[1] Song-chú tui ngài kóng: “Nâ yit-te thai piông-é lòi, yung pit siá-tén ‘Chhióng-kiap voi to’.
[2] Hi-chhìm lióng-ke sin-yung hó ke ngìn lòi cho chṳn-ngìn, chhiu-he chi-sṳ̂ Vû-li-â lâu Yâ-pí-li-kâ ke lai-é Sat-kâ-li-â.”
[3] Ko mò kí-kiú, ngài lâu pû-ngiòng thùng-fòng; kì fài-thôi, kiung yit-ke lai-é. Song-chú chhiu lâu ngài kóng: “Lâu kì ôn-to ‘Chhióng-kiap voi to’;
[4] yîn-vi chhai liá se-ngìn-è voi ham â-pâ, â-mê yî-chhièn, Thai-mâ-sṳ-kiet só-yû ke chhòi-pó lâu Sat-mâ-li-â ke chan-li-phín chhiòn-phu oi pûn Â-sut fòng-ti chhióng chhiang-chhiang.”
[5] Song-chú yu tui ngài kóng:
[6] “Yîn-vi liá-têu ngìn mò oi Sî-lò-â-hâi man-man liù ke súi, fán-chón fôn-hí Li-sun-vòng lâu Li-mâ-li ke lai-é Pí-kâ-vòng;
[7] só-yî, Ngài — ngì ke Chú oi tai Â-sut fòng-ti lâu kì ke kiûn-chhui lòi kûng-tá Yù-thai; kì-têu ke kûng-tá voi chhiong Yu-fat-lâ-tí-hò ke thai-súi chhûng-lòi, chhêu-ko só-yû ke hò-pa, phàn-ko lióng-phién ke hò-pa sùn.
[8] Kì-têu voi chhiong cho thai-súi, chim to ngìn ke kiáng-kîn, thûn-thet kûi-chak Yù-thai.” Chúng-he Yî-mâ-nui-li, Song-ti lâu ngài-têu thùng-chhai! Kì voi tá-khôi yi̍t-kap, pó-fu ngài-têu chhiòn-koet ke thú-thi.
[9] Lie̍t-koet ke ngìn-mìn â, yù-chhai ngì-têu vè-vè sê-sê, to-mî yit-thin voi lau-khui. Yén-fông ke ngìn nâ, oi thâng â! Hi chún-phi chan-chên â, chúng-he yit-thin voi lau-khui! Mò m̀-chho̍k, yù-chhai ngì-têu hi chún-phi chan-chên! Chúng-he yit-thin voi lau-khui!
[10] Yù-chhai ngì-têu sat-mâng kie-va̍k, chúng-he m̀-voi sṳ̀n-kûng; yù-chhai ngì-têu sat-mâng chhâm-siòng, chúng-he m̀-voi yû kiet-kó, yîn-vi Song-ti lâu ngài-têu thùng-chhai.
[11] Song-chú yung Kì thai-nèn ke sú kín-ko ngài, cho-m̀-tet hàng liá-têu ngìn-mìn só-hàng ke tho-lu. Kì kóng:
[12] “Liá-têu ngìn-mìn chhi-si̍p thùng-mèu, ngì-têu m̀-hó chhâm-kâ; kì-têu só-kiâng ke, ngì-têu m̀-sṳ́ kiâng, m̀-sṳ́ sèu.
[13] Chúng-he oi ki-tet Ngài — Song-chú, Van-kiûn ke Ngièn-soi he sṳ̀n-sṳn ke; chṳ́-yû Ngài he ngì-têu yin-kôi kiâng ke, yin-kôi kin-vi ke.
[14] Ngài he ngì-têu ke phit-nan-só; chúng-he Ngài ya chhiong yit-te pan-kiok-sa̍k, sṳ́ Yù-thai lâu Yî-set-lie̍t lióng-kâ ke ngìn-mìn pan-tó; Ngài yu chhiong ham-chiáng ya-he lò-mióng, chok-tó Yâ-lu-sat-lâng ke ngìn-mìn.
[15] Chhin-tô ngìn voi án-ngiòng kang-tó, tiet-tó su-sông; kì-têu voi pûn-ngìn mióng-tó, chok-tó.”
[16] Ngài ke ho̍k-sâng â, ngì-têu oi chiông ngài ke sin-sit kién hí-lòi, chiông ngài ke kau-hiun fûng hí-lòi.
[17] Sûi-yèn Song-chú chhai Kì ke chṳ́-mìn mien-chhièn chiông chhṳ-kâ khong hí-lòi, chúng-he ngài hàn-he oi tén-heu Kì; ngài thin-chho̍k oi ngióng-mong Kì.
[18] Song-chú — Van-kiûn ke Ngièn-soi chhô chhai Siak-ôn-sân. Song-chú sṳ́ ngài lâu Kì só su-pûn ngài ke chṳ́-ńg chhai Yî-set-lie̍t-ngìn tông-chûng sàng-cho ki-ho lâu sṳ̀n-chiak.
[19] Yû-ngìn tui ngì-têu kóng: “Ngì-têu hi mun ke-têu choi-hong ngiàm-ngiàm ngiam-ngiam, chhiu-he ke-têu thiàu-thùng, hàng sià-su̍t ke; ngìn kám cho-m̀-tet hiong kì ke sṳ̀n-mìn chhiáng-kau, vi sâng-ngìn khiù-mun sí-ngìn mâ?”
[20] Ngì-têu oi án-ngiòng en kì-têu kóng: “Oi thâng Song-chú ke kau-hiun lâu sin-sit!” Kì-têu só-kóng ke, na mò cheu liá phêu-chún, kì-têu chhiu khon m̀-tó chêu-sṳ̀n ke kông.
[21] Ngìn voi liù-long to tak só-chhai, hi kîn-ngiam su-khú lâu tú-kî. Chhai kì-têu tú-kî ke sṳ̀, kì-têu voi fat-khién chu-ma kì-têu ke koet-vòng lâu Song-ti.
[22] Kì-têu voi kín mong-thiên yu kín khon-thi, chúng-he má-ke ya khon m̀-tó, chṳ́-yû fam-nan lâu vû-am, chui-heu kì-têu voi pûn-ngìn kiuk-to vû-am chûng.