[1] Ke-ngit, ngìn-mìn oi chhai Yù-thai-thi chhong liá-sú kô: Ngài-têu ke sàng-chhiòng ngióng-pân kiên-ku! Song-ti chhîn-chhṳ pó-fu liá-ke sàng!
[2] Sàng-mùn tá khôi-lòi! Pûn chṳn-ngi ke koet-kâ ngi̍p-lòi! Pûn chûng-sin ke ngìn-mìn lo̍k-lòi!
[3] Song-chú â, Ngì chiông vàn-chhiòn ke phìn-ôn su-pûn sîm-yi kiên-khiòng ke ngìn, su-pûn sin-kho Ngì ke ngìn.
[4] Oi yún-yén sin-kho Song-chú, yîn-vi Song-chú he yún-kiú ke phàn-sa̍k.
[5] Kì sṳ́ kiêu-ngau ke ngìn khiâm-pî; Kì pho-fái kiên-ku ke sàng-sṳ, chhak-thet sàng-chhiòng, chhak-to phiàng-phiàng, sàng-cho nài-fún.
[6] Pûn-ngìn khî-fu ke voi khî chhai chôn-chiet tôi táng-kô; khiùng-khú ke ngìn voi chien-tha̍p vang hâ-lòi ke sàng-chhiòng.
[7] Kûng-ngi ke Song-chú â, Ngì sṳ́ kûng-phìn ke ngìn hàng phiàng-lu; Ngì sṳ́ chṳn-chhṳ̍t ke ngìn hàng chhṳ̍t-lu.
[8] Song-chú â, ngài-têu tén-heu Ngì, sun-chhiùng Ngì ke chṳ́-yi; Ngì ke miàng lâu miàng-mong he ngài-têu sîm-lìn ke ngien-mong.
[9] Chhai am-pû-sṳ̀ ngài hiûn-mu Ngì, ngài chhiòn-sîm chhiòn-yi chhìm-khiù Ngì. Chhai Ngì sṳ́m-phan sṳ-kie ke sṳ̀-chiet, thi-song ke van-mìn chhiu ho̍k-si̍p chṳn-ngi.
[10] Sûi-yèn Ngì yung yìn-chhṳ̀ tui-thai fái-ngìn, kì-têu hàn-he m̀-hén ho̍k-cho san-sṳ; chhai kûng-ngi ke thi kì-têu hàng-sṳ put-ngi, kì-têu chhiòn-mò chu-yi tó Ngì ke vî-ngiàm.
[11] Song-chú â, Ngì ke sù-thi̍t m̀-tî Ngì oi chit-fa̍t kì-têu. Pûn kì-têu khon-tó Ngì án ngie̍t-sîm siak Ngì ke chṳ́-mìn lòi kám-kok kien-seu; pûn kì-têu su-tó Ngì chó chhiu vi Ngì thi̍t-ngìn chún-phi hó ke chit-fa̍t.
[12] Song-chú â, khiù Ngì sṳ́ ngài-têu hîn-vong; ngài-têu ke sṳ̀n-chhiu chhiòn-phu he Ngì sóng-su ke.
[13] Song-chú — ngài-têu ke Song-ti â, ngài-têu sṳt pûn phe̍t ke chú kón-chṳ; chúng-he Ngì chang-he ngài-têu ke Chú.
[14] Kì-têu yí-kîn sí-thet, pien-cho yîm-fùn lé, mò khó-nèn fán-sâng; kì-têu pûn Ngì chit-fa̍t, vàn-chhiòn sêu-me̍t, m̀-voi yû-ngìn ki-ngiam.
[15] Song-chú â, Ngì sṳ́ ngài-têu ke koet-kâ hîn-vong, sṳ́ ngài-têu ke koet-mìn kín tô, thú-thi kín fat, yîn-vi án-ngiòng, Ngì ke miàng chhiu tet-tó yùng-kông.
[16] Song-chú â, Ngì sṳt chit-fa̍t Ngì ke chṳ́-mìn; chhai khú-nan chûng kì-têu chhiòn-sîm khiù-ham Ngì.
[17] Song-chú â, Ngì sṳ́ ngài-têu thai-sâng chhin-hêm, chhin-sê, chhiong sên-sán ke fu-ngìn-kâ chhai chhṳn-thung chûng kín-chhên.
[18] Ngài-têu sṳt chhiong sên-sán án-ngiòng chhin-hêm, chhin-sê, só kiung ke put-ko he fûng thin-thin. Ngài-têu m̀-sṳt vi koet-kâ tá-yàng chan-chên; ngài-têu m̀-sṳt sṳ́ sṳ-kiên ngìn sṳt-lo̍k tiet-tó.
[19] Chúng-he ngài-têu sí-thet ke thùng-pâu voi fu̍k-fa̍t! Kì-têu ke sṳ̂n-thí voi chai tet-tó sâng-miang! Soi chhai fùn-mu chûng ke ngìn â, oi fán-sâng thai-sâng fôn-chhong! Chhiu-chhiong thi-song chêu-sṳ̀n-thèu ke lu-súi tai-lòi sâng-miang, Song-chú oi pûn sí-thet ke ngìn chai fán-sâng ko-lòi.
[20] Ngài ke thùng-pâu, ngi̍p ngì-têu ke vuk-tú hi! Mùn koân-hó, chhiam-sṳ̀ khong hí-lòi, chhṳ̍t-to Song-ti ke nu-hi sêu-thet.
[21] Song-chú oi tui Kì só he̍t ke thiên-táng kong-lìm, chit-fa̍t sṳ-kiên ngìn ke chhui. Ngìn-kiên ke hiûng-sat chhiòn-phu voi hién-lu chhut-lòi; thi mien-song m̀-voi chai khong-tén pûn-ngìn chhṳ̀-sí ke sṳ̂-thí.