[1] Chúng-he ke su-ko khú-nan ke ngìn, m̀-voi chai khon-tó vû-am lé. Yî-chhièn Sî-pu-lùn lâu Nâ-fut-thâ-li lióng kî-chhu̍k só-he̍t ke thi-fông sṳt pûn-ngìn khon-khiâng; chúng-he chiông-lòi liá thi-khî, chhiu-he tui Thi-chûng-hói chhṳ̍t-to Yok-tan-hò tûng-phién, pâu-hàm ngoi-chhu̍k ngìn he̍t ke Kâ-li-li, chhiòn-phu voi tet-tó kông-yùng.
[2] Sên-fa̍t chhai vû-am chûng ke ngìn, yí-kîn khon-tó thai kông; he̍t chhai sí-yîm chṳ̂ thi ke ngìn, liá-ha yû kông cheu kì-têu.
[3] Song-chú â, Ngì su-pûn kì-têu khi̍t-thai ke hí-lo̍k; Ngì chen-kâ kì-têu ke fôn-hí. Kì-têu chhai Ngì mien-chhièn chhiu-chhiong ngìn sû-sṳ̀n nùng-chok-vu̍t án fôn-hí, yu chhiong ngìn fûn-hióng chan-li-phín án khoai-lo̍k.
[4] Yîn-vi Ngì yí-kîn chhù-thet kì-têu ke chhûng ak, ngiú-thôn tá kì-têu ke phì-piên, áu-thôn khî-fu kì-têu yung ke kun-é, chhiu-chhiong Ngì yî-chhièn tá-yàng Mí-thien kiûn-chhui khiung-yong.
[5] Chhîm-lio̍k-chá chok ke hài, kò tông-tô hiet-chiak ke sâm, chhiòn-phu oi sêu-thet, chhiong chhèu án-ngiòng sêu-thet.
[6] Yû yit-ke ô-nga-é vi ngài-têu chhut-se! Yû yit-ke lai-é su-pûn ngài-têu! Kì lòi he oi thúng-chhṳ ngài-têu. Kì ke miàng ôn-to: “Khì-meu ke Thó-sṳ̂”, “Chhiòn-nèn ke Song-ti”, “Yún-yén ke Â-pâ”, “Fò-phìn ke Kiûn-vòng”.
[7] Kì ke chú-khièn voi ki-siu̍k chen-chóng; kì ke vòng-koet yún-hióng fò-phìn. Kì oi sṳ̀n-chiap Thai-ví ke vòng-vi; kì oi yung kûng-phìn lâu chṳn-ngi lòi cho thúng-chhṳ ke kî-chhú, tui liá-ha chhṳ̍t-to yún-yén. Song-chú — Van-kiûn ke Ngièn-soi oi ngie̍t-sîm sṳ̀n-chhiu liá-sṳ.
[8] Chú yí-kîn tui Yî-set-lie̍t — chhiu-he Ngâ-kok ke chṳ́-sûn siên-phan.
[9] Chhiòn Yî-set-lie̍t ngìn-mìn, pâu-hàm só-yû he̍t chhai Sat-mâ-li-â ke ngìn, chhiòn-phu oi tî Song-ti án-ngiòng siên-phan lé. Kì-têu ke sîm tông kiêu-ngau, chhṳ-khoâ kóng:
[10] “Chôn-vuk vang-thet, ngài-têu lòi hí sa̍k-vuk; sông-é su cho ke thai-liòng thôn-thet, ngài-têu lòi von chui-hó ke hiông-pak-su.”
[11] Só-yî, Song-chú fat-thung kì-têu ke thi̍t-ngìn lòi kûng-kit kì-têu.
[12] Si-li-â-ngìn chhai tûng-phién, Fî-li-sṳ-ngìn chhai sî-phién; chhiòn-phu tá-khôi choi sióng-oi thûn Yî-set-lie̍t. Sûi-yèn án-ngiòng, Song-chú ke su-hi hàn-màng so̍t; Kì hàn-he oi khià-sú tá kì-têu.
[13] Sûi-yèn Song-chú — Van-kiûn ke Ngièn-soi chit-fa̍t Yî-set-lie̍t ngìn-mìn, kì-têu hàn-he m̀-hén fí-kói, m̀-hén chón-to Song-chú mien-chhièn.
[14] Song-chú oi chhai yit-ngit tông-chûng chit-fa̍t Yî-set-lie̍t ke liâng-chhiu lâu ngìn-mìn; Kì oi chiông kì-têu ke thèu lâu mî chhiòn-phu to̍k-thet.
[15] Kha-tô se, yû miàng-sâng ke ngìn chhiu-he thèu, kóng fâ-liâu kâu-ngìn ke siên-tî chhiu-he mî.
[16] Ngièn-lòi yin-kôi liâng-thô ngìn-mìn ke fán-chón chiông ngìn-mìn tai-ngi̍p chhâ-lu, hoi kì-têu su mì-fe̍t.
[17] Só-yî, Chú chhie̍t-tui m̀-voi piong-ko kì-têu ke heu-sâng ngìn, ya m̀-voi lìn-mén kì-têu ke koá-fu lâu kû-yì; yîn-vi só-yû ke ngìn mò kin-vi Song-chú, mò-lun cho-sṳ ya-he kóng-fa lûng-chúng chhiong ngong-é khiung-yong. Sûi-yèn án-ngiòng, Song-chú ke su-hi hàn-màng so̍t; Kì hàn-he oi khià-sú tá kì-têu.
[18] Ngìn-mìn ke sià-ok chhiu-chhiong fó sêu net-è lâu chhi̍t-lì, yu chhe-tó su-lìm, thai-fó chho̍k-to tông-mâng, kién-hí yit-thòn yit-thòn ke vû-yên, chhung-tén sông-thiên.
[19] Yîn-vi Song-chú — Van-kiûn ke Ngièn-soi thai fat-khién, Kì ke chit-fa̍t chhiong fó, chhiòn-thi sêu hí-lòi, ngìn-mìn sàng-cho chhèu kín sêu-tén hi; mò-ngìn voi lìn-mén hiûng-thi.
[20] Chhai koet-nui ke tak só-chhai, ngìn chhìm-lòi chhìm-hi, chhióng tûng-sî sṳ̍t, hàn-he sṳ̍t m̀-páu; tak-sà voi sṳ̍t chhṳ-kâ ke lìn-sa.
[21] Mâ-nâ-sî-ngìn lâu Yî-fap-lièn-ngìn fu-siông kûng-kit, kì-têu yu lièn-ha̍p hí-lòi kûng-kit Yù-thai. Sûi-yèn án-ngiòng, Song-chú ke su-hi hàn-màng so̍t; Kì hàn-he oi khià-sú tá kì-têu.