[1] Sat-mâ-li-â voi tù-tó châi-nan lé! Kì chhiong fâ-cho ke miên-liù, Yî-set-lie̍t ke-têu chiú-kúi lîm-to chui-chui kín khoâ-khiéu kì; kì chhiong chhai chhin-phì sân-lak táng ke fâ, chhin-chiâng yu kông-yùng, chúng-he chhin-kiak voi chhia-thet.
[2] Khon nâ, Chú chún-phi khiòng-thai yû-li̍t ke ngìn lòi kûng-kit liá-sàng. Kì lòi ke sṳ̀, chhiong hí thai-fûng, lo̍k pên-pho̍k, chhiong cho thai-súi chhûng-ngi̍p chhiòn-thi.
[3] Sat-mâ-li-â chhiong Yî-set-lie̍t ke chiú-kúi só khoâ-khiéu ke miên-liù, voi pûn-ngìn chien-tha̍p, fit chhai thi-song;
[4] kì chhiong chhai chhin-phì sân-lak táng ke fâ, chhin-chiâng yu kông-yùng, chúng-he chhin-kiak voi chhia-thet; kì yu chhiong ngie̍t-thiên yit-to chhiu tá-chṳ́ ke vù-fâ-kó, ngiâ-ngìn chu-muk, yit-su̍k chhiu pûn-ngìn chak hâ-lòi sṳ̍t-thet.
[5] Chhai ke-ngit, Song-chú — Van-kiûn ke Ngièn-soi voi chhiong chhin-chiâng yu kông-yùng ke miên-liù, tai chhai châi-nan ko-thet hàn chhûn-tó ke chṳ́-mìn thèu-nà táng.
[6] Kì oi su kûng-chṳn ke sîm pûn fap-kôn, su yúng-hi pûn fòng-sú sàng-mùn, tá-thui khiòng-thi̍t ke ngìn.
[7] Siên-tî lâu chi-sṳ̂ ya chui-to vang-kòng vang-thoi; kì-têu lîm-chiú lîm-to fù-lî fù-thù. Ke-têu siên-tî chhiòn-phu chui-to m̀ mìn-pha̍k Song-ti pûn kì-têu ke yi-siong, ke-têu chi-sṳ̂ ya lîm-to mò fap-thu fûn-phe̍t sṳ-fî.
[8] Yèn-si̍t ke chok-táng chhin-lon, chhiòn-phu he éu chhut-lòi ke lá-sap tûng-sî.
[9] Thai-kâ koai-yen ngài kóng: “Liá siên-tî to-tái kâu má-ke? Má-ngìn oi thâng kì kóng ke nè? Kì oi hi kóng pûn tú-tú tón-nen ke se-ngìn-è thâng chang-chho̍k!
[10] Kì kám sióng-oi yit-chak yit-chak sṳ, yit-chak yit-chak yîm, liá yit-si̍t-é, ke yit-si̍t-é lòi kâu ngài-têu!”
[11] Na-he ngì-têu m̀-thâng ngài ke fa, Song-ti oi phai ngoi-koet ngìn, yung tá-kiet ke sa̍t-mà kóng khì-koai ke fa lòi kau-hiun ngì-têu.
[12] Kì sṳt tui ngì-têu kóng: “Ngì-têu oi pûn thiám ke ngìn tet-tó ôn-sit, án-ngiòng ngì-têu chhai liá só-chhai chang voi tet-tó ôn-sit, tet-tó sóng-khoai”, chúng-he ngì-têu m̀-thâng Kì ke fa.
[13] Só-yî, Song-chú oi yit-chak yit-chak sṳ, yit-chak yit-chak yîm, liá yit-si̍t-é, ke yit-si̍t-é lòi kâu ngì-têu. Ke-sṳ̀, ngì-têu voi hàng yit-phu, vang yit-pái; ngì-têu voi tiet-tó su-sông, pûn-ngìn mióng-tó, chok-tó.
[14] Ngì liá-têu chhai Yâ-lu-sat-lâng kón-lî ngìn-mìn, tông ngau-man ke liâng-chhiu â, oi thâng Song-chú tui ngì-têu kóng ke fa!
[15] Ngì-têu láu-tó yí-kîn lâu sí-mòng chhiâm khie-yok, lâu yîm-kiên tá ha̍p-thùng lé, só-yî chhṳ-ngin chhai thi̍t-kiûn kîn-ko ke sṳ̀ chhiu m̀-voi sí; ngì-têu láu-tó kóng fâ-liâu lâu khî-phien ngìn ya voi phìn-ôn mò-sṳ.
