[1] Song-ti ke chi-thàn, chhiu-he Yâ-lu-sat-lâng pún-sṳ̂n, ya voi tù-tó châi-nan lé! Thai-ví sṳt ôn-yàng ke sàng voi sṳ̀n-su châi-nan lé! Chhiu-son yit-ngièn yit-ngièn ko-hi, chiet-khì cheu-sòng lùn-liù hâ-hi,
[2] Song-ti hàn-he oi hiong liá chhṳ̂n-cho “Song-ti chi-thàn” ke sàng kong châi-nan. Voi yû pî-sông ôi-kieu ke sâng-yîm; chhiòn-sàng voi pien-cho yit-chho hiet chit-chit ke thai chi-thàn!
[3] Song-ti oi chhai si chû-vì ôn-yàng kûng-kit liá-sàng, vì-khun liá-sàng, hí kô-thòi lòi kûng-kit kì.
[4] Yâ-lu-sat-lâng ke ngìn m̀-kám chhut-sâng, chhiu khù chhai thi-song, yung hèu-lièn se-sâng kóng-fa, chhiong kúi kóng-fa án-ngiòng tui thi-nài-hâ chhòn chhut-lòi.
[5] Yâ-lu-sat-lâng â, kûi-khiùn kûng-kit ngì ke sù-thi̍t chhiòn-phu voi chhiong chhṳ̀n-fôi yit-yong pûn fûng chhôi-san; ke-têu tet-ngìn-kiâng ke kiûn-chhui voi chhiong lùng-hông pûn fûng chhôi-chéu. Liá-sṳ fut-yèn-kiên voi lìm-to,
[6] Song-chú — Van-kiûn ke Ngièn-soi oi yung thai lùi-kûng, thai thi-thûng lâu chhin thai ke sâng, oi phai liùng-kién-fûng, thai fûng-chhâi lâu lie̍t-fó lòi chṳ́n-kiu ngì.
[7] Ke-sṳ̀, lòi kûng-kit Song-ti chi-thàn ke kok-koet kiûn-chhui chhiòn-phu voi sṳt-phai; kì-têu ke vú-hi lâu kiûn-phi chhiòn-phu voi chhiong pot-mung, chhiong am-pû-sṳ̀ ke yi-siong án-ngiòng sêu-sṳt.
[8] Chhiong ngo-to voi-sí ke ngìn chhai mung-chûng kín-sṳ̍t, siáng ko-lòi ke sṳ̀ hàn-he tú-kî; chhiong hot-to voi-sí ke ngìn chhai mung-chûng thai-héu lîm-súi, siáng ko-lòi ke sṳ̀ khiung-yong choi-châu; kûng-kit Siak-ôn-sân ke kok-koet kiûn-chhui ya he án-ngiòng.
[9] Ngì-têu ki-siu̍k cho ngong-tong ke sṳ â! Ki-siu̍k êm muk-chû chhiong chhiâng-miâng ke ngìn â! Ngì-têu hàn-màng lîm-chiú yí-kîn chiú-chui, yit-tit chiú hàn-màng lîm yí-kîn yèu-yèu pài-pài!
[10] Song-chú sṳ́ ngì-têu thèu fùn-fùn sióng-oi soi; Kì êm-tén ngì-têu ke muk-chû. Siên-tî, siên-kien yin-kôi he ngìn-mìn ke muk-chû, chúng-he Song-ti châ-tén kì-têu ke muk-chû.
[11] Só-yû yi-siong ke yi-ngi chhiòn-phu tui ngì-têu khong hí-lòi, chhiong yit-pún fûng-tén ke sû-kién. Ngì-têu nâ liá sû-kién hi-chhiáng yû ho̍k-mun ke ngìn thu̍k, kì yit-thin voi lâu ngì-têu kóng, kì mò fap-thu thu̍k, yîn-vi liá sû-kién he fûng-tén ke.
