[1] “Ke tui Yî-tûng ke Pô-sṳ̂-lâ-sàng lòi, chok fùng-sâm tá-pan tông phai-thèu ke he má-ngìn? Ke chhin vî-fûng, thai-phu hàng-lu ke he má-ngìn?” Chhiu-he yû chṳ́n-kiu thai-nèn ke Song-chú, Kì lòi siên-ko Kì ke sṳn-li.
[2] “Cho-má-ke Kì chok fùng-sâm, chhiong tha̍p phù-thò kiuk-chiú ke ngìn?”
[3] Song-chú en-kóng: “Ngài chien-tha̍p van-koet, chhiong tha̍p phù-thò yit-yong; mò-ngìn lòi lâu Ngài then-sú. Ngài fat-khién lòi tha̍p kì-têu; Ngài thai su-hi lòi fí-fái kì-têu; kì-têu ke hiet tá-lá-sap Ngài ke sâm.
[4] Ngài chṳ́n-kiu Ngâ chṳ́-mìn ke ngit-è yit-chhṳ̍t chhai Ngài sîm-chûng; Ngài chit-fa̍t Ngâ chṳ́-mìn sù-thi̍t ke ngit-è to lé.
[5] Ngài khon-lòi khon-hi, mò-ngìn lòi pông-chhu Ngài, mò-ngìn lòi chṳ̂-chhṳ̀ Ngài! Ngài ye̍t fat-khién, Ngài chhiu ye̍t kiên-khiòng, Ngài chhîn-sú lòi tá-yàng liá-chhòng chan-chên.
[6] Ngài fat-khién lòi tha̍p van-koet, thai su-hi lòi fí-fái kì-têu; Ngài sṳ́ kì-têu hiet-liù sṳ̀n-hò.”
[7] Ngài oi kóng-hí Song-chú put-pien ke chhṳ̀-oi; ngài oi chan-mî Kì chhai ngài-têu sṳ̂n-song só-cho ke sṳ. Cheu Kì ke thung-siak lâu fûng-sṳn ke chhṳ̀-oi, Kì chiông chhin-tô tông-hó ke fuk-hi su-pûn Yî-set-lie̍t-ngìn.
[8] Song-chú kóng: “Kì-têu khok-sṳ̍t he Ngài ke chṳ́-mìn, he m̀-voi hàng hî-ká ke chṳ́-mìn.” Só-yî Kì cho kì-têu ke kiu-chú.
[9] Chhai kì-têu ke khú-nan chûng, Kì ya su-khú. Chṳ́n-kiu kì-têu ke m̀-he thiên-sṳ́, he Song-chú chhṳ-kâ. Yîn-vi Kì ke chhṳ̀-oi lâu lìn-mén, Kì kiu-su̍k kì-têu. Kì thèu-pái sṳ̀-sòng chiông kì-têu nám-tén lòi pà,
[10] chúng-he kì-têu phoi-ngia̍k Kì, sṳ́ Kì ke Sṳn-Lìn sông-sîm. Só-yî, Song-chú pien-cho kì-têu ke sù-thi̍t, chhîn-chhṳ kûng-kit kì-têu.
[11] Chúng-he, Kì ke chṳ́-mìn hàn-he ki-tet thèu-pái ke sṳ, ki-tet Mô-sî ke ngit-è. Kì-têu mun: “Song-chú chhai nai-vi nè? Kì sṳt tui hói-chûng kiu Kì ke chṳ́-mìn lâu kì-têu ke liâng-chhiu. Liá-ha liá-ke chiông Kì ke Sṳn-Lìn su-pûn Mô-sî ke Song-chú chhai nai-vi nè?
[12] Kì sṳt yung Kì ke thai-nèn, thûng-ko Mô-sî lòi hàng sṳ̀n-chiak, chiông súi fûn-khôi, thu Kì ke chṳ́-mìn kîn-ko chhṳ̂m-hói, sṳ́ ngìn yún-yén ki-tet Kì ke miàng. Liá-ha, Kì chhai nai-vi nè?” Song-chú sṳt tai-liâng Kì ke chṳ́-mìn, sṳ́ kì-têu ke kiok-phu vún-thin, chhiu-chhiong mâ chhai khóng-yâ, m̀-voi pan-tó.
[14] Chhiong tai ngiù-khiùn hâ-to sân-lak, Song-chú ke Lìn pûn kì-têu hiet-khun. Kì án-ngiòng tai-liâng chhṳ-kâ ke chṳ́-mìn, sṳ́ chhṳ-kâ ke miàng tet-tó chhṳ̂n-siung.
[15] Song-chú â, khiù Ngì tui thiên-táng khon-ku ngài-têu; khiù Ngì tui sṳ̀n-sṳn, yùng-kông ke pó-chho koân-sîm ngài-têu. Ngì ke thai-nèn lâu ngie̍t-sîm chhai nai-vi? Ngì ke chhṳ̀-oi lìn-mén chhai nai-vi nè? Khiù Ngì m̀-hó m̀ chhap ngài-têu!
[16] Ngì he ngài-têu ke Â-pâ. Chhiu-son ngài-têu ke chú-siên Â-pak-lâ-hón lâu Ngâ-kok m̀ sṳ̀n-ngin ngài-têu; chúng-he Song-chú â, Ngì he ngài-têu ke Â-pâ, tui kú-chó to liá-ha, Ngì he ngài-têu ke kiu-su̍k Chú.
[17] Song-chú â, Ngì cho-má-ke yù-chhai ngài-têu lì-khôi Ngì ke tho-lu? Cho-má-ke yù-chhai ngài-têu án ngang-kiáng, m̀ kin-vi Ngì nè? Vi-tó Ngì ke-têu phu̍k-ngìn, vi-tó ke-têu yit-chhṳ̍t su̍k Ngì ke ngìn, khiù Ngì fì-sîm chón-yi!
[18] Ngài-têu he Ngì sṳ̀n-sṳn ke chṳ́-mìn. Ngài-têu sṳt pûn thi̍t-ngìn kiuk chhut-hi; chiap-tén kì-têu chhiu chien-tha̍p Ngì ke sṳn-só.
[19] Ngì tui-thai ngài-têu, chhiu-chhiong Ngì chhṳ-chhiùng m̀-sṳt chhṳ-lî ko ngài-têu, chhiu-chhiong ngài-têu chhiùng-lòi m̀-he Ngì ke chṳ́-mìn.