khiung-yong sṳ̍t-chhó; sà voi sṳ̍t-nài, m̀-voi ngâu-ngìn. Chhai Siak-ôn — Ngài sṳn-sân ke tak só-chhai, m̀-voi chai yû sông-hoi lâu sià-ok ke sṳ.” Song-chú án-ngiòng siên-pu lé.