[1] Song-chú án-ngiòng kóng: Ngì-têu láu-tó Ngài kiuk-chéu ngì-têu ke â-mê; lâu Ngài kóng, lì-fûn sû chhai nai-vi? Ngì-têu láu-tó Ngài chhut-mai ngì-têu pûn chai-chú; to-tái Ngài chiông ngì-têu mai pûn má-ngìn nè? Ngì-têu pûn-ngìn chhut-mai he yîn-vi ngì-têu ke chhui; ngì-têu ke â-mê pûn-ngìn fit-thet he yîn-vi ngì-têu ke chhui-ko.
[2] Ngài lòi kiu ngì-têu ke sṳ̀, cho-má-ke mò-ngìn chhôi? Ngài hêm ngì-têu, cho-má-ke m̀ en Ngài? Ngì-têu láu-tó Ngài ke sú thet-tón, thet ngiôn-ngio̍k, mò-li̍t hó kiu ngì-têu he-mò? Khon â! Ngài fat-chhut min-lin, hói chhiu voi châu-thet; Ngài sṳ́ thai hò-pa pien-cho sâ-mo̍k, sṳ́ ǹg-lui yîn-vi mò súi chhiu sí-thet, chhu-thet.
[3] Ngài yû phan-fap sṳ́ thiên pien vû-am, chhiong chok mà-sâm vi sí-ngìn ôi-sông.
[4] Chṳ-kô ke Song-chú kâu ngài yin-kôi kóng ke fa, sṳ́ ngài tî oi ngióng-pân ôn-ví yù-sông ke ngìn. Tak chêu-sṳ̀n, Kì hêm-siáng ngài, sṳ́ ngài chhin sióng-oi thâng Kì ke kau-sṳ.
[5] Chṳ-kô ke Song-chú sṳ́ ngài thâng-tó Kì ke kau-sṳ; ngài pin-mò vì-poi, ya mò thui-chéu.
[6] Ngài yù-chhai ngìn tá ngài ke poi-nòng, pâng ngài ke fù-sî, phi héu-lân chhai ngài ke mien-hong; ngài yit-chhṳ̍t ngiûn-su ngìn ke vú-yu̍k.
[7] Kì-têu ke vú-yu̍k m̀-voi sông-hoi ngài, yîn-vi Chṳ-kô ke Song-chú pông-chhu ngài. Ngài tông yúng-kám lòi ngiûn-su yit-chhiet, tî ngài m̀-voi chṳ-to kien-seu.
[8] Yîn-vi Song-ti chhai ngài sṳ̂n-piên, thoi ngài sṳ̂n-yên, yû má-ngìn kám lòi lâu ngài tá kôn-sṳ̂? Ngài-têu cho-tet khiung-ha lòi-hi chhìm sṳ́m-phan-kôn! Chhin-liong ko ngài â!
[9] Chṳ-kô ke Song-chú oi chhîn-chhṳ thoi ngài phien-fu; má-ngìn yû phan-fap chṳn-mìn ngài yû-chhui nè? Ko ngài ke ngìn chhiòn-phu voi sêu-me̍t, chhiong khiu sâm-fu pûn chhùng chu-thet.
[10] Ngì-têu tông-chûng, má-ngìn he chûn-chhung Song-chú, thâng-chhiùng Kì phu̍k-ngìn kau-hiun ke ngìn nè? Chhiu-he chhai vû-am chûng hàng, hàn-he voi sin-kho Song-chú, yí-kho Song-ti.
[11] Sióng-oi mèu-hoi phe̍t-ngìn ke, voi pûn chhṳ-kâ ke yîm-mèu hoi-tó. Song-chú án-ngiòng kûi-thin: Liá-chúng ngìn yit-thin voi tù-tó châi-nan!