[1] Song-chú án-ngiòng kóng: “Chhṳ-lî Yù-thai ke ngìn voi tù-tó châi-nan lé, yîn-vi kì-têu phoi-ngia̍k Ngài. Kì-têu m̀-thèn Ngài, chhṳ-kâ thin kie-va̍k, lâu ngìn chhiâm vì-poi Ngài chṳ́-yi ke thiàu-yok, chhui-song kâ-chhui.
[2] Kì-têu mò khiù-mun Ngài chhiu hiong Âi-khi̍p khiù pông-chhu. Kì-têu yêu-khiù Âi-khi̍p ke pó-fu; kì-têu yí-kho Âi-khi̍p-vòng.
[3] Chúng-he Âi-khi̍p-vòng mò li̍t-liong hó pó-fu kì-têu; Âi-khi̍p ke pó-fu to-mî voi tai-lòi kien-seu, tai-lòi siû-yu̍k.
[4] Sûi-yèn Yù-thai ke sṳ́-chá yí-kîn to Âi-khi̍p ke Só-ôn lâu Ha̍p-nui-sṳ̂-sàng;
[5] Yù-thai ngìn-mìn chiông-lòi voi yîn-vi sin-lai yit-ke kho m̀-tet ke koet-kâ lòi heu-fí. Kì-têu mò tet-tó má-ke hó-chhu, chṳ́-yû kien-seu, sṳt-mong.”
[6] Liá he Song-ti só-kóng yû-koân Yù-thai nàm-fông yâ-chhu ke fa: “Yù-thai ke sṳ́-chá chhai yit-ke ngùi-hiám ke thi-khî lî-hàng; ke-vi yû sṳ̂-é, thu̍k-sà lâu voi pî ke fó-sà. Kì-têu ke lì-è lâu lo̍k-thò chai-mân kui-chhung ke lî-vu̍t, oi hi hien-pûn yit-ke mò phan-fap pông-chhu kì-têu ke koet-kâ.
[7] Âi-khi̍p ke pông-chhu khûng-khûng, mò má-ke lu-yung. Só-yî, Ngài lâu Âi-khi̍p ôn yit-ke phiên-miàng, ham kì ‘M̀-voi Thîn-thûng ke Lâ-ha̍p-pak’.”
[8] Song-ti oi ngài chiông Kì chṳ́-mìn ke hàng-thung ki-liu̍k chhai sû-song, khat chhai piông-é táng, sṳ́ heu-thoi ke ngìn yún-yén ki-tet kì-têu ke sià-ok.
[9] Kì-têu he yit-khiùn phoi-ngia̍k Song-chú ke ngìn, hau kóng fâ-liâu ke chṳ́-ńg, yit-chhṳ̍t m̀-thâng Song-chú ke kau-hiun.
[10] Kì-têu tui siên-kien kóng: “M̀-hó khon yi-siong”, yu tui siên-tî kóng: “M̀-hó lâu ngài-têu kóng yin-kôi cho-má-ke; tân-tân kóng ngài-têu fôn-hí thâng ke fa lâu hî-ká ke sṳ chhiu hó lé.
[11] Chéu-khôi! M̀-hó tóng-tó ngài-têu ke lu. Ngài-têu mò-oi thâng yû-koân Yî-set-lie̍t sṳ̀n-sṳn ke Song-ti.”
[12] Chúng-he Yî-set-lie̍t sṳ̀n-sṳn ke Song-ti án-ngiòng kóng: “Ngì-têu m̀-thâng Ngài lâu ngì-têu kóng ke fa, fán-chón yí-kho vú-li̍t lâu cha-khî.
[13] Ngì-têu fam-chhui lé. Ngì-têu chhiong yit-san yû lie̍t-phung ke kô-chhiòng, voi fut-yèn-kiên vang hâ-lòi.
[14] Ngì-têu chhiong tá-sui ke fì-è, tá-to sui-sui, mò yit-sak cho-tet nâ-lòi chông fó-lù tú ke fó-than, ya-he nâ-lòi yéu súi-kông tú ke súi.”
[15] Chṳ-kô ke Song-chú — Yî-set-lie̍t sṳ̀n-sṳn ke Song-ti tui Kì ke chṳ́-mìn kóng: “Chón-lòi nâ, ôn-sîm sin-kho Ngài, ngì-têu chhiu voi tet-kiu; ôn-chhin sîm tén-heu Ngài, ngì-têu chhiu yû li̍t-liong.” Chúng-he ngì-têu m̀ ngien-yi.
[16] Ngì-têu sióng-oi khì khoai-mâ chéu pûn thi̍t-ngìn lòi-kiuk. Mò m̀-chho̍k, ngì-têu yit-thin oi thò-chéu! Ngì-têu láu-tó chhṳ-kâ ke mâ-é chéu tông-kiak, chúng-he thi̍t-ngìn ke mâ-é pí ngì-têu chéu hàn-kha kiak!
[17] Chhiu-son ngì-têu yû yit-chhiên sà, thâng-tó yit-ke thi̍t-ngìn tot yit-sâng, ngì-têu chhiu pak hí-lòi chéu; na yû ńg-ke thi̍t-ngìn hot-hot tot-tot, ngì-têu chhiu chhiòn-kiûn chéu chhiang-chhiang. To-mî, ngì-têu ke kiûn-chhui chhiu chhûn sân-táng kû-tân ke yit-kî khì-kô!
