[1] Liá-kién sû ki-chai Yâ-li-mí só-kóng ke fa. Yâ-li-mí ke â-pâ Hî-le̍t-kâ he Phien-ngâ-mén-thi Â-nâ-thut-sàng ke yit-ke chi-sṳ̂.
[2] Yù-thai-vòng Â-mùn ke lai-é Yok-sî-â cho vòng ke thi sṳ̍p-sâm ngièn, Song-chú hiong Yâ-li-mí kóng-fa;
[3] Yok-sî-â ke lai-é Yok-ngâ-kin chhṳ-lî Yù-thai-koet khì-kiên, Song-chú yu hiong Yâ-li-mí kóng-fa. Tui ke-sṳ̀ yî-heu Song-chú sòng-sòng hiong kì kóng-fa, yit-chhṳ̍t to Yok-sî-â ke nang-ngoi yit-ke lai-é Sî-tí-kâ cho Yù-thai-vòng ke thi sṳ̍p-yit ngièn ńg-ngie̍t, ke-sṳ̀ Yâ-lu-sat-lâng-ngìn pûn-ngìn chok-to Pâ-pí-lùn hi.
[4] Song-chú tui ngài kóng:
[5] “Ngài sṳ́ ngì chhai â-mê ke tú-sṳ́ sàng-thôi yî-chhièn, Ngài yí-kîn ngin-sṳt ngì; ngì hàn-màng chhut-se, Ngài yí-kîn chiông ngì fûn-phe̍t cho-sṳn, chṳ́-thin ngì cho van-koet ke siên-tî.”
[6] Ngài en-kóng: “Chṳ-kô ke Song-chú â, ngài thet heu-sâng; ngài mò choi-mâ.”
[7] Chúng-he Song-chú tui ngài kóng: “Ngì m̀-hó kóng chhṳ-kâ thet heu-sâng. Mò-lun Ngài phai ngì to má-ngìn ke-vi hi, ngì chhiu hi; Ngài fûn-fu ngì kóng má-ke, ngì chhiu kóng má-ke!
[8] Ngì m̀-sṳ́ kiâng kì-têu; yîn-vi Ngài lâu ngì khiung-ha, Ngài voi kiu ngì. Ngài — Song-chú án-ngiòng siên-pu lé!”
[9] Yèn-heu, Song-chú chhûn-sú miâ ngài ke choi, tui ngài kóng: “Ngì khon, Ngài chiông Ngài ke fa piong chhai ngiâ choi-tú.
[10] Ngài kîm-pû-ngit chiông khièn-piang kâu-pûn ngì; ngì oi chhai van-koet van-mìn chûng cho pâng-chhut, chhak-thet, pho-fái, thûi-fân, chhùng-kien, lâu châi-chung ke kûng-chok.”
[11] Song-chú mun ngài: “Yâ-li-mí â, ngì khon-tó má-ke?” Ngài en-kóng: “Ngài khon-tó yit-kî hen-su khoá.”
[12] Song-chú kóng: “Mò m̀-chho̍k! Ngài yit-chhṳ̍t koân-sîm liù-yi, oi sṳ́ Ngài ke fa tet-tó sṳ̍t-hien.”
[13] Song-chú yu mun ngài: “Ngì hàn khon-tó má-ke?” Ngài en-kóng: “Ngài khon-tó sêu-tén kún-súi ke vo̍k-thèu, tui pet-fông hiong liá-phién tó ko-lòi.”
[14] Song-chú tui ngài kóng: “Voi yû châi-nan tui pet-fông lòi, lìm-to he̍t chhai liá thi-fông só-yû ke ngìn-mìn.
[15] Yîn-vi Ngài oi seu-si̍p pet-fông só-yû ke koet-kâ; kì-têu ke kiûn-vòng voi lòi cham-liâng Yâ-lu-sat-lâng, thúng-chhṳ kûi-chak sàng lâu Yù-thai-koet só-yû ke sàng-sṳ.
[16] Ngài oi chit-fa̍t Ngài chṳ́-mìn só-fam yit-chhiet ke chhui-ok; kì-têu lì-khôi Ngài, hi sêu-hiông pûn phe̍t ke sṳ̀n-mìn, pai chhṳ-kâ sú só-chho ke ngiéu-siong.
[17] Yâ-li-mí â, ngì oi chún-phi hó, khî hí-lòi, chiông Ngài min-lin ngì kóng ke yit-chhiet fa lâu kì-têu kóng. M̀-hó kiâng kì-têu; na-mò, Ngài chhiu sṳ́ ngì chhai kì-têu mien-chhièn chho̍k-kiâng.
[18] Yâ-li-mí â, ngì chu-yi thâng! Yù-thai chhiòn-koet — kiûn-vòng, kôn-chóng, chi-sṳ̂ lâu ngìn-mìn chhiòn-phu voi fán-tui ngì. Chúng-he, Ngài kîm-pû-ngit oi su-pûn ngì li̍t-liong tí-khong kì-têu; ngì voi chhiong sàng-pó, thiet-chhû, thùng-chhiòng án kiên-ku.
[19] Kì-têu mò khó-nèn yàng-ko ngì; yîn-vi yû Ngài lâu ngì khiung-ha, Ngài voi kiu ngì. Ngài — Song-chú án-ngiòng siên-pu lé.”