[1] Song-chú oi chai yit-pái tui Ngâ-kok ke heu-thoi hién-chhut chhṳ̀-oi, sién Yî-set-lie̍t-ngìn kûi-su̍k chhṳ-kâ, pûn kì-têu chhai chhṳ-kâ ke thú-thi ôn-kî; chhin-tô ngoi-chhu̍k ngìn oi lâu kì-têu khiung-ha he̍t, pin kûi-su̍k kì-têu.
[2] Chhin-tô koet-kâ voi hia̍p-chhu kì-têu, tai kì-têu chón-to Song-ti só-su ke thú-thi, ya yû chhin-tô koet-kâ ke ngìn voi sàng-cho kì-têu ke nù-pî. Yî-chhièn chok-ko Yî-set-lie̍t-ngìn ke, liá-ha fán-chón sàng-cho Yî-set-lie̍t-ngìn ke nù-chhòi; Yî-set-lie̍t-ngìn oi kón yî-chhièn khî-fu kì-têu ke ngìn.
[3] Song-chú chhù-thet Yî-set-lie̍t-ngìn ke pî-sông lâu thung-khú ke-sṳ̀, chhiu m̀-voi chai yû-ngìn khiòng-pet kì-têu cho khú-kûng lé.
[4] Song-chú vi kì-têu sṳ̀n-chhiu liá yit-chhiet yî-heu, kì-têu voi cho-sṳ̂ sâu-nat Pâ-pí-lùn-vòng kóng: “Phau-kiûn yí-kîn vang lo̍k-hi lé! Kì m̀-voi chai khî-fu ngìn lé!
[5] Song-chú yí-kîn áu-thôn fái-ngìn ke kun-é, tá-sui thúng-chhṳ-chá ke khièn-chhóng.
[6] Liá-têu ngìn chhai fun-nu chûng yit-chhṳ̍t khî-ap ngìn-mìn, yu chhai lie̍t-nu chûng pet-hoi só cham-liâng ke koet-kâ.
[7] Liá-ha chhiòn sṳ-kie chang yû ôn-thin lâu fò-phìn; tak-ke ngìn fôn-hí khoai-lo̍k chhong-kô.
[8] Lièn Lì-pâ-nun ke chhiùng-su lâu hiông-pak-su ya voi yîn-vi ngì vang lo̍k-hi lòi fôn-hí, yîn-vi ngì yí-kîn vang-thet, m̀-voi chai yû-ngìn lòi chám kì-têu.
[9] “Yîm-kiên chṳ́n-thung oi chhin fôn-ngiàng Pâ-pí-lùn-vòng. Chhai sṳ-song cho-ko liâng-chhiu ke-têu ngìn ke yîm-fùn chhiòn-phu voi kiâng-to hong-hí-lòi; chhai sṳ-song cho-ko lie̍t-koet kiûn-vòng ke yîm-fùn chhiòn-phu voi tui pó-chho táng khî hí-lòi.
[10] Kì-têu lûng-chúng voi tui kì kóng: ‘Liá-ha ngì pien ngiôn-ngio̍k, lâu ngài-têu siông-chhiong, vàn-chhiòn khiung-yong lé!
[11] Yî-chhièn ngìn thàn-khìm siung-chan ngì ke kûng-tet, liá-ha ngì ya to yîm-kiên! Chhùng-tôi he ngì ke mìn-chhòng, sṳ̂-chhùng he ngì koi ke phî.’
[12] “Pâ-pí-lùn-vòng â, ngì liá mìn-liong ke thiên-kông-sên! Ngì yí-kîn tui thiên-táng tiet hâ-lòi! Ngì cham-liâng ko lie̍t-koet, chúng-he liá-ha pûn Song-ti te̍p chhai thi-song.
[13] Ngì sîm-tú sṳt sióng: ‘Ngài oi sông-to thiên-táng, chiông ngài ke pó-chho piong chhai Song-ti ke chung-sên táng-kô; ngài oi chhô chhai pet-khi̍t ke sân-táng, chhiu-he chung-sṳ̀n chhi-fi ke thi-fông.
[14] Ngài oi phà-sông yùn-táng, chhai ke-vi lâu Chṳ-kô-chá phiàng-kô lé.’
[15] Chúng-he ngì sa tiet-lo̍k yîm-kiên, tiet-lo̍k chhṳ̂m-yên.
[16] “Sí-ngìn voi muk kîm-kîm khon-tén ngì, mun-kóng: ‘Liá kám m̀-he sṳ́ thai-thi chho̍k-kiâng, sṳ́ lie̍t-koet pi̍t-pi̍t-chhat ke ngìn mâ?
[17] Liá kám m̀-he fí-me̍t chhin-tô sàng-sṳ, sṳ́ sṳ-kie pien-cho fông-thi, m̀-hén chiông chok-lòi ke ngìn piong-thet, m̀-chún kì-têu chón vuk-hâ ke ngìn mâ?’