[12] Ngì-têu chhiáng m̀-sṳt sṳ ke ngìn thu̍k, kì voi lâu ngì kóng, kì m̀-voi thu̍k.
[13] Chú kóng: “Liá-têu ngìn-mìn ngin-vì kì-têu chhai ke-vi kin-pai Ngài nè! Kì-têu yung choi-sùn-phì chûn-kin Ngài, chúng-he kì-têu ke sîm yén-yén lì-khôi Ngài. Kì-têu ke chûng-kau he ngìn-kiên ke kûi-thiàu, chhòn-thúng, thu̍k-to su̍k-su̍k, phoi hí-lòi thin-thin.
[14] Só-yî, Ngài oi chhai sióng m̀-tó ke sṳ̀-chiet tá-kit kì-têu, sṳ́ kì-têu chho̍k-kiâng. Kì-têu tông-chûng, chhûng-mìn ngìn ke chhûng-mìn voi chhiòn mò ka-chhṳ̍t; chîn-mìn ngìn ke chîn-mìn voi vàn-chhiòn mò yung.”
[15] Ke-têu chiông kie-mèu khong-tén m̀ pûn Song-chú tî ke ngìn voi tù-tó châi-nan lé! Kì-têu chhai am-chûng kie-va̍k, láu-tó mò-ngìn khon-tó, mò-ngìn tî kì-têu chhai ke-vi cho má-ke.
[16] Kì-têu tiên-to sṳ-fî. To-tái sêu-fì sṳ̂-fu kha-thai nè, ya-he fì-è kha-thai nè? Su-chho ke tûng-sî ngióng-nèn tui chṳ-chho ngìn kóng: “Ngì pin-mò chho ngài”? Ya-he tui kì kóng: “Ngì mò-la chhûng-mìn”?
[17] Chhiu-chhiong siu̍k-ngî kóng: “Ko yit-chham sṳ̀-kiên, Lì-pâ-nun ke su-nà voi pien-cho phì-thièn; phì-thièn voi pien-cho su-nà.”
[18] To ke-ngit, ngí-lûng ke voi thâng-tó thu̍k-sû ke sâng; yit-chhṳ̍t chhai vû-am chûng ke mô-muk ke voi khon tet-tó.
[19] Pî-mì ke ngìn voi chiap-su Song-chú só-su ke hí-lo̍k; khiùng-khú ke ngìn voi siung-chan Yî-set-lie̍t sṳ̀n-sṳn ke Song-ti.
[20] Khî-fu ngìn ke voi pûn-ngìn chhù-me̍t; tet-chhui Song-ti ke voi su chit-fa̍t; chhui-ngìn chhiòn-phu voi su sêu-me̍t.
[21] Fí-pong phe̍t-ngìn ke, chú-tóng kûng-tho ke, yên-vóng sṳ̀n-sṳ̍t ngìn ke, chhiòn-phu voi pûn Song-ti sêu-me̍t.
[22] Só-yî, ke sṳt chṳ́n-kiu Â-pak-lâ-hón ke Song-chú tui Ngâ-kok ke heu-thoi — Yî-set-lie̍t án-ngiòng kóng: “Ngài ke chṳ́-mìn â, ngì-têu m̀-sṳ́ chai su siû-yu̍k lé, ngì-têu ke mien m̀-sṳ́ chai kien-seu to mien-fùng chi-cha lé.
[23] Ngì-têu khon-tó Ngài su-pûn ngì-têu ke chṳ́-sûn, ngì-têu chhiu voi sṳ̀n-ngin Ngài he Yî-set-lie̍t sṳ̀n-sṳn ke Song-ti. Ngì-têu voi chûn-kin Ngài, kin-vi Ngài.
[24] Mì-mì fù-fù ke ngìn voi ho̍k-chîn; hiàm-tûng hiàm-sî ke ngìn voi chiap-su kau-thô.”