[1] Song-chú tui Kì ke chṳ́-mìn án-ngiòng kóng: “Ngì-têu oi sú kûng-phìn hàng kûng-ngi, yîn-vi Ngài ke kiu-ên khiûn lé, Ngài ke kûng-ngi voi hién-mìn.
[2] Ngài oi su-fuk pûn ke-têu khok-sṳ̍t chûn-sú ôn-sit-ngit m̀-hén vì-fam ke ngìn; Ngài oi su-fuk pûn yit-chhiet yén-lì sià-ok ke ngìn.”
[3] Kói-sin Song-chú ke ngoi-chhu̍k ngìn m̀-hó kóng: “Song-chú chhie̍t-tui m̀-voi pûn ngài lâu Kì ke chṳ́-mìn khiung-ha cho lî-pai.” Thai-kam ya m̀-hó kóng: “Khon â, ngài he yit-thèu châu su-é.”
[4] Yîn-vi Song-chú án-ngiòng kóng: “Na-he ngì-têu thai-kam kiún-sú Ngài ke ôn-sit-ngit, cho Ngài só fôn-hí ke sṳ, yu kiên-thin chûn-sú Ngài ke yok,
[5] Ngài chhiu pûn ngì-têu ke miàng chhai Ngài ke sṳn-thien lâu Ngài ke chṳ́-mìn chûng-kiên su-ngìn ki-ngiam, yàng-ko yû chhin-tô ke chṳ́-ńg ke. Ngì-têu yún-yén m̀-voi pûn-ngìn chhù-miàng.”
[6] Yû-têu ngoi-chhu̍k ngìn yí-kîn kói-sin Song-chú, oi fu̍k-sṳ Kì, oi chhṳ̂n-siung Song-chú ke miàng, oi cho Kì ke phu̍k-ngìn, yu khok-sṳ̍t chûn-sú ôn-sit-ngit m̀-hén vì-fam, kiên-thin chûn-sú Song-chú ke yok ke,
[7] Song-chú kóng: “Ngài oi tai kì-têu to Ngài ke sṳn-sân Siak-ôn, sṳ́ kì-têu chhai Ngài khì-tó ke thien-chûng yû hí-lo̍k. Ngài oi chiap-su kì-têu chhai chi-thàn táng só-hien ke sêu-fa-chi lâu sên-ngì; yîn-vi Ngài ke sṳn-thien oi chhṳ̂n-cho van-mìn khì-tó ke thien.”
[8] Chṳ-kô ke Song-chú — chhiu-he chiông pûn-ngìn kiuk-san ke Yî-set-lie̍t-ngìn tai-chón kâ-hiông ke, án-ngiòng kóng: “Ngài hàn-oi chhi-si̍p khì-thâ ke ngìn-mìn ya lòi kâ-ngi̍p kì-têu ke hòng-lie̍t.”
[9] Song-chú sṳt ham ngoi-koet ngìn chhiong sân-yâ lâu su-lìm chûng ke yâ-chhu án-ngiòng siông-châng lòi thûn-sṳ̍t Kì ke chṳ́-mìn!
[10] Kì kóng: “Só-yû ke sú-mong-chá chhiòn-phu he chhiâng-miâng; kì-têu vàn-chhiòn khon m̀-chhut ngùi-hiám, m̀-tî oi kín-ko Ngài ke chṳ́-mìn. Kì-têu he yit-khiùn m̀-voi phoi ke kiéu, kûi-ngit soi-tén pot-mung!
[11] Kì-têu chhiong thâm-sṳ̍t ke kiéu, sṳ̍t m̀-tî páu; kì-têu ngièn-lòi he mu̍k-ngìn, chúng-he má-ke tû m̀-tî, tak-sà phiên-hàng chhṳ-kâ ke lu, chûi-khiù chhṳ-kâ ke li-yit.
[12] Kì-têu kóng: ‘Lòi! Ngài lòi-hi nâ chiú! Ngài-têu lòi fong-se lîm ngiàm-chiú; thiên-kông-ngit m̀-voi mò-thet hi, mò yit-thin voi pí kîm-pû-ngit hàn-kha hó!’ ”