[18] “Lie̍t-koet ke kiûn-vòng chhiòn-phu soi chhai kì-têu fu-li thòng-fòng ke fùn-mu tú.
[19] Chúng-he ngì mò fùn-mu, ngì pûn-ngìn fit chhai yâ-thi; ngì ke sṳ̂n-sṳ̂ táng-kô tôi-mân chan-sí sṳ-pîn ke kut-hài, khiung-ha te̍p-lo̍k chhṳ̂m-hâng tú, yù-chhai ngìn chien-tha̍p, chhiong mò-ngìn oi ke.
[20] Ngì mò chhiong khì-thâ ke kiûn-vòng, sí-heu yû-ngìn mài-chong; yîn-vi ngì fí-me̍t chhṳ-kâ ke koet-kâ, chhṳ̀ chhṳ-kâ ke ngìn-mìn. Ngì cho án-fái ke sṳ, ngì chṳ́-sûn ke miàng, yún-kiú mò-ngìn thì-hí.
[21] “Ngì-têu chún-phi hi chiáu-me̍t kì ke chṳ́-sûn â! Liá he kì-têu chú-siên liù hâ-lòi ke chhui-chai; kì-têu tông-chûng m̀-voi chai yû-ngìn hîn-hí lòi thúng-chhṳ sṳ-kie, ya m̀-voi chhai liá sṳ-song kien-li̍p sàng-sṳ lé.”
[22] Song-chú — Van-kiûn ke Ngièn-soi án-ngiòng kóng: “Ngài oi kûng-kit Pâ-pí-lùn, chiông kì fí-me̍t. Ngài oi sṳ́ ke só-chhai chhun-chhó put-liù; mò chṳ́-sûn, mò heu-thoi. Ngài — Song-chú án-ngiòng siên-pu lé.
[23] Ngài oi sṳ́ Pâ-pí-lùn pien-cho yit fut nam-é, sàng-cho meu-thèu-tiâu ke teu. Ngài oi yung so-pá chhîn-chhù Pâ-pí-lùn, chiông yit-chhiet so chhiang-chhiang. Ngài — Song-chú, Van-kiûn ke Ngièn-soi án-ngiòng siên-pu lé.”
[24] Song-chú — Van-kiûn ke Ngièn-soi fat-sṳ kóng: “Ngài ke kie-va̍k yit-thin voi sṳ̍t-hien; Ngài oi cho ke sṳ yit-thin voi sàng.
[25] Ngài oi chhai Ngài ke thú-thi fí-me̍t Â-sut-ngìn, chhai Ngài ke sân-táng chien-tha̍p kì-têu. Ngài oi sṳ́ Ngài ke chṳ́-mìn tui Â-sut ke ak-hâ tet chhṳ-yù, kì-têu só pà ke chhûng-tâm voi lì-khôi kì-têu ke kiên-thèu.
[26] Liá he Ngài tui chhiòn sṳ-kie ke kie-va̍k; Ngài oi chhûn-sú lòi kûng-kit lie̍t-koet.”
[27] Song-chú — Van-kiûn ke Ngièn-soi kiet-thin án-ngiòng cho lé; Kì yí-kîn chhûn-sú lòi chit-fa̍t lé; mò-ngìn nèn chú-tóng Kì.
[28] Â-ha̍p-sṳ̂-vòng sí-thet ke-ngièn, Song-ti siên-pu hâ-poi ke sin-sit:
[29] Fî-li-sṳ-ngìn â, tá ngì ke kun-é yí-kîn áu-thôn thet, chúng-he ngì m̀-sṳ́ fôn-hí. Yit-mî sà sí-thet, chúng-he yit-mî hàn-kha thu̍k ke sà tén chhai heu-poi; ke-mî thu̍k-sà ke lón phu-chhut voi pî ke fó-sà!
[30] Song-chú oi sṳ́ khiùng-khú ngìn tet-tó mu̍k-yông, khun-khú ke ngìn phìn-ôn ko-ngit. Chúng-he Kì oi sṳ́ Fî-li-sṳ-ngìn tù-tó kî-fông; chhûn-tó ke ngìn ya voi sí chhiang-chhiang.
[31] Fî-li-sṳ ke sàng-sṳ â, ngì-têu voi thai-sâng kieu lé! Fî-li-sṳ-ngìn â, ngì-têu chhiòn-phu voi pi̍t-pi̍t-chhat lé! Tui pet-fông yû yit-chhṳn yên chhôi ko-lòi lé, ke he yit-khiùn tông-yúng yu tông-voi siông-chhṳ̀ ke thi̍t-ngìn.
[32] Ngài-têu oi ngióng-pân fì-tap Fî-li-sṳ-ngìn phai-lòi khiù kiu-miang ke sṳ́-chá nè? Ngài-têu oi lâu kì-têu kóng, Song-chú yí-kîn kien-li̍p Siak-ôn; Kì ke-têu su-chhin thung-khú ke ngìn-mìn voi chhai ke-vi tet-tó pó-fu lé.