[16] Liá-ha Chṳ-kô ke Song-chú oi tui ngì-têu kóng: “Ngài chhai Siak-ôn kien-li̍p kiên-khiòng vún-ku ke thi-kî, chhai ke-vi piong kui-chhung ke fòng-kok-sa̍k; yû sin-sîm ke ngìn chhiu m̀-sṳ́ chho̍k-kip.
[17] Chhai liá kî-chhú táng, Ngài oi yung kûng-ngi cho liòng-sok, yung sṳ̀n-sṳ̍t cho sien-thò.” Pên-pho̍k voi tá-lan ngì-têu só yí-kho ke fâ-liâu; thai-súi voi chim-thet ngì-têu ke ôn-chhiòn.
[18] Ngì-têu lâu sí-mòng chhiâm ke khie-yok voi fi-chhù, lâu yîm-kiên tá ke ha̍p-thùng voi chhí-sêu. Thi̍t-kiûn kîn-ko ke sṳ̀, ngì-têu chhiu pûn-ngìn chien-tha̍p.
[19] Liá châi-nan yit-pái yu yit-pái lòi tá-kit ngì-têu, ngì-têu voi ngit-ya ki-siu̍k ngiûn-su thung-khú. Song-ti tak-pái pûn ngì-têu sîn ke sin-sit, chhiòn-phu voi tai-lòi sîn ke chho̍k-kiâng!
[20] Ngì-têu chhiu-chhiong siu̍k-ngî só mèu-siá ke: “Mìn-chhòng thet tón, chhûn-kiok m̀-tet; phî-kut thet-ha̍p, koi m̀-tó chhiòn-sṳ̂n.”
[21] Song-chú oi chhiong Kì chhai Pí-lâ-sîm-sân lâu Kî-phiên sân-lak siông-chhṳ̀ só-cho ke án-ngiòng, hí-lòi vàn-sṳ̀n Kì ke kûng, he hî-khì ke kûng; Kì yit-thin voi sṳ̀n-chhiu Kì ke sṳ, he khì-koai ke sṳ.
[22] M̀-hó khon-khiâng ngài tui ngì-têu ke kín-ko! Na-mò, ngì-têu chhiu m̀-sṳ́ sióng-oi sám-thet liá-ke fái-yun. Ngài yí-kîn thâng-tó lé, Chṳ-kô ke Song-chú — Van-kiûn ke Ngièn-soi kiet-thin oi fí-thet kûi-chak koet-kâ.
[23] Ngì-têu oi liù-sîm thâng ngài ke fa, chu-yi thâng ngài lâu ngì-têu kóng ke.
[24] Kám-kóng chhai kâng-chung ke sṳ̀ tân-chhiang lài-thièn lâu sûng-nài chhiu cho-tet he-mò?
[25] Kâng-thièn ngìn yû yit-ngit chiông thièn-thi lài-hó phà-phiàng, chhiu ve-chúng, chung thai fì-hiông ya-he se fì-hiông. Kì oi chung yit-hòng yit-hòng ke séu-ma̍k ya-he thai-ma̍k, pin chhai thièn ke piên-sùn chung kha thi̍t-phe̍t ke ńg-kuk.
[26] Kì tî oi ngióng-pân kâng-chung, yîn-vi Song-ti yû kâu kì.
[27] Kì m̀-voi yung thai kun-é tá thai fì-hiông ya-he se fì-hiông; kì yung ke he tú-hó thai ke kun-é.
[28] Kì ya m̀-voi yit-chhṳ̍t sṳ́-yung fûng-chhâ, m̀-hén thìn, chho-sṳ̀n ma̍k-é ke sún-hoi. Kì tî oi ngióng-pân yung tá-kuk-chhâ, khiâng-khiâng-é chan-ko ma̍k-tôi, sṳ́ ma̍k-kón lâu ma̍k-é fûn-khôi, m̀-voi sún-fái ma̍k-é.
[29] Liá-chúng chṳ-fi chhiòn-phu he Song-chú — Van-kiûn ke Ngièn-soi su-pûn kì ke. Song-ti ke kie-va̍k ngióng-pân khì-meu; Kì ke chṳ-fi ngióng-pân ví-thai.