[1] Song-ti kóng: Chung hói-tó â, oi tiâm-tiâm, lòi-thâng Ngài ke fa! Van-mìn â, ngì-têu oi chhùng-sîn tet-tó li̍t-liong! Lûng-chúng hàng-kiâm lòi kóng-fa; ngài-têu khiung-ha lòi phien-lun sṳ-fî.
[2] Má-ngìn tui tûng-fông hîn-hí yit-ke ngìn, sṳ́ kì chhiòn-mò sṳt-phai? Má-ngìn sṳ́ kì tá-yàng chhin-tô koet-kâ, chhin-tô kiûn-vòng? Kì ke tô chhṳ̀ ngìn, to̍k-to chhiong nài-fún; kì ke chien sa ngìn, sṳ́ kì-têu chhiong fûng chhôi vò-kón.
[3] Kì kiuk kì-têu, chin-hàng fî-sòng sun-li; kì chéu hí-lòi chhiong lióng-kiok mò tap-thi!
[4] Má-ngìn sṳ́ liá-sṳ fat-sên? Má-ngìn kiet-thin li̍t-sṳ́ ke fông-hiong? He Ngài — Song-chú tui khôi-sṳ́ chhiu chhai ke-vi, kiet-suk ke sṳ̀, Ngài ya chhai ke-vi!
[5] Chung hói-tó khon-tó chhiu chho̍k-kiâng; thi-khi̍t ke ngìn ya chhiòn-phu kiâng-to pi̍t-pi̍t-chhat. Kì-têu chhiòn-phu hàng-kiâm lòi.
[6] Kì-têu fu-siông pông-chhu, kú-li chhṳ-kâ ke hiûng-thi kóng: “Oi kha hó-tám têu-é!”
[7] Muk-siong kú-li tá-kîm sṳ̂-fu kóng: “Hàn-he ngì ke sú-ngi kha-yu!” Chho ngiéu-siong ke sṳ̂-fu kín sâ tâng tâng-é ke muk-siong kóng: “Ngì cho-to tông-hó!” Kì-têu yung tâng-é chiông ngiéu-siong ku-thin hó, sṳ́ kì m̀-voi yèu-thung.
[8] Chúng-he, Yî-set-lie̍t — Ngài ke phu̍k-ngìn â, Ngâ-kok — Ngài só kién-sién ke chṳ́-mìn â, ngì he Ngài ke phèn-yû Â-pak-lâ-hón ke chṳ́-sûn.
[9] Ngài tui thiên-ngài hói-kok chiông ngì tai-lòi; Ngài tui yén-yén ke só-chhai hêm ngì. Ngài tui ngì kóng: Ngì he Ngài ke phu̍k-ngìn. Ngài kién-sién ngì, Ngài chhiu m̀-voi fit-thet ngì.
[10] M̀-sṳ́ kiâng, Ngài lâu ngì thùng-chhai; Ngài he ngì ke Song-ti, ngì hàn kiâng má-ke nè? Ngài oi sṳ́ ngì kiên-khiòng, pông-chhu ngì; Ngài oi yung kûng-ngi lâu thai-nèn lòi fù-chhṳ̀ ngì.
[11] Ke-têu tui ngì fat-khién ke ngìn voi lau-khui, tù-tó kien-seu; khî-fu ngì ke ngìn voi sêu-me̍t, m̀ kien-thet.
[12] Ngì hi chhìm lâu ngì siông-chhṳ̀ ke ngìn, chúng-he chhìm m̀-tó; ngì ke thi̍t-ngìn chhiòn-phu voi sêu-me̍t lé.
[13] Yîn-vi Ngài — Song-chú ngì ke Song-ti, oi su-pûn ngì li̍t-liong. Ngài lâu ngì kóng: M̀-sṳ́ kiâng, Ngài yit-thin pông-chhu ngì.
[14] Song-chú kóng: Yî-set-lie̍t — Ngài ke chṳ́-mìn â, Ngâ-kok ke heu-thoi â, ngì sûi-yèn chhiong chhùng-è án ngio̍k-séu, ya m̀-sṳ́ kiâng! Ngài he kiu-su̍k Chú — Yî-set-lie̍t sṳ̀n-sṳn ke Song-ti; Ngài oi pông-chhu ngì.
[15] Ngài oi chiông ngì chún-cho tá-kuk-kî, ôn yu-sîn yu-li ke chhṳ́; ngì voi tá-sui sân-liâng, sṳ́ kì-têu sàng-cho nài-fún; ngì voi tá-lan sân-kông, sṳ́ kì-têu chhiong lùng-hông.
