[1] Liá he Song-ti pûn Â-mô-sṳ̂ ke lai-é Yî-soi-â ke khí-sṳ, he yû-koân Pâ-pí-lùn ke sin-sit.
[2] Oi chhai kông-kông ke sân-kông táng chhap yit-kî chan-khì. Oi hiong chan-sṳ ya̍k-sú, thai-sâng fat-chhut min-lin, ham kì-têu kûng-ngi̍p ke-têu kui-chhu̍k ke mùn.
[3] Song-chú yí-kîn tiám-chhè ke-têu chhûng-mân sin-sîm ke yúng-sṳ, ham kì-têu hi tá-yàng liá-chhòng sṳn-chan; Kì oi chit-fa̍t ke-têu ngiâ Kì fat-khién ke koet-kâ.
[4] Thâng â! Sân-táng yû chhin-tô chhàu-nau ke sâng; ke he van-mìn thai-sâng hêm ke sâng, he chhin-tô koet-kâ si̍p-ha̍p ke sâng. Song-chú — Van-kiûn ke Ngièn-soi yí-kîn tiám-chhè kiûn-chhui, chún-phi siông-chhṳ̀.
[5] Kì-têu he tui thiên-piên, tui yén-yén ke koet-kâ ko-lòi ke. Song-chú oi chhai thai fat-khién chûng fí-me̍t chhiòn-koet.
[6] Thai-sâng chhin-kieu â! Song-chú ke ngit-è khiûn lé! Chhiòn-nèn ke Song-ti sṳ̂-hàng fí-me̍t ke ngit-è to lé!
[7] Tak-sà ke sú ngiôn-ngiôn mò-li̍t; tak-ke ngìn mò pan-tiám yúng-hi!
[8] Kì-têu fî-sòng chho̍k-kiâng; kì-têu su-chhin thung-khú, chhiong fu-ńg sên-sán sṳ̀ ke chhṳn-thung. Kì-têu ngì khon ngài, ngài khon ngì, kín-khon kín-kiâng; mien-fùng chi-cha.
[9] Song-chú ke ngit-è voi to lé! Yit-thin voi yû chhàn-ngiûn, thung-hen lâu thai fat-khién! Chhiòn sṳ-kie voi sàng-cho fông-thi; tak-ke chhui-ngìn chhiòn-phu voi me̍t-mòng.
[10] Thiên-táng ke sên-é chhiòn-phu m̀-voi fat-kông; ngit-thèu yit-chhut chhiu am-thet, ngie̍t-kông me mùng-mùng mò-kông.
[11] Song-chú kóng: “Ngài oi sṳ́ liá sṳ-kie yîn-vi chhûng-mân fái hàng-vì su chit-fa̍t, sṳ́ fái-ngìn yîn-vi só-fam ke chhui su chit-fa̍t. Ngài oi kiet-suk kiêu-ngau ngìn ke chhṳ-thai, chṳ-fu̍k chhàn-ngiûn lâu khiòng-phau ke ngìn.
[12] Yàng-ko liá sṳ-lien ke ngìn voi pí sùn-kîm kha-séu.
[13] Ngài oi sṳ́ thiên thîn-thûng, thi yèu-thung; yîn-vi liá he Ngài — Song-chú, Van-kiûn ke Ngièn-soi su-hi lâu thai fat-khién ke ngit-è.
[14] “He̍t chhai liá-vi ke ngoi-koet ngìn voi chéu-chón chhṳ-kâ ke kâ-hiông, si-san thò-chéu, chhiong pûn lia̍p-ngìn kiuk ke lu̍k-khiùn, chhiong mò mu̍k-ngìn cheu-ku ke yòng-khiùn.
[15] Pûn-ngìn kiuk-tó ke chhiòn-phu voi pûn-ngìn chhṳ̀-sí; pûn-ngìn chok-tó ke chhiòn-phu voi sí chhai tô-ha.
[16] Kì-têu ke ô-nga-é voi chhai kì-têu mien-chhièn pûn-ngìn te̍p-sí; kì-têu ke vuk-è pûn-ngìn chhióng-tho̍t; kì-têu ke pû-ngiòng su-ngìn vú-yu̍k.”
[17] Song-chú kóng: “Ngài oi sô-súng Mí-tí-â-ngìn hi kûng-tá Pâ-pí-lùn. Mí-tí-â-ngìn m̀ thâm pha̍k-ngiùn, mò-oi vòng-kîm.
[18] Kì-têu oi yung chien sa-sí heu-sâng ngìn; kì-têu m̀-voi lìn-mén ô-nga-é, ya m̀-voi thí-sit se-ngìn-è.
[19] Pâ-pí-lùn pún-lòi he chhiong pó-sa̍k án-chiâng ke vòng-koet, he Pâ-pí-lùn-ngìn ke kông-yùng. Chúng-he Ngài — Song-ti oi fí-me̍t kì, chhiu-chhiong Ngài sṳt fí-me̍t Só-tô-mâ lâu Ngò-mô-lâ yit-yong.
[20] Yún-yén m̀-voi chai yû-ngìn chhai ke-vi he̍t; m̀-voi yû Â-lâ-pak-ngìn chhai ke-vi tap chong-phùng, ya m̀-voi yû mu̍k-ngìn chhai ke-vi chóng-yòng.
[21] Ke só-chhai voi pûn yâ-chhu chiam-hi he̍t; meu-thèu-tiâu voi chhai ke-vi cho-teu, thò-niâu he̍t chhai ke-vi, yâ-sân-yòng chhai ke-vi thiau-lòi thiau-hi,
[22] sài-lòng voi chhai sú-ví-só thai-sâng kieu, yâ-kiéu chhai fà-li ke vòng-kiûng tú kín-phoi. Pâ-pí-lùn thai-nàn lìm-thèu lé! Kì ke ngit-è mò-kiú lé!”