[18] Chúng-he Song-chú hàn chhai ke-vi tén, oi sṳ̂-ên pûn ngì-têu; Kì oi hîn-hí, oi lìn-mén ngì-têu, yîn-vi Song-chú he kûng-chṳn ke Song-ti. Tén-heu Kì ke ngìn chhiòn-phu ngióng-pân hen-fuk â!
[19] Ngì-têu he̍t chhai Siak-ôn, chhai Yâ-lu-sat-lâng ke ngìn-mìn â, m̀-hó chai kieu lé. Song-chú he chhṳ̀-oi ke; ngì-têu hiong Kì khiù pông-chhu, Kì chhiu tap-yin.
[20] Chú sûi-yèn pûn ngì-têu kiên-nàn chún-fan sṳ̍t, khun-khú chún-súi lîm, chúng-he Kì hàn-he chhai phòng-piên kâu ngì-têu; ngì-têu thin-chho̍k voi khon-tó ngì-têu ke kau-sṳ̂.
[21] Na-he ngì-têu m̀-tî oi hàng chó-phién ya-he yu-phién, ngì-têu voi thâng-tó heu-poi yû sâng-yîm kóng: “Lu chhai liá-vi, hàng liá-phién lòi.”
[22] Ngì-têu oi chiông pâu-kîm ya-he siông-ngiùn ke ngiéu-siong cho lá-sap te̍p-thet, thai-sâng hêm: “Sám kha-yén têu-é!”
[23] Ngì-têu ve-chúng ke sṳ̀, Song-chú voi lo̍k-yí, pûn chúng-chṳ́ sên-chóng, pûn ngì-têu fûng-sû; ngì-têu ke ngiù-khiùn voi chhai chhin-fat ke chhó-ngièn sṳ̍t-chhó.
[24] Vi ngì-têu lài-thièn ke ngiù-è lâu lì-è voi yû chui-hó ke chhó-liau.
[25] Ngì-têu ke thi̍t-ngìn pûn-ngìn chhṳ̀-thet, kì-têu ke sàng-pó vang-thet ke sṳ̀, ngì-têu só-yû ke thai-sân lâu se-sân voi yû chhièn-súi yúng-chhut, súi tô-to pien-cho hò-pa.
[26] Ngie̍t-kông voi chhiong ngit-thèu án-kông; ngit-thèu ke kông voi pí yî-chhièn kâ chhit-phi, chhiu-chhiong chhit-ngit ke kông chhai yit-ngit cho yit-ha sa chhut-lòi! Chhai Song-chú pâu-hó Kì chṳ́-mìn ke sông-héu, yî-chhṳ kì-têu tui Kì su chhûng-sông ke-ngit, liá-têu sṳ chhiòn-phu voi fat-sên.
[27] Khon â, Song-chú ke thai-nèn lâu yùng-yeu tui yén-fông lòi lé! Kì khién-to fat-fó, fó-yên chhiong yùn-chhû. Kì mân-choi fun-nu; Kì ke fa chhiong lie̍t-fó.
[28] Kì phùn-hi chhiong cho thai-súi, chim to ngìn ke kiáng-kîn; Kì oi fí-me̍t lie̍t-koet, chhiong yung chhî-é chhî kì-têu. Kì yung mâ-hàm-thiet piong chhai kì-têu ngìn-mìn ke choi-tú, sṳ́ kì-têu hàng sí-lu.
[29] Chúng-he ngì-têu voi khoai-lo̍k chhong-kô, chhiong chhèu-sṳn-chá chhai ko-chiet ke am-pû-sṳ̀ án-ngiòng. Ngì-têu voi sîm-chûng fôn-hí, chhiong chhèu-sṳn-chá chhai chhôi-tha̍k sâng-chûng sông-hi Song-chú ke sân, to Yî-set-lie̍t ke phàn-sa̍k ke-vi hi.
[30] Song-chú oi sṳ́ tak-sà thâng tet-tó Kì vî-ngiàm ke sâng-yîm; Kì oi yung fó, vû-yùn, pên-pho̍k, lâu thai-yí sṳ́ ngìn tî Kì ke thai fat-khién lâu chit-fa̍t.
[31] Â-sut-ngìn thâng-tó Song-chú ke sâng-yîm chhiu pi̍t-pi̍t-chhat; yîn-vi Song-chú oi chit-fa̍t kì-têu.
[32] Song-chú tak-pái kûng-tá Â-sut-ngìn ke sṳ̀, Kì ke chṳ́-mìn chhiu tá-kú thàn-khìm lòi-fò. Chan-chên chûng Song-chú oi chhîn-chhṳ kûng-kit Â-sut-ngìn.
[33] Song-chú chó chhiu chún-phi hó yit-ke só-chhai — Thò-fî-thi̍t, yû thai-fó oi sêu Â-sut fòng-ti; ke he yit-ke fat-fat ke só-chhai, táng-kô tôi-mân chhèu. Song-chú oi phùn yit-héu hi, chhiong liù-vòng fó chiông ke-tôi chhèu sêu-chho̍k hí-lòi.