[1] Song-chú kóng: Choi-châu ke ngìn â, chhiòn-phu lòi! Liá-vi yû súi hó lîm! Mò-chhièn ke ngìn â, ya cho-tet lòi! Lòi mâi tûng-sî sṳ̍t! M̀-sṳ́ chhièn, m̀-sṳ́ thoi-ka, lòi mâi chiú lâu nen!
[2] Cho-má-ke liáu-chhièn hi mâi sṳ̍t m̀-tet ke tûng-sî? Cho-má-ke tá-sóng lò-luk chhon lòi ke kûng-chhièn, hàn-he tet m̀-tó páu-chiuk? Oi liù-yi thâng-chhiùng Ngài ke fa, ngì-têu chhiu voi hióng-su chui-hó ke sṳ̍t-vu̍t, sṳ́ ngì-têu sîm-lìn tet-tó páu-chiuk, mân-yû fôn-hí.
[3] Ngài ke chṳ́-mìn â, oi thâng Ngài ke fa, to Ngài liá-vi lòi. Chu-yi thâng Ngài ke fa, ngì-têu chhiu voi tet sâng-miang! Ngài oi lâu ngì-têu li̍p yún-yén ke yok, chiông Ngài yin-hí pûn Thai-ví ke khó-kho put-pien ke chhṳ̀-oi su-pûn ngì-têu.
[4] Khon â, Ngài yí-kîn li̍p kì hiong van-mìn cho Ngài ke kien-chṳn, sat-li̍p kì cho van-koet ke liâng-chhiu lâu ngièn-soi.
[5] Ngì thin-chho̍k voi seu-si̍p ngì m̀-sṳt ke lie̍t-koet, ke m̀-sṳt ngì ke lie̍t-koet voi lòi thèu-kho ngì. Ngài — Song-chú, ngì-têu ke Song-ti oi sṳ̀n-chhiu liá-sṳ; yîn-vi Yî-set-lie̍t sṳ̀n-sṳn ke Song-ti yí-kîn su-pûn ngì kông-yùng.
[6] Oi chhai hàn chhìm tet-tó Song-chú ke sṳ̀ hi chhìm Kì; oi chhai Song-chú hàn chhîn-khiun ke sṳ̀ hi khiù Kì.
[7] Fái-ngìn oi lì-khôi sià-ok ke tho-lu; fam-chhui ke ngìn oi fì-sîm chón-yi. Kì-têu yin-kôi chón-hiong Song-chú, lòi sṳ̀n-su Kì ke lìn-mén; oi kûi-hiong ngài-têu ke Song-ti, yîn-vi Kì oi sṳ̂-hàng thai sa-miên.
[8] Song-chú kóng: Ngài ke sióng-fap m̀-he ngì-têu ke sióng-fap; Ngài ke tho-lu m̀-he ngì-têu ke tho-lu.
[9] Chhiu-chhiong thiên pí thi kô-kâ chhin-tô, Ngài ke tho-lu pí ngì-têu ke tho-lu kô-kâ chhin-tô; Ngài ke sióng-fap pí ngì-têu ke sióng-fap kô-kâ chhin-tô.
[10] Chhiong siet lâu yí tui thiên-táng lo̍k hâ-lòi, pin-mò to-chón thiên-táng hi, he oi chṳ̂-yun thai-thi, sṳ́ ńg-kuk fat-ngà sên-chóng, pûn ve-chúng ke yû chúng-chṳ́, pûn ngìn yû ńg-kuk hó-sṳ̍t,
[11] Ngài ke fa chhiu-he án-ngiòng. Ngài kóng-chhut ke fa chhie̍t-tui m̀-voi khûng-khûng to-chón-lòi, yit-thin voi sṳ̀n-chhiu Ngài ke kie-va̍k, tha̍t-sṳ̀n Ngài só pân-pu ke chṳ́-yi.
[12] Ngì-têu voi fôn-fôn hí-hí chhut-lòi, phìn-phìn ôn-ôn pûn Song-ti yîn-thô. Ngì-têu hàng-ko thai-sân se-sân, kì-têu voi fôn-hí chhong-kô; ngì-têu hàng-ko thièn-yâ, lièn su-é ya chhin-miang phok-sú!
[13] Ngièn-tán sâng net-è ke só-chhai liá-ha pien-cho sâng chhiùng-pak; ngièn-tán sâng chhi̍t-lì ke só-chhai liá-ha pien-cho sâng sa̍k-liù. Liá oi cho yún-yén put-nèn chhù-thet ke ki-ho, lòi ki-ngiam Ngài — Song-chú ke sṳn-miàng.