[16] Ngì voi chiông kì-têu poi hí-lòi, pûn fûng chhôi-san, pûn thai-fûng chiông kì-têu so-chéu. Ngì chhiu voi tông fôn-hí, yîn-vi Ngài he ngì ke Song-chú; ngì voi chan-mî Ngài — Yî-set-lie̍t sṳ̀n-sṳn ke Song-ti.
[17] Ngài khiùng-khú ke chṳ́-mìn chhìm m̀-tó súi lîm, kì-têu tông choi-châu ke sṳ̀, Ngài — Song-chú oi thâng kì-têu ke khì-tó; Ngài — Yî-set-lie̍t ke Song-ti yit-thin m̀-voi fit-thet kì-têu.
[18] Ngài oi sṳ́ thai-hò chhut-hien chhai fông-sân chûng, sṳ́ chhièn-súi chhai sân-lak chûng yúng chhut-lòi. Ngài oi sṳ́ sâ-mo̍k yû pî-thòng, sṳ́ hôn-thi yû súi-ngièn.
[19] Ngài oi chhai sâ-mo̍k chûng chung hiông-pak-su lâu kîm-ha̍p-fôn-muk, ya chung sa̍k-liù-su lâu kám-lám-su. Khóng-yâ chûng voi sâng-yû chhiùng-su, chham-é, lâu vòng-yòng-su.
[20] Thai-kâ yit-khon chhiu voi tî, yit-sióng chhiu voi liáu-kié: Ngài he Song-chú; liá-têu sṳ he Ngài ke sú vàn-sṳ̀n ke, liá-têu he Yî-set-lie̍t sṳ̀n-sṳn ke Song-ti chhóng-chho ke.
[21] Song-chú hiong ká sṳ̀n thiâu-chan kóng: Ngì-têu oi vi chhṳ-kâ phien-fu! Ngâ-kok ke vòng án-ngiòng siên-pu: Chiông ngì-têu chui yû-li̍t ke lî-yù thì chhut-lòi!
[22] Ngì-têu lòi yi-ngièn voi fat-sên ke sṳ, kié-sṳt siên-chhièn sṳ-chhìn ke yi-ngi. Lòi chṳ́-sṳ ngài-têu, sṳ́ ngài-têu yû phan-fap sióng-tó liá-têu sṳ-chhìn ke kiet-khiu̍k, ya-he chṳ́-sṳ ngài-têu chiông-lòi ke sṳ-khien.
[23] Pûn ngài-têu mìn-pha̍k chiông-lòi voi ngióng-pân, ngài-têu chhiu tî ngì-têu he sṳ̀n. Ngì-têu kong-fuk ya-he kong-châi, lòi sṳ́ ngài-têu yu fông-chông yu chho̍k-kiâng.
[24] Ngì-têu son má-ke tûng-sî! Ngì-têu só-cho ke chhiòn-phu he khûng-khûng; pai ngì-têu ke ngìn fî-sòng khó-vu!
[25] Ngài yí-kîn chhai tûng-fông hîn-hí yit-ke ngìn, kì voi kho Ngài ke miàng khì-khiù. Ngài oi hêm kì tui pet-fông lòi kûng-kit ngì-têu; kì voi chien-tha̍p kiûn-vòng chhiong chhio nài, chhiu-chhiong sêu-fì sṳ̂-fu tha̍p-nài.
[26] Ngì-têu tông-chûng kám yû má-sà yi-ngièn liá-sṳ voi fat-sên, hó sṳ́ ngài-têu kóng kì mò m̀-chho̍k nè? Ngì-têu tông-chûng khok-sṳ̍t mò yit-sà thì-hí án-ngiòng ke sṳ; mò-ngìn thâng-tó ngì-têu kóng-ko án-ngiòng ke fa!
[27] Ngài — Song-chú chui-siên lâu Siak-ôn kóng: Khon â, ngì-têu khon ke-têu sṳ! Ngài chiông yit-ke po hó sêu-sit ke su-pûn Yâ-lu-sat-lâng.
[28] Ngài khon só-yû ke sṳ̀n-mìn, mò yit-ke yû-fa hó-kóng; mò yit-ke yû phan-fap en Ngài ke mun-thì.
[29] Só-yû ke sṳ̀n-mìn chhiòn-phu mò-yáng mò-chiak; só-yû ke ngiéu-siong chhiòn-phu chhiong fûng, he hî-khûng! Mò yit-khien sṳ-chhìn cho sṳ̀n-kûng.