[1] Yû yit-ngit, voi yû yung chṳn-ngi chóng-khièn ke koet-vòng lâu yung kûng-phìn chhṳ-lî koet-kâ ke liâng-chhiu chhut-hien.
[2] Kì-têu tak-sà tû chhiong cho thai-fûng, lo̍k thai-súi ke sṳ̀, pûn ngìn khong yit-ha ke só-chhai; chhai sâ-mo̍k chûng chhiong chhièn-súi pûn ngìn chṳ́-hot, chhai hôn-thi chûng chhiong thai phàn-sa̍k ke yîm-yáng pûn ngìn théu-liòng.
[3] Khon tet-tó ke ngìn, m̀-voi chai muk-chû sap-sap; thâng tet-tó ke ngìn, m̀-voi chai ngí-kûng poi-poi.
[4] Kip-sin ke ngìn voi yû chṳ-sṳt, kiet-sa̍t ke ngìn kóng-fa voi pien chhîn-chhîn chhú-chhú.
[5] M̀-voi chai yû-ngìn ham ngong-tong ngìn cho kô-mìn, ya mò-ngìn chhṳ̂n káu-koai ke ngìn cho kiûn-chṳ́.
[6] Ngong-tong ngìn kóng ngong-fa, chôn-mùn sióng-oi cho fái-sṳ; kì ke ngièn-hàng kí-chṳ́ sòng-sòng vú-yu̍k Song-chú. Kì chhiùng-lòi m̀ pûn tú-kî ke ngìn sṳ̍t-fan, m̀ pûn choi-châu ke ngìn lîm-súi.
[7] Káu-koai ke ngìn sú-thon ok-thu̍k; kì yung kúi-kie pok-siok khiùng-khú ngìn; kì kóng fâ-liâu, hoi khiùng-khú ke ngìn tet m̀-tó kûng-phìn.
[8] Chúng-he kô-mìn ke ngìn kie-va̍k kô-mìn ke sṳ; kì tui-thèu to-mî kiên-chhṳ̀ cho kô-mìn ke sṳ.
[9] Ngì liá-têu mò-sèu mò-li, sên-fa̍t ôn-lo̍k ke fu-ńg â, oi chu-yi thâng ngài ke fa.
[10] Liá-ha ngì-têu khó-nèn phìn-ôn mân-chiuk; chúng-he màng-ngièn liá-ke sṳ̀-chiet, ngì-têu voi mò-kat mò-sat, yîn-vi mò phù-thò hó sû-sṳ̀n lé.
[11] Ngì-têu yit-chhṳ̍t mò-sèu mò-li, ko ôn-lo̍k ke sên-fa̍t; to-sṳ̀ chhiu voi mò-kat mò-sat. Ngì-têu voi thot-thet chiâng-sâm, yung lan-pu kiê chhai yêu-khiên.
[12] Ngì-têu voi chhùi sîm-kôn ôi-sông, yîn-vi chhin-hó ke nùng-chhòng lâu sû-sṳ̀n fûng-fu ke phù-thò-yèn chhiòn-phu fí-me̍t lé.
[13] Chhai Ngài chṳ́-mìn ke thú-thi song, voi sâng-mân net-è lâu chhi̍t-lì. Ngì-têu voi vi-tó pún-lòi fôn-hí khoai-lo̍k ke kâ-thìn lâu fàn-yùng ke sàng-sṳ chhùi sîm-kôn ôi-sông.
[14] Vòng-kiûng voi fông-fi, nau-ngie̍t ke sàng-sṳ mò-ngìn he̍t. Sân-táng ke sàng-pó lâu sàng-lèu yún-yén sàng-cho fông-sân. Yâ lì-è chhin-hau chhai ke-vi káu, yòng-khiùn chhai ke-vi sṳ̍t-chhó.
[15] Chúng-he Song-ti oi chai yit-pái chhâi-khién Kì ke Lìn lòi-to ngài-têu tông-chûng. Fông-thi voi pien-cho phì-thièn; phì-thièn pien-cho meu-sṳn ke su-nà.
[16] Ke-sṳ̀, mò-lun chhai fông-phû ya-he phì-thièn lûng-chúng voi yû kûng-phìn lâu chṳn-ngi.
[17] Kûng-phìn voi tai-lòi phìn-ôn; chṳn-ngi voi tai-lòi yún-yén ôn-kî lo̍k-ngia̍p.
[18] Song-ti chṳ́-mìn ke kâ-yèn fî-sòng ôn-chhiòn, mân-yû phìn-ôn, mò-sèu mò-li.
[19] (Chúng-he pên-pho̍k voi kong chhai su-nà chûng; sàng voi pûn-ngìn chhak-thet!)
[20] Ke-têu chhai súi-piên ôn-sîm kâng-chung, yù-chhai ngiù-è lâu lì-è chhai chhó-chhòng sṳ̍t-chhó ke ngìn sṳ̍t-chhai yû fuk-hi ô!