[1] Mô-ap ke nan-mìn tui khóng-yâ ke Sî-lâ-sàng sung yit-chak se-yòng pûn Siak-ôn-sân tông-khièn ke ngìn cho lî-vu̍t.
[2] Liá-têu nan-mìn chhai Â-nun hò-pa sùn ke thu-sòn-thèu, chhiong pûn-ngìn kiuk-chhut teu ke tiâu-chṳ́, pî-lòi pî-hi, m̀-tî ngióng-pân chang-hó.
[3] Kì-têu mun Yù-thai-ngìn: “Chhiáng chṳ́-kau ngài-têu, ngài-têu yin-kôi ngióng-pân cho? Khiù ngì-têu pó-fu ngài-têu, chhai tông-chu-thèu ya yû yîm-yáng chhiong am-pû-thèu khiung-yong, chiông ngài-têu nan-mìn khong hí-lòi; mo̍k pûn ngìn chhìm-tó ngài-têu.
[4] Ngài-têu tui Mô-ap pûn-ngìn kiuk chhut-lòi, oi hi he̍t chhai ngì-têu ke tông-chûng. Chhiáng pó-fu ngài-têu, sṳ́ ngài-têu nèn thot-lì fí-me̍t-chá ke sú.” (Khî-fu lâu fí-me̍t thin-chho̍k voi thìn-thet; chhîm-lio̍k-chá yit-thin voi sêu-me̍t.
[5] Yèn-heu yû yit-ke Thai-ví ke chṳ́-sûn voi cho vòng; kì oi yung sin-sṳ̍t lâu chhṳ̀-oi lòi thúng-chhṳ ngìn-mìn. Kì oi chhìm-khiù kûng-tho, kón-kín sṳ̍t-hàng chṳn-ngi.)
[6] Yù-thai ke ngìn-mìn kóng: “Ngài-têu thâng-kóng Mô-ap ngìn-mìn fî-sòng kiêu-ngau. Kì-têu chhṳ-kô chhṳ-thai, chúng-he kì-têu ke khoâ-khiéu chhiòn-phu he phong-fûng ke.”
[7] Mô-ap ngìn-mìn voi vi Mô-ap ke châi-nan lòi pî-sông. Kì-têu fì-sióng chhai Kit-ngí-Ha̍p-lie̍t-sat sṳ̍t phù-thò-piáng ke sṳ̀, sà-sà liù muk-chṳp kieu, chhiòn-phu pî-sông chhie̍t-mong.
[8] Hî-sṳ̍t-pún ke thièn-yèn lâu Sî-pí-mâ ke phù-thò-yèn chhiòn-phu fí-me̍t thet. Ke-têu phù-thò-yèn só-kiuk ke chiú, sṳt sṳ́ kok-koet ke thúng-chhṳ-chá chui-to vang hâ-hi. Yû yit sṳ̀-khì, kì-têu ke phù-thò thèn yit-chhṳ̍t hiong-pet chhûn-to Ngâ-chhia, hiong-tûng chhûn-to khóng-yâ, hiong-sî chhûn-to Sí-hói tui-mien;
[9] liá-ha ngài vi Sî-pí-mâ ke phù-thò-su pî-sông, chhiong vi Ngâ-chhia-ngìn ôi-sông yit-yong. Ngài vi Hî-sṳ̍t-pún lâu Yî-li-â-li muk-chṳp liù-to chhiong lo̍k-súi yit-yong, yîn-vi chhai kì-têu sû-sṳ̀n kó-chṳ́ lâu ńg-kuk ke sṳ̀, chan-chên ke sê-sâng fut-yèn lìm-to.
[10] M̀-voi chai yû-ngìn vi thièn-yèn tông-phì lòi fôn-hí; m̀-voi chai yû-ngìn vi phù-thò-yèn fôn-hí chhong-kô; m̀-voi chai yû-ngìn chhai cha-chiú-chhṳ̀ tha̍p phù-thò. Fôn-hí khoai-lo̍k ke sâng yí-kîn so̍t-thet lé.
[11] Ngài ke sîm vi Mô-ap chhiong khìm chhut-sâng, vi Kit-ngí-Ha̍p-lie̍t-sat sông-sîm.
[12] Mô-ap ngìn-mìn sòng-sòng to sân-táng tak-ke sṳ̀n-meu hi khì-khiù, khiù-to voi thiám-sí, chúng-he vàn-chhiòn mò-háu.
[13] Yî-song he Song-chú yî-chhièn só siên-ko yû-koân Mô-ap ke sin-sit.
[14] Liá-ha, Song-chú kóng: “Sâm-ngièn nui, cheu chhòng-kûng ke ngièn-han, Mô-ap ke yùng-kông chhiòn-phu voi sóng-sṳt, chṳ́-yû séu-su ke ngìn-mìn yû-hó chhùn-liù; kì-têu ya chhûn mò kí-tô, sṳ̍p-fûn sôi-ngio̍k.”