[1] Song-chú kò-yù sat-li̍p Pô-sṳ̂-vòng Sai-lû-sṳ, kién-sién kì cho fòng-ti. Song-chú chṳ́-phai kì cham-liâng lie̍t-koet, phai kì hi kám-séu ke-têu vòng ke khièn-li̍t. Song-chú oi lie̍t-koet vi Sai-lû-sṳ thai khôi sàng-mùn, m̀-voi chai koân hí-lòi. Song-chú tui kì án-ngiòng kóng:
[2] Ngài oi chhîn-chhṳ vi ngì khôi-lu, vi ngì siok-phiàng thai-se sân-kông. Ngài oi kûng-pho thùng-mùn, chám-thôn thiet-chhôn.
[3] Ngài oi chiông am-chûng khong-tén ke pó-vu̍t, chhông-khu tún-tén ke chhòi-fu chhiòn-phu su-pûn ngì; Ngài oi ngì tî Ngài he Song-chú, ya tî Yî-set-lie̍t ke Song-ti chṳ́-miàng fû-seu ngì.
[4] Ngài chṳ́-thin ngì pông-chhu Ngài ke phu̍k-ngìn Ngâ-kok, fù-chhṳ̀ Ngài só kién-sién ke Yî-set-lie̍t. Ngài chṳ́-miàng fû-seu ngì; ngì sûi-yèn m̀ ngin-sṳt Ngài, Ngài hàn-he oi su ngì miàng-ho.
[5] Ngài he Song-chú, thu̍k-yit vù-ngi ke; Ngài yî-ngoi mò phe̍t ke Song-ti. Sûi-yèn ngì m̀ ngin-sṳt Ngài, Ngài hàn-he oi su ngì li̍t-liong.
[6] Ngài án-ngiòng cho, he oi sṳ́ phû-thiên-ha, tui ngit-chhut to ngit-lo̍k chṳ̂-thi ke ngìn, chhiòn-phu tî: Ngài yî-ngoi mò phe̍t ke sṳ̀n; Ngài he Song-chú, thu̍k-yit vù-ngi ke.
[7] Ngài chho kông-mìn, ya chho vû-am; Ngài kong-fuk, ya kong-fo. Ngài he Song-chú; liá yit-chhiet he Ngài cho ke.
[8] Ngài sṳ́ kûng-ngi chhiong kâm-lìm tui thiên kong-hâ, thai-thi chhiu lie̍t-khôi lòi sṳ̀n-chiap, khôi-chhut chhṳ-yù lâu chṳn-ngi ke fâ. Ngài he Song-chú; Ngài oi sṳ́ liá-ke sṳ sṳ̍t-hien.
[9] Lâu chhóng-chho Chú tui-khong ke ngìn chhám lé! Fì-è kám cho-tet lâu chho kì ke sṳ̂-fu phien-lun? Nài kám cho-tet mun sṳ̂-fu oi chiông kì cho-sṳ̀n má-ke? Kì kám cho-tet koai-yen sṳ̂-fu ke sú-ngi m̀ kô-mìn mâ?
[10] Kám yû-ngìn hiong yà-ôi khong-ngi kóng: “Cho-má-ke chiông ngài kiung cho án-ngiòng?” Liá-chúng ngìn chhám lé!
[11] Song-chú — Yî-set-lie̍t sṳ̀n-sṳn ke Song-ti, chhiu-he chóng-kón vi-lòi ke chhóng-chho Chú án-ngiòng kóng: Mò-ngìn yû-khièn mun Ngài chṳ́-ńg ke sṳ, mò-ngìn yû-khièn kón Ngài oi cho-má-ke!
[12] Ngài chhîn-chhṳ chhóng-chho liá-ke thai-thi; Ngài chhóng-chho thi-song ke ngìn-lui. Ngài chhîn-sú chán-khôi thiên-khûng, Ngài kón-lî ngit, ngie̍t, sên-sṳ̀n.
[13] Ngài cheu kûng-ngi sṳ́ Pô-sṳ̂-vòng Sai-lû-sṳ hîn-hí; Ngài oi siû-chhṳ̍t kì hàng ke lu. Ngài oi kì chhùng-kien Ngài ke sàng-sṳ Yâ-lu-sat-lâng, pông-chhu Ngài ke-têu pûn-ngìn chok-hi ke chṳ́-mìn tet-tó chhṳ-yù. Kì cho liá-sṳ m̀-he vi kûng-chhièn, ya m̀-he vi chióng-sóng. Song-chú — Van-kiûn ke Ngièn-soi án-ngiòng siên-pu lé.
[14] Song-chú tui Yî-set-lie̍t án-ngiòng kóng: Âi-khi̍p lâu Kú-sṳ̍t ke chhòi-sán chhiòn-phu voi kûi ngì; kô-thai ke Sî-pâ-ngìn voi cho ngì ke nù-chhòi, tai-tén só-lien thèn chhai ngì heu-poi. Kì-têu voi khúi chhai ngì mien-chhièn sṳ̀n-ngin kóng: Song-ti ton-chṳ̂n lâu ngì thùng-chhai, pin mò phe̍t ke sṳ̀n; Kì yî-ngoi mò phe̍t ke Song-ti.
[15] Ke chṳ́n-kiu Yî-set-lie̍t ngìn-mìn ke Song-ti, he chiông chhṳ-kâ khong hí-lòi ke Song-ti.
[16] Chṳ-chho ngiéu-siong ke ngìn voi lau-khui lé; kì-têu chhiòn-phu voi tù-tó kien-seu, siû-yu̍k lé.
[17] Chúng-he Yî-set-lie̍t mùng Song-chú chṳ́n-kiu; kì-têu voi tet-tó yún-kiú ke kiu-ên, yún-yén m̀-voi kien-seu.
[18] Song-chú chhóng-chho thiên; chṳ́-yû Kì he Song-ti. Kì chho thai-thi, kiên-ku kì ke kîn-kî. Kì mò-oi pûn thi fông-thet, chhiu sṳ́ kì sàng-cho yû-ngìn he̍t ke thi-fông. Kì kóng: Ngài he Song-chú, pin mò phe̍t ke.
[19] Ngài m̀-he khong-tén, chhai vû-am ke thi-fông kóng-fa; Ngài pin mò ham Yî-set-lie̍t ngìn-mìn chhai méu-méu mòng-mòng chûng chhìm Ngài ke chṳ́-yi. Ngài he Song-chú; Ngài kóng chṳ̂n-lî; Ngài chhòn-yòng kûng-ngi.
[20] Song-chú kóng: Khiung-ha lòi â! Tui lie̍t-koet thò chón-lòi ke ngìn chhiòn-phu lòi! Ke-têu kông-tén ngiéu-siong chhai kiê-lu yù-hàng, hiong m̀-voi kiu kì-têu ke sṳ̀n-mìn khì-tó ke, chhiòn-phu he mò chṳ-sṳt ke ngìn!
[21] Yù-chhai phi-ko ke ngìn khiung-ha chhâm-siòng, to fap-thìn lòi sot-mìn! He má-ngìn chó chhiu yi-ngièn voi fat-sên ke sṳ? M̀-he Ngài — Song-chú mâ? Ngài yî-ngoi, pin-mò Song-ti; Ngài he kûng-chṳn, chṳ́n-kiu ke Song-ti, Ngài yî-ngoi mò phe̍t ke sṳ̀n.
[22] Chhiòn sṳ-kie ke ngìn â, ngì-têu kûi-hiong Ngài chhiu voi tet-kiu. Ngài he Song-ti, yî-ngoi mò phe̍t ke sṳ̀n.
[23] Ngài kóng-fa sṳ̍t-chhai, Ngài ke yin-hí m̀-voi fi-thet. Ngài chṳ́-tén chhṳ-kâ lòi fat-sṳ: Tak-sà oi khúi lo̍k-hi pai Ngài; thai-kâ oi fat-sṳ tui Ngài chhin-chûng.
[24] Kì-têu voi kóng, chṳ́-yû Song-chú yû kûng-ngi lâu li̍t-liong, só-yî ngìn oi kûi-hiong Song-chú; hen Kì ke ngìn chhiòn-phu voi kien-seu.
[25] Só-yû Yî-set-lie̍t ke chṳ́-sûn voi yîn-vi Song-chú tet-tó chṳ́n-kiu, thai-thai fôn-hí.