[1] Hâ-poi he yû-koân Âi-khi̍p ke sin-sit. Khon â, Song-chú chhô tông-kiak ke yùn to Âi-khi̍p lòi. Âi-khi̍p ke ngiéu-siong chhai Kì mien-chhièn pi̍t-pi̍t-chhat; Âi-khi̍p ke ngìn-mìn voi kiâng-to mò pan-tiám yúng-hi.
[2] Song-chú kóng: “Ngài oi kit Âi-khi̍p fat-sên nui-chan, sṳ́ hiûng-thi tá hiûng-thi, lìn-sa tá lìn-sa, sàng-sṳ lâu sàng-sṳ siông-chhṳ̀, vòng lâu vòng chan-chên.
[3] Ngài oi sṳ́ Âi-khi̍p-ngìn ke sîm-sṳ̀n fun-lon, kie-mèu sṳt-háu. Kì-têu voi hiong ngiéu-siong khiù pông-chhu, khiù-mun pien sià-su̍t ke, son-miang sîn-sâng lâu kúi-fùn.
[4] Ngài oi chiông Âi-khi̍p-ngìn kâu-pûn yit-ke phau-kiûn; yit-ke tông chhàn-ngiûn ke vòng oi lòi kón-lî kì-têu. Ngài — Chṳ-kô ke Song-chú, Van-kiûn ke Ngièn-soi án-ngiòng siên-pu lé.”
[5] Nì-lò-hò ke súi-vi voi kong-tâi, hò-pa châu-thet.
[6] Âi-khi̍p ke yun-hò lâu hò-pa yîn-vi châu-thet chhiu fat-chhut chhu-mi, lù-chuk lâu tên-sîm-chhó ya khû-châu;
[7] Nì-lò-hò lióng-phién hò-pa-sùn ke nùng-chok-vu̍t châu-thet, pûn-fûng chhôi chhiang-chhiang.
[8] Chhai Nì-lò hò-pa-sùn kho tá-ǹg sên-fa̍t ke ngìn chhiòn-phu voi sông-sîm to mien yù-yù; kì-têu ke tiau-pîn lâu ǹg-mióng chhiòn-phu yung m̀-tó.
[9] Fóng mà-sâ lâu chṳt mièn-pu ke ngìn chhiòn-phu voi sṳt-mong;
[10] fóng-chṳt kûng-ngìn lâu khì-thâ yû kî-su̍t ke kûng-ngìn yit-ke yit-ke sṳt-ngia̍p.
[11] Só-ôn-sàng ke liâng-chhiu chhin-ngong! Âi-khi̍p-vòng chui chhûng-mìn ke chhâm-mèu ya mò má-ke hó phan-fap! Kì-têu ngióng-kám chhai koet-vòng mien-chhièn kóng chhṳ-kâ he kú-thoi ho̍k-chá lâu kiûn-vòng ke chṳ́-sûn nè?
[12] Âi-khi̍p-vòng â, ngì ke-têu chhûng-mìn ke ku-mun chéu nai-hi lé? Mò yit-thin kì-têu voi lâu ngì kóng, Song-chú — Van-kiûn ke Ngièn-soi tui Âi-khi̍p yû má-ke kie-va̍k!
[13] Só-ôn lâu Men-fì-sṳ̂ ke liâng-chhiu chhiòn-phu he ngong-é, kì-têu yin-kôi liâng-thô koet-kâ, chúng-he kì-têu thu m̀-chho̍k lu.
[14] Song-chú sṳ́ kì-têu kóng-chhut fù-thù ke chú-chông, chṳ-to Âi-khi̍p só-cho ke sṳ chhiòn-phu m̀-chho̍k; koet-kâ mò ôn-thin, chhiong yit-ke sṳ̍t-chiú-chui ke ngìn chhai chhṳ-kâ éu chhut-lòi ke lá-sap tî-poi tá thong-thiu.
[15] Chhai Âi-khi̍p, mò-lun he hó-ngiak ke, khiùng-khú ke, kô-kui ke, pî-chhien ke, mò yit-ke yû phan-fap.
[16] To ke-sṳ̀, Âi-khi̍p ke nàm-ngìn voi chhiong fu-ngìn-kâ án mò-tám. Kì-têu khon-tó Song-chú — Van-kiûn Ngièn-soi ke sú khià hí-lòi oi chit-fa̍t kì-têu, chhiu chhiòn-phu pi̍t-pi̍t-chhat mò-kat mò-sat.
[17] Âi-khi̍p-ngìn yit sióng-tó Yù-thai-koet, chhiu chhiòn-phu chhin chho̍k-kiâng. Liá he yîn-vi Song-chú — Van-kiûn ke Ngièn-soi ngióng-pân ôn-phài Âi-khi̍p-ngìn ke miang-yun.
[18] Ke ngit-è yit-to, Âi-khi̍p ke ńg-chak sàng-sṳ chhiòn-phu voi kóng Hî-pak-lòi-fa. Kì-têu ke ngìn-mìn voi fung Song-chú — Van-kiûn Ngièn-soi ke miàng fat-sṳ. Khì-chûng yit-ke sàng voi ôn-to “Ngit-thèu sàng”.
[19] Ke ngit-è yit-to, Âi-khi̍p-thi chûng voi yû yit-chho vi Song-chú hí ke chi-thàn; Âi-khi̍p ke piên-kie voi yû vi Song-chú tun ke sa̍k-tún.
[20] Liá-têu chhiòn-phu he thoi-péu Song-chú — Van-kiûn ke Ngièn-soi he̍t chhai Âi-khi̍p-ngìn tông-chûng ke ki-ho. Kì-têu su-tó khî-fu, hiong Song-chú khiù pông-chhu ke sṳ̀, Song-chú voi chhâi-phai yit-ke chṳ́n-kiu-chá yu he pó-fu-chá lòi kiu kì-têu.
[21] Song-chú oi hiong Âi-khi̍p-ngìn hién-mìn, sṳ́ Âi-khi̍p-ngìn sṳ̀n-ngin Kì, kin-pai Kì, hien sên-ngì lâu chi-vu̍t pûn Kì. Kì-têu voi chhai Kì mien-chhièn vàn-ngien.
[22] Song-chú oi chit-fa̍t Âi-khi̍p-ngìn, ya oi yî-chhṳ kì-têu. Kì-têu voi to-chón-lòi kûi-su̍k Song-chú. Kì voi thâng kì-têu ke khì-tó, yî-chhṳ kì-têu.
[23] Ke ngit-è yit-to, Âi-khi̍p theu-to Â-sut voi yû yit-thiàu thai-lu. Lióng-koet ke ngìn-mìn lòi-vông lî-hàng; Âi-khi̍p-ngìn lâu Â-sut-ngìn voi khiung-ha kin-pai Song-chú.
[24] Ke ngit-è yit-to, Yî-set-lie̍t voi lâu Âi-khi̍p, Â-sut phìn-tén; liá sâm-thai koet voi sṳ́ chhiòn sṳ-kie ngìn-mìn tet-tó fuk-hi.
[25] Song-chú — Van-kiûn ke Ngièn-soi oi su-fuk kì-têu, kóng: “Âi-khi̍p — Ngài ke chṳ́-mìn, Â-sut — Ngài chhóng-chho ke, Yî-set-lie̍t — Ngài ke sán-ngia̍p, Ngài oi su-fuk pûn ngì-têu!”