[1] Song-chú kóng: Chûi-khiù kûng-ngi, chhìm-khiù Song-chú ke ngìn â, oi thâng Ngài ke fa. Ngì-têu oi sióng khon-é, ngì-têu chhiong he tui sa̍k-thèu pau chhut-lòi ke, tui sa̍k-hâng yet chhut-lòi ke.
[2] Fì-sióng ngì-têu ke chú-siên Â-pak-lâ-hón; fì-sióng kiung ngì-têu ke Sâ-lâ. Tông Ngài fû-seu Â-pak-lâ-hón ke sṳ̀, kì pin-mò lai-é; chúng-he Ngài su-fuk pûn kì, sṳ́ kì yû tông-tô ke chṳ́-sûn.
[3] Ngài thin-chho̍k oi lìn-mén Yâ-lu-sat-lâng, oi ôn-ví he̍t chhai Siak-ôn fông-phû ke ngìn. Ngài oi sṳ́ ke khóng-yâ pien-cho chhiong Yî-thien-yèn; Ngài oi sṳ́ sâ-mo̍k sàng-cho Song-chú ke fâ-yèn. Ke-vi voi yû khoai-lo̍k, fôn-hí, lâu chan-mî kám-chhia ke kô-sâng.
[4] Ngài ke chṳ́-mìn â, oi thâng! Ngài ke koet-mìn â, oi chu-yi thâng: Ngài oi chiông Ngài ke fap-li̍t su-pûn van-koet; Ngài ke kûng-ngi voi tai-pûn kì-têu kông-mìn.
[5] Ngài chú-chhṳ̀ kûng-ngi ke sṳ̀-kiên to lé, Ngài ke kiu-ên yí-kîn fat-chhut. Ngài oi chhîn-chhṳ thúng-chhṳ van-mìn; chung hói-tó lûng-chúng tén-tén Ngài, phan-mong Ngài hi chṳ́n-kiu kì-têu.
[6] Ngì-têu ngo-thèu mong thiên-khûng, tâi-thèu khon thai-thi. Thiên-khûng voi chhiong yên-yùn sêu-san; thai-thi voi chhiong sâm-fu lan-thet; thi-song ke ngìn-mìn ya voi chhiong vû-yìn sí-thet. Chúng-he Ngài ke chṳ́n-kiu yún-yén chhòng-chhùn; Ngài ke kûng-ngi thin-chho̍k m̀-voi fi-thet.
[7] Tî má-ke he kûng-chṳn, ki-tet Ngài kau-hiun ke ngìn â, ngì-têu oi thâng Ngài ke fa! M̀-sṳ́ kiâng phe̍t-ngìn ke vú-yu̍k lâu sâu-nat;
[8] kì-têu voi chhiong sâm-fu pûn chu-chhùng chu-thet, chhiong yòng-mô pûn chhùng-è sṳ̍t-thet. Chúng-he Ngài ke kûng-ngi yún-yén chhòng-chhùn, Ngài ke chṳ́n-kiu chhṳ̍t-to van-thoi.
[9] Song-chú â, khià hí-lòi! Chiông Ngì mân-yû nèn-li̍t ke sú khià hí-lòi! Chhiu-chhiong kú-chó ke-têu ngit-è khiung-yong. Kám m̀-he Ngì chiông hói-koai Lâ-ha̍p-pak to̍k-to sui-sui? Kám m̀-he Ngì chhiuk-sí ke ok-liùng?
[10] Ngì sṳt sṳ́ thai-hói châu-thet, sṳ́ chhṳ̂m-thàm pien-cho hôn-thi, chhai chhṳ̂m-hói chûng khôi thai-lu, pûn Ngì só kiu-su̍k ke ngìn thûng-ko.
[11] Ke-têu Ngì só kiu-su̍k ke ngìn yit-thin voi chón-lòi; kì-têu voi khoai-lo̍k thai-sâng chhong-kô, fôn-fôn hí-hí lòi-to Siak-ôn. Kì-têu voi yún-yén fôn-hí khoai-lo̍k, m̀-voi chai yù-sèu than-sit.
[12] Song-chú kóng: He Ngài, ôn-ví ngì ke chhiu-he Ngài! Ngì ngióng oi-sṳ́ kiâng ke-têu voi sí ke ngìn? Kiâng ke-têu sâng-miang chhiong chhó ke sṳ-kiên ngìn?
[13] Ngì m̀ ki-tet chho ngì ke Song-chú he-mò? Kám m̀ ki-tet he má-ngìn khôi-thiên, phit-thi? Ngì cho-má-ke kûi-ngit kiâng pet-hoi ngì ke ngìn, kiâng sióng-oi fí-me̍t ngì ke ngìn thai fat-khién? Liá-ha kì-têu ke thai fat-khién chhai nai-vi nè?
[14] Pûn-ngìn ap-pet ke tông-kiak voi tet-tó chhṳ-yù lé; kì-têu m̀-voi lo̍k yîm-kiên, ya m̀-voi khiam sṳ̍t-vu̍t.
[15] Ngài he Song-chú, ngì ke Song-ti; Ngài kiâu-thûng thai-hói, sṳ́ hói-long ho-ho-kún. Ngài ke miàng he Song-chú — Van-kiûn ke Ngièn-soi!
[16] Ngài oi chiông Ngài ke fa chhòn-pûn ngì, Ngài oi yung Ngài ke sú châ-tén ngì. Ngài chhiu-he ke khôi-thiên phit-thi ke, yu tui Siak-ôn kóng: Ngì he Ngài ke chṳ́-mìn!
[17] Yâ-lu-sat-lâng â, hong hí-lòi! Hong hí-lòi, khî chang-lòi! Song-chú chit-fa̍t ngì ke sṳ̀, sṳ́ ngì lîm thai fat-khién ke pî, sṳ́ ngì lîm-tó lîn-lîn-chhîn-chhîn.
[18] Ngì yông-yuk ke chṳ́-mìn, mò yit-ke yîn-thô ngì; chhai ngì hiuk-thai ke chṳ́-mìn tông-chûng, ya mò yit-ke khiên ngì ke sú.
[19] Ngì ke thú-thi su-tó fí-me̍t, pho-fái, ngì ke ngìn-mìn tù-tó kî-fông, chan-chên; liá lióng-chúng châi-fo lìm-to ngì, mò-ngìn vi ngì pî-sông, mò-ngìn lòi ôn-ví ngì.
[20] Ngì ke chṳ́-mìn chhai kiê-thèu hong-mî fùn-tó; kì-têu chhiong lìn-yòng lo̍k chhai lò-mióng tú. Kì-têu lîm mân Song-chú ke thai fat-khién, sṳ̀n-su Song-ti ke chit-phi.
[21] Yâ-lu-sat-lâng su-khú ke chṳ́-mìn â, ngì-têu ke chui m̀-he yîn-vi lîm chiú-chui; liá-ha ngì-têu oi thâng-hó!
[22] Chṳ-kô ke Song-chú — vi ngì-têu phien-fu ke Song-ti, án-ngiòng kóng: Khon â, Ngài yí-kîn chiông ke sṳ́ ngì-têu lîn-lîn-chhîn-chhîn ke pî-é nâ-chéu; ke he Ngài fat-khién ke sṳ̀ pûn ngì-têu ke pî; ngì-têu m̀-sṳ́ chai lîm lé.
[23] Ngài oi chiông liá pî chón-pûn khî-fu ngì-têu ke ngìn; kì-têu sṳt tui ngì-têu kóng: “Phu̍k hâ-lòi, pûn ngài-têu tha̍p ko-hi!” Ngì-têu chhiu koâi-koâi chiông poi-nòng chún-lu pûn-ngìn